ស្ត្រីខ្មែរដែលចាញ់បោកមេខ្យល់នាំទៅធ្វើការនៅប្រទេសអារ៉ាបី សាអូឌីត (Saudi Arabia) ចេញវីដេអូលើហ្វេសប៊ុកអំពាវនាវរសុំមកកម្ពុជាវិញ កាលពីថ្ងៃទី១៨ មេសា ២០២៤។ ប្រភពពីហ្វេសប៊ុក Ry Single
ក្រុមស្ត្រីខ្មែរដែលចាញ់បោកមេខ្យល់នាំទៅធ្វើការនៅប្រទេសអារ៉ាប៊ី សាអូឌីត បាននាំគ្នាចេញវីដេអូលើហ្វេសប៊ុក អំពាវនាវរកការសង្គ្រោះកាលពីថ្ងៃទី១៨ មេសា ខែឆ្នាំ២០២៤ ស្រែកដង្ហោយ ឱ្យរដ្ឋាភិបាល និងអាជ្ញាធរពាក់ព័ន្ធពន្លឿននីតិវិធីបញ្ជូនពួកគេមកកម្ពុជាវិញឱ្យបានឆាប់។ ក្រោយបែកធ្លាយវីដេអូអំពាវនាវនេះ ក្រសួងការងារបានសហការជាមួយស្ថាប័នពាក់ព័ន្ធអន្តរាគមន៍ពលករទាំងនោះចំនួន២៨ នាក់ ត្រឡប់មកកម្ពុជាវិញ កាលពីថ្ងៃទី២៩ ខែមេសា។ បើតាមលោក កត្តា អ៊ន អ្នកនាំពាក្យក្រសួងការងារ អះអាងថាពលករដែលដង្ហោយសុំវិលត្រឡប់មកផ្ទះវិញទាំងនោះមានចំនួនរហូតដល់៩០នាក់។ នេះមានន័យថាពលករជាង៦០នាក់ ផ្សេងទៀតនៅមិនទាន់អាចវិលត្រឡប់មកកម្ពុជាវិញនៅឡើយ។ អ្នកនាំពាក្យរូបនេះបានអំពាវនាវដល់ពលករទាំងនោះកុំបំផុសព័ត៌មានដែលធ្វើឱ្យប៉ះពាល់ដល់នីតិវីធី នៃការធ្វើសំណុំបែបបទ បញ្ជូនពួកគេត្រឡប់មកវិញ។ ដើម្បីលម្អិតព័ត៌មាននេះ សូមស្ដាប់បទសម្ភាសរវាងលោក គីម ចាន់ចាវ ជាមួយលោក កត្តា អ៊ន ដោយមេត្រី!
