ក្រសួងសុខាភិបាលបានរកឃើញជំងឺហ្សីកាមួយករណីដំបូងគេនៅកម្ពុជាកើតលើបុរសម្នាក់មានអាយុ ៤៤ ឆ្នាំ ស្ថិតនៅភូមិតាមាង ឃុំកោះរកា ស្រុកកំពង់សៀម ខេត្តកំពង់ចាម។ នេះបើសេចក្តីប្រកាសព័ត៌មានរបស់ក្រសួងសុខាភិបាលផ្សព្វផ្សាយកាលពីថ្ងៃទី ១៨ ខែ វិច្ឆិកា ឆ្នាំ ២០១៦។
ការរកឃើញជំងឺហ្សីកានេះ បន្ទាប់ពីវិទ្យាស្ថានប៉ាស្ទ័រ កម្ពុជា កាលពីថ្ងៃទី ១១ វិច្ឆិកា បានរកឃើញវិរុសហ្ស៊ីកា វិជ្ជមាន នៅក្នុងឈាមបុរសវ័យ ៤៤ ឆ្នាំ ពេលគាត់មកសម្រាក់ព្យាបាលជំងឺនៅមន្ទីរពេទ្យខេត្តកំពង់ចាម កាលពីថ្ងៃទី ១៨ ខែ តុលា ដោយគាត់មានអាការៈស្រដៀងជំងឺគ្រុនឈាម តែបុរសនោះបានជាសះស្បើយ ក្រោយសម្រាក់ពន្យាបាលចំនួន ៤ ថ្ងៃបន្ទាប់។
ករណីវីរុសហ្ស៊ីកា ឆ្លងមកមនុស្សតាមរយៈសត្វមូសខ្លា ដែលមានផ្ទុកវីរុសហ្ស៊ីកា ហើយជំងឺហ្ស៊ីកាក៏អាចឆ្លង់តាមរយៈរួមភេទដែរ ប្រសិនបើរួមភេទជាមួយអ្នកផ្ទុក ឬមានវីរុសហ្ស៊ីកា។
បើតាមសេចក្តីប្រកាសព័ត៌មានរបស់ក្រសួងសុខាភិបាលបានបញ្ជាក់ថា វីរុសហ្ស៊ីកាគឺជំងឺស្រាលមិនធ្ងន់ធ្ងរទេ។ រោគសញ្ញាទូទៅ ដូចជា គ្រុនក្តៅស្ទិញៗ និងកន្ទួលក្រហមលើស្បែក ភ្នែកឡើងក្រហម ឈឺសាច់ដុំ ឈឺសន្លាក់ និងអស់កម្លាំងជាដើម។ ប្រជាពលរដ្ឋការពារជំងឺហ្ស៊ីកានេះ ត្រូវជៀសវៀងមូសខ្លាខាំ និងត្រូវលុបបំបាត់ជំរកមូសខ្លាជាដើម។
ក្រសួងសុខាភិបាលអះអាងថា នេះជាករណីទី៨ សម្រាប់កម្ពុជា ដែលមានវីរុសហ្ស៊ីកាវិជ្ជមាន តាំងពីឆ្នាំ២០០៧។ ក្រសួងសុខាភិបាលបញ្ជាក់ថា បើសង្ស័យថាមានរោគសញ្ញាជំងឺហ្ស៊ីកា ត្រូវទូរស័ព្ទទៅសេវាសុខាភិបាលសាធារណៈដែលនៅជិត ឬអាចទាក់ទងតាមទូរស័ព្ទលេខ ០១៥ /០១២ ៨២៥ ៤២៤ ដើម្បីសួរ អំពីជំងឺហ្ស៊ីកា៕
