ភ្នំពេញ៖ នៅទីបំផុតតុលាការក្រុងបាងកក ប្រទេសថៃ បានសម្រេចបង្គាប់អោយលោកស្រី Yingluck Shinawatra បញ្ចេញទឹកប្រាក់ ១ ពាន់លានដុល្លារអាមេរិក ទៅអោយរដ្ឋាភិបាល ករណីលោកស្រីធ្វើអោយខូចផែនការរបស់រដ្ឋក្នុងការទិញស្រូវ។
តាមសេចក្ដីរាយការណ៍មួយរបស់គេហទំព័រ Mail Online បានចុះផ្សាយនៅថ្ងៃសុក្រ ទី២១ តុលាថា ដីការបង្គាប់របស់តុលាការ ធ្វើឡើងកាលពីព្រឹកថ្ងៃសុក្រនេះ។ ប៉ុន្ដែអ្នកច្បាប់ប្រទេសថៃ បាននិយាយថា លោកស្រី Yingluck នៅមានឱកាសនៃការប្ដឹងសារទុក្ខ ទៅកាន់តុលាការរដ្ឋបាលរបស់ប្រទេសនេះឡើងវិញនៅរយៈពេល ៤៥ថ្ងៃទៀត។
លោកស្រី បានប្រាប់អ្នកសារព័ត៌មាននៅក្រៅតុលាការថា លោកស្រី និងតស៊ូរឿងក្ដីនេះ បន្ដទៀត។ លោកស្រីបាន រិះគន់ដីកានេះថា បានរំលោភលើ សិទ្ធិរបស់លោកស្រី ហើយថាការកាត់ក្ដីនេះ មិនត្រឹមត្រូវឡើយ។
ប៉ុន្តែបើតាមទីភ្នាក់សារព័ត៌មាន Reuters បានរាយការណ៍ថា តុលាការក្រុងបាងកក បានចេញដីកាបង្គាប់ឱ្យរឹបអូសទ្រព្យសម្បត្តិរបស់លោកស្រី ដែលមាន៣៥ពាន់លានបាត ស្មើនឹង ៨៨៩,៨៧លានដុលា្ល។
អ្នកវិភាគនិយាយថា ករណីពុករលួយប្រឆាំងនឹងលោស្រី Yingluck ដូចជា ការធ្វើរដ្ឋប្រហារ មួយម្ដងទៀត ដើម្បីកំចាត់អ្នកនយោបាយដ៏មានប្រជាប្រិយភាពរូបនេះ ចេញពីសង្វៀន នៅក្នុងការបោះឆ្នោត ដែលពួកយោធាសន្យាថា ធ្វើឡើងនៅឆ្នាំ២០១៧។
ករណីដែលលោកស្រី ត្រូវបានប្ដឹងឡើងតុលាការ ពីបទបណ្ដោយអោយមានអំពើពុករលួយ ទិញស្រូវរបស់ពលរដ្ឋនោះ គឺ ធ្វើឡើងតាមពាក្យបណ្ដឹងរបស់គណៈកម្មាការប្រឆាំងអំពើពុករលួយ នៃរាជាណាចក្រនេះ។
លោកស្រី Yingluck ត្រូវបានទម្លាក់ពីអំណាចនៅខែឧសភា ឆ្នាំ២០១៤ ដោយការធ្វើរដ្ឋប្រហាររបស់ឧត្ដមសេនីយ៍ប្រាយុទ្ធចាន់អូចារ ដែលឧត្ដមសេនីយ៍រូបនេះ បានឡើងកាន់អំណាចជានាយករដ្ឋមន្ដ្រីជំនួសលោកស្រី Yingluck មកដល់ពេលនេះ៕ ប្រភព:Mail Online