នៅទីបំផុត ក្រុមប្រឹក្សាសន្តិសុខអង្គការសហប្រជាជាតិ បានសម្រេច អនុម័ត ទទួលស្គាល់ លោក Antonio Guterres អតីតនាយករដ្ឋមន្ត្រីនៃប្រទេសព័រទុយហ្គាល ឱ្យធ្វើជាអគ្គលេខាធិការ របស់ស្ថាប័នពិភពលោកនេះ ជំនួសលោក បាន គីមូន ដែលចប់អាណត្តិ។
លោក Antonio Guterres ត្រូវបានជ្រើស ចេញពីចំណោម បេក្ខជនសំខាន់ៗចំនួន ៥រូបទៀត។ លោកត្រូវបាន ក្រុមប្រឹក្សាសន្តិសុខអង្គការសហប្រជាជាតិ គាំទ្រ ដោយទទួលបានសំឡេងគាំទ្រ ១៣ និង ២សំឡេងជំទាស់។
លោក Guterres មានអាយុ ៦៦ ឆ្នាំ។ លោកបានដឹកនាំទីភ្នាក់ងារ ជនភៀសខ្លួន អង្គការសហប្រជាជាតិ រយៈពេល១០ឆ្នាំ។ សមាជិកក្រុមប្រឹក្សាសន្តិសុខ មានដូចជាប្រទេសអាមេរិក និង រុស្ស៊ី ដែលគាំទ្រ លោក Guterres បានចាត់ទុក អ្នកជាប់ឆ្នោតរូបនេះ ថាជាមនុស្សស្អាតស្អំ។
តាមបណ្ដាញផ្សាយព័ត៌មាន BBC នៅថ្ងៃព្រហស្បត្តិ៍នេះក្រុមប្រឹក្សាសន្តិសុខអង្គការសហប្រជាជាតិ នឹង បញ្ជូនឈ្មោះលោក ទៅសុំការអនុម័តពីមហាសន្និបាត ឱ្យឡើងកាន់តំណែងជា អគ្គលេខាធិការជាផ្លូវការ។ លោក Guterres នឹងចូលកាន់តំណែងនេះ នៅដើមឆ្នាំ២០១៧ ជំនួសលោកបានគីមូន ដែលបានកាន់តំណែងនេះ ២អាណត្តិ រយៈពេល៨ឆ្នាំ។
តាម BBC បេក្ខជន ដែលហៀបនឹងឈ្នះ លោក Guterres លោកស្រី Irina Bokova អ្នកនយោបាយនៃប្រទេសប៊ុលហ្គារី ហើយ បច្ចុប្បន្នជាអគ្គនាយកអង្គការ UNESCO ។ ការប្រកួតប្រជែង តំណែង អគ្គលេខាធិការអង្គការសហប្រជាជាតិ លើកនេះ មានបេក្ខជន ១៣រូបក្នុងនោះមានស្ត្រី៧រូប។ អង្គការសហប្រជាជាតិពុំដែលមាន ស្ត្រីដឹកនាំម្ដងណាទេ៕
