ភ្នំពេញ៖ ក្រសួងការពារជាតិប្រទេសហ្វីលីពីនប្រកាសថា រយៈពេលមួយសប្ដាហ៍ចុងក្រោយនេះ ក្រសួងបានទទួលព័ត៌មាន ជាច្រើន ពីផែនការនៃការរៀបចំធ្វើរដ្ឋប្រហារ ទម្លាក់ប្រធានាធីបតី Rodrigo Duterte ។
ឧត្តមសេនីយ៍ត្រី Restituto Padilla ជាអ្នកនាំពាក្យ កងទ័ពនៃប្រទេសហ្វីលីពីន ដែលស្រង់សម្ដីដោយ សារព័ត៌មានក្នុងស្រុក បាននិយាយថា ក្រសួងបានទទួលព័ត៌មានចារកម្មកាន់តែច្រើនឡើងៗ ពីការរៀបចំផែនការធ្វើរដ្ឋប្រហារ ផ្ដួលរំលំ ប្រធានាធិបតី Duterte។ ប៉ុន្តែលោកឧត្តមសេនីយ៍ត្រី បានព្រមានថា មុនគិតថាធ្វើឱ្យមានរដ្ឋប្រហារសូមគិតបាន២ដងសិន។
អ្នកនាំពាក្យរូបនេះ បញ្ជាក់ថា ផ្នែកចារកម្ម របស់ក្រសួងការពារជាតិ កំពុងស្រាវជ្រាវនិងស៊ើបអង្កេត ប្រភពដើម នៃគំរោងធ្វើរដ្ឋប្រហារ។ តែយ៉ាងនេះក្ដីឧត្តមសេនីយ៍ត្រី Restituto Padilla ប្រកាសថា កងទ័ពនៅតែជារបស់រដ្ឋ ហើយ នៅតែមានទំនាក់ទំនងល្អជាមួយ លោក Duterte។
ទន្ទឹមនឹងនេះ លោករដ្ឋមន្ត្រី ទំនាក់ទំនង Martin Andanar បានប្រាប់បណ្ដាញផ្សាយព័ត៌មានCNNកាលពីថ្ងៃអង្គារសប្ដាហ៍នេះថា វិមានប្រធានាធិបតី ទទួលបាន របាយការណ៍ជាច្រើន អំពីគំរោងធ្វើរដ្ឋប្រហារ លោក Rodrigo Duterte។ តែជាមួយគ្នានេះ លោក Duterte សន្យាថាលោកនឹង ចូលនិវត្តន៍នៅ ឆ្នាំ២០២២ នៅពេល លោកចប់អាណត្តិ ជាប្រធានាធិបតី។
ដើមចមធ្វើឱ្យមានគំរោងធ្វើរដ្ឋប្រហារ
ដើមចមធ្វើឱ្យមានអ្នករៀបចំគំរោងធ្វើរដ្ឋប្រហារផ្ដួលរំលំ ប្រធានាធិបតីលោក Duterte អាចមកពី៖
-ការប្រើអំណាចហួសព្រំដែនរបស់លោក Duterte ក្នុងការធ្វើសង្គ្រាមប្រឆាំងគ្រឿងញៀន ដែលនាំឱ្យមនុស្សជិត ៣០០០នាក់ត្រូវបានសម្លាប់ក្រៅប្រព័ន្ធតុលាការ។
-លោក Duterte ងាកពីអាមេរិកទៅរកចិន
-លោក Duterte បន្ទន់ជំហរអនុវត្តសាលដីកា របស់តុលាការមជ្ឈឹត្តការអន្តរជាតិដែលឱ្យហ្វីលីពីនមានសិទ្ធិកាន់កាប់លើ តំបន់មួយចំនួននៅសមុទ្រចិនខាងត្បូងដែលក្រុងម៉ានីល ថាជាដែនទឹករបស់ខ្លួន។
-តុលាការកំពូលព្រមានថានឹងចោទលោក Duterte ពីបទក្បត់ជាតិបើ លោកមិនព្រមអនុវត្តតាមតុលាការអន្តរជាតិ នៃដែនទឹកសមុទ្រចិនខាងត្បូង។
-ព្រឹទ្ធសភា មានផែនការពិនិត្យឡើងវិញ អំណាច របស់ខ្លួន ជាមួយនឹងអំណាចប្រធានាធិបតី។
-ការចង់បញ្ចប់សម្ព័ន្ធភាពជាមួយអាមេរិក។
-ប្រជាជនហ្វីលីពីន ជិត៨០ភាគរយនៅតែគាំទ្រអាមេរិក។
តាមបណ្ដាញផ្សាយព័ត៌មានCNN អ្នកផ្ដើមឱ្យមានគំរោងធ្វើរដ្ឋប្រហារ ច្រើនតែ ពលរដ្ឋហ្វីលីពីន រស់នៅក្រៅប្រទេស និងក្រុមប្រឆាំងអំណាចផ្ដាច់ការ។
ប្រទេសហ្វីលីពីនមានប្រជាជនជាង១០២លាននាក់។ ប្រទេសដីកោះមួយនេះ ធ្លាប់មានបដិវត្តន៍មហាជនដ៏ធំមួយនៅ ឆ្នាំ១៩៨៦ ទម្លាក់ មេដឹកនាំ ផ្ដាច់ការ Ferdinand Marcos ។
លោក Duterte មានគម្រោងទៅធ្វើទស្សនកិច្ចនៅប្រទេសរុស្ស៊ីនៅសប្ដាហ៍ខាងមុខនេះ៕ ប្រភព CNN
