ក្រុងតូក្យូ ៖ ក្រសួងការពារជាតិឥណ្ឌានឹងសម្រេចយល់ព្រមនៅថ្ងៃចន្ទទី០៧ វិច្ឆិកាស្អែកនេះ ដើម្បីទិញយន្តហោះសង្គ្រោះ US-2 ដែលអាចចុះចតទាំងនៅលើទឹក និងលើគោកបាន ចំនួន ១២ គ្រឿង ដែលផលិតដោយក្រុមហ៊ុនឧស្សាហកម្ម ស៊ីនមេវ៉ា(ShinMaywa) ក្នុងតម្លៃចន្លោះពី ១,៥ ទៅ ១,៦ ពាន់លានដុល្លារសហរដ្ឋអាមេរិក។ នេះបើតាមកាសែត Nikkei បានរាយការណ៍នៅថ្ងៃអាទិត្យទី ០៦ វិច្ឆិកានេះ។
ប្រទេសជប៉ុន និង ប្រទេសឥណ្ឌាបានធ្វើការពិភាក្សាទៅលើការទិញលក់យន្តហោះប្រភេទនេះ អស់រយៈពេលជាងពីរឆ្នាំមកហើយ។ ហើយការលក់សម្ភារយោធានេះ ជាលើកដំបូងហើយរបស់ជប៉ុន ចាប់តាំងពីលោកនាយករដ្ឋមន្ត្រី ស៊ីន ហ្សូអាបេ បានលុបចោលការហាមឃាត់រយៈពេល ៥០ ឆ្នាំលើការនាំចេញអាវុធ ហើយវាក៏ឆ្លុះបញ្ចាំងឱ្យឃើញថា ទំនាក់ទំនងការពារជាតិរវាងប្រទេសទាំងពីរមានភាពល្អប្រសើរផងដែរ។
កាសែត Nikkei បានលើកយកសម្តីពីមន្ត្រីក្រសួងជាន់ខ្ពស់ដែលសុំមិនបញ្ចេញឈ្មោះបានសរសេរថា ក្រសួងការពារជាតិឥណ្ឌានឹងអនុម័តលើសំន្នើទិញយន្តហោះ US-2 ចំនួន ១២ គ្រឿង នៅក្នុងកិច្ចប្រជុំក្រុមប្រឹក្សាការពារជាតិ ដែលគ្រោងទិញនៅថ្ងៃចន្ទស្អែក ។
កាសែត Nikkei ក៏បានបន្តថា កិច្ចព្រមព្រៀងទិញយន្តហោះនេះនឹងត្រូវបានបញ្ចូលនៅក្នុងអនុស្សរណៈនៃការយោគយល់គ្នា ដែលបានចុះហត្ថ លេខាដោយនាយករដ្ឋមន្ត្រីឥណ្ឌាលោក Narendra Modi នាកំឡុងដំណើរទស្សនកិច្ចរបស់លោក ទៅប្រទេសជប៉ុនកាលពីថ្ងៃព្រហស្បតិ៍ដល់ថ្ងៃសៅរ៍កន្លងទៅនេះ។
កាសែត Nikkei បានរាយការណ៍បន្ថែមថា ក្នុងអំឡុងដំណើរទស្សនកិច្ចនោះ លោក អាបេ ក៏បានជម្រុញឱ្យលោក ម៉ូឌី ពង្រីកការប្រើប្រាស់បច្ចេកវិទ្យារថភ្លើងល្បឿនលឿនរបស់ជប៉ុនផងដែរ៕
ប្រភព៖CNA
