ភ្នំពេញ៖ សភាជប៉ុនទទួលបន្ទុកសកម្មភាពអង្គការអន្តរជាតិខាងការងារ វិស័យសុខាភិបាល និងសុវត្តិភាពការងារ បានឯកភាពជួយកម្ពុជាក្នុងការអនុវត្តគម្រោងលើកទី២ ពាក់ព័ន្ធនឹងការលើកកម្ពស់សុខភាព និងសុវត្តិភាពការងារក្នុងវិស័យសំណង់ ២០១៨-២០២០។ នេះបើតាមការចុះផ្សាយរបស់ក្រសួងការងារ និងបណ្ដុះបណ្ដាលវិជ្ជាជីវៈ។
តាមរយៈការចុះផ្សាយនេះបង្ហាញថា ការបង្ហាញជំហរបែបនេះ ធ្វើឡើងក្នុងជំនួបរវាងលោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ជាមួយលោក Jiro KAWASAKI សមាជិកសភា និងជាអតីតរដ្ឋមន្ត្រីក្រសួងសុខាភិបាល ការងារ និងសុខុមាលភាពជប៉ុន រួមទាំង គណ: ប្រតិភូ សភាជប៉ុនទទួលបន្ទុកលើសកម្មភាពអង្គការអន្តរជាតិខាងការងារ នាថ្ងៃទី២៧ កញ្ញានេះ នៅទីស្ដីការក្រសួងការងារ។
យ៉ាងណាមិញ ការបន្តជួយពីភាគីជប៉ុនមកលើកម្ពុជានោះ គឺស្របតាមផែនការយុទ្ធសាស្រ្តអភិវឌ្ឍវិស័យការងារនិងបណ្តុះបណ្តាលវិជ្ជាជីវៈ អនុសញ្ញារបស់អង្គការអន្តរជាតិខាងការងារ ច្បាប់ និងបទដ្ឋាននានា ក្នុងគោលដៅពង្រឹងនូវសុខដុមនីយកម្មទំនាក់ទំនងវិជ្ជាជីវៈ ឱ្យបានប្រសើរជាងមុន។
នាឱកាសនោះ លោក ឡេង តុង ប្រធាននាយកដ្ឋានពេទ្យការងារ បានថ្លែងថា ភាគីជប៉ុនបានថ្លែងអំណរគុណចំពោះរាជរដ្ឋាភិបាលកម្ពុជា និងក្រសួងការងារ ដែលបានផ្តល់នូវកិច្ចសហប្រតិបត្តិការល្អ។ យ៉ាងណាមិញ ភាគីជប៉ុននៅតែបន្តគាំទ្រដល់ការអនុវត្តគម្រោងលើកទី២នេះដល់កម្ពុជាដើម្បីឱ្យសម្រេចបានជោគជ័យតាមការរំពឹងទុក។
គម្រោងទី ២នេះ មានទិសដៅ ៤សំខាន់ៗដូចជា៖
១៖ បន្តអនុវត្តគម្រោងលើកទី២ ស្ដីពីការលើកកម្ពស់ស្ដង់ដាសុខភាព និងសុវត្ថិភាពការងារនៅក្នុងវិស័យសំណង់ឆ្នាំ ២០១៨-២០២០ ដោយប្រើប្រាស់យន្តការក្រុមការងារពិគ្រោះយោបល់គម្រោង និងយន្តការដទៃទៀត ដើម្បីសម្រេចឱ្យបាននូវការរំពឹងទុករបស់គម្រោង។
២៖ ការរៀបចំក្របខណ្ឌច្បាប់ និងបទដ្ឋានគតិយុត្តបន្ថែមទាក់ទងនឹងសុខភាព និងសុវត្ថិភាពការងារ ជាពិសេសវិស័យសំណង់។
៣៖ ការពង្រឹងការចុះធ្វើអធិការកិច្ចការងារ ក្នុងការកែលម្អលក្ខខណ្ឌការងារនៅតាមការដ្ឋានសំណង់។
៤៖ បន្ថែមការយល់ដឹងដល់កម្មករនិយោជិត និងនិយោជកតាមរយៈការរៀបចំវគ្គបណ្ដុះបណ្ដាលផ្សេងៗ។
ប្រធាននាយកដ្ឋានពេទ្យការងារបន្ថែមថា នៅថ្ងៃទី ២៨ ស្អែកនេះ ភាគីទាំងពីរនឹងចុះទៅត្រួតពិនិត្យការដ្ឋានសំណង់ជាក់ស្ដែង ដើម្បីពិនិត្យមើលវឌ្ឍនភាពដែលបានអនុវត្ត នាពេលកន្លងមក៕
អត្ថបទ៖ លោក សោម លាភ