ភ្នំពេញ ៖ លទ្ធផលនៃប្រកួតប្រជែងស្នាដៃអ្នកសារព័ត៌មានឆ្នើមឆ្នាំ២០១៧ អ្នកសារព័ត៌មាន ៥រូប បានប្រកួតឈ្នះពានរង្វាន់ ក្នុងនោះអ្នកសារព័ត៌មានមណ្ឌលព័ត៌មានស្ត្រីកម្ពុជាពីររូប បានជាប់ជ័យលាភីជាអ្នកសារព័ត៌មានឆ្នើមដាច់គេ។ ការប្រកួតប្រជែងស្នាដៃនិពន្ធអត្ថបទ ពានរង្វាន់អ្នកសារព័ត៌មានឆ្នើមស្ដីពីគ្រួសារ សុខភាព និងកីឡា រៀបចំដោយក្លឹបអ្នកកាសែតកម្ពុជា ក្រោមការឧបត្ថម្ភដោយក្រុមហ៊ុនធានារ៉ាប់រងអាយុជីវិត មេនូឡាយហ្វ៍ ខេមបូឌា ។
ពានរង្វាន់សម្រាប់អ្នកសារព័ត៌មានឆ្នើមប្រចាំឆ្នាំ២០១៧ បានប្រកាសកាលពីរសៀលថ្ងៃទី២៧ ខែវិច្ឆិកាម្សិលមិញ ដោយក្លិបអ្នកកាសែតកម្ពុជា (ក.អ.ក.) នៅសណ្ឋាគារ Raffles Le Royal រាជធានីភ្នំពេញ។ ចូលរួមដោយលោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍ ក្រសួងព័ត៌មាន និង លោក Robert Elliott អគ្គនាយកប្រតិបត្តិ និងជានាយកចាត់ការទូទៅនៃក្រុមហ៊ុនមេនូឡាយហ្វ៍។
អ្នកសារព័ត៌មានមណ្ឌលព័ត៌មានស្ត្រីកម្ពុជាពីររូប មានលោក រស់ គង់ ទទួលជ័យលាភីលេខ១ និងលោក មិន ម៉ៅសំណាង ជ័យលាភីលេខ២ ក្នុងការប្រកួតអ្នកសារព័ត៌មានឆ្នើម ក្រោមប្រធានបទ ការរួមចំណែកលើកកម្ពស់សុខុមាលភាព គ្រួសារ ព្រមទាំងវិស័យកីឡានៅកម្ពុជា ។
ទន្ទឹមនឹងជ័យលាភីឆ្នើមទាំងពីរខាងលើ អ្នកសារព័ត៌មានឆ្នើមបីរូបទៀត ទទួលបានលេខបី លេខបួន និងលេខប្រាំ មកពីស្ថាប័នកាសែតខ្មែរថាម លោក ម៉ៃ គុណមករា, គេហទំព័រថ្មីៗ លោកសឿន វណ្ណឌេត, និងទូរទស្សន៍ CNC អ្នកស្រី ស៊ន សុខឃៀង នឹងធ្វើដំណើរទស្សនកិច្ចសិក្សាបីថ្ងៃ ដើម្បីចែករំលែកបទពិសោធន៍ជាមួយអ្នកសារព័ត៌ មានមកពីបណ្តាប្រទេសផ្សេងៗ ព្រមទាំងចូលរួមកម្មវិធីរត់ពាក់កណ្តាលម៉ារ៉ាតុងអន្តរជាតិ នៅទឹកដីអង្គរខេត្តសៀមរាប។
ភ្ជាប់នឹងពានរង្វាន់សម្រាប់ជ័យលាភីអ្នកសារព័ត៌មានឆ្នើម ជ័យលាភីលេខ១ ទទួលបានទឹក ប្រាក់ ១ពាន់ដុល្លារអាម៉េរិក, លេខ២ ទទួលបានប្រាំពីររយដុល្លារ, លេខ៣ ទទួលបានប្រាំរយដុល្លារ លេខ៤ និងលេខ៥ ទទួលបានទឹកប្រាក់មួយរយដុល្លារអាម៉េរិក ក្រោមការឧបត្ថម្ភពីក្រុមហ៊ុនធានារ៉ាប់រងអាយុជីវិត មេនូឡាយហ្វ៍ ខេមបូឌា ។
សូមជម្រាបថា ក្នុងការប្រកួតប្រជែងអ្នកសារព័ត៌មានឆ្នើមប្រចាំឆ្នាំ២០១៧ រៀបចំដោយក្លិបអ្នកកាសែតកម្ពុជា (ក.អ.ក.) និងក្រុមហ៊ុនធានារ៉ាប់រងអាយុជីវិត មេនូឡាយហ្វ៍ ខេមបូឌា មាន បេក្ខភាពដាក់ស្នាដៃចូលរួមប្រកួតប្រជែងចំនួន ២០ រូបមកពីបណ្តាស្ថាប័នព័ត៌មានល្បីៗនៅកម្ពុជា ដោយជ្រើសរើសយកប្រាំរូបជាជ័យលាភីឆ្នើម។
សេចក្តីប្រកាសព័ត៌មានរបស់ក្លិបអ្នកកាសែត បានឱ្យដឹងថា កម្មវិធីប្រកួតប្រជែងស្នាដៃឆ្នើមសម្រាប់ពានរង្វាន់នេះមានគោលបំណងជម្រុញ និងលើកទឹកចិត្តអ្នកសារព័ត៌មានកម្ពុជា ឲ្យចូលរួមសរសេរអត្ថបទព័ត៌មាន និងផលិតបទយកការណ៍ជាទម្រង់វីដេអូ ឬសំឡេង ដើម្បីជាការរួមចំណែកលើកកម្ពស់សុខុមាលភាព គ្រួសារ ព្រមទាំងវិស័យកីឡានៅកម្ពុជា ឲ្យកាន់តែទូលំទូលាយបន្ថែមទៀត។
អ្នកសារព័ត៌មានដែលបានចូលរួមក្នុងការប្រកួតប្រជែងនេះ រួមមានអ្នកសារព័ត៌មានជនជាតិខ្មែរដែលមានស្ថាប័នពិតប្រាកដ ឬធ្វើការងារដោយឯករាជ្យ (Freelance Journalists) ទាំងនៅផ្នែកបោះពុម្ព (កាសែត និង ទស្សនាវដ្ដី) តាមរលកអាកាស (វិទ្យុនិង ទូរទស្សន៍) ព្រមទាំងអ្នកសារព័ត៌មានអនឡាញ ឬគេហទំព័រ (Online/Website) និងអ្នកសារព័ត៌មានបង្ហោះតាមបណ្ដាញសង្គមប្លុក (Blogger)៕
