ភ្នំពេញ៖ គណៈកម្មាធិការអចិន្ត្រៃរដ្ឋសភា កាលពីថ្ងៃព្រឹកទី២៨ ខែកញ្ញា ឆ្នាំ២០១៦នេះ បានច្រានចោលសំណើ លើកអភ័យឯកសិទ្ធិ តំណាងរាស្ត្របក្សប្រឆាំងពីររូបនេះ គឺលោក តុ វ៉ាន់ចាន់ និង លោក ពិន រតនា។
នេះបើតាមការបញ្ជាក់របស់លោក ឡេង ប៉េងឡុង អ្នកនាំពាក្យរដ្ឋសភា ដែលបានប្រាប់អ្នកសារព័ត៌មាន ក្រោយបញ្ចប់កិច្ចប្រជុំ គណៈកម្មាធិការអចិន្ត្រៃយ៍រដ្ឋសភា។ តែនេះជាលើកដំបូងហើយដែលសភាកម្ពុជា បានប្រើប្រាស់សិទ្ធិរបស់ខ្លួន។ កញ្ញា ណាតា រាយការណ៍បន្ត៖
លោក ឡេង ប៉េងឡុង បានឱ្យដឹងថាការសម្រេចនេះ ដោយសារតំណាងរាស្ត្ររបស់បក្សប្រឆាំង លោក តុ វ៉ាន់ចាន់ និង លោក ពិន រតនា មិនបានប្រព្រឹត្តបទល្មើសជាក់ស្តែង។
លោក ឡេង ប៉េងឡុង៖«បានន័យថាពីរនាក់នោះមិនបានប្រព្រឹត្តបទល្មើសជាក់ជាក់ស្តែងទេ បទល្មើសពីណាទេ មិនមែនជាក់ស្តែងទេណា អចិន្ត្រៃមិនបានសម្រេចបញ្ហាហ្នឹង គឺមិនលើកបញ្ហាហ្នឹងទេ ឆ្លើយជូនទៅក្រសួងយុត្តិធម៌»។
អ្នកវិភាគយល់ថា អ្វីដែលនាំឱ្យសភា ច្រានចោលដូចនេះ ទំនងគេចាត់ទុកថា មិនមែនជារឿងសំខាន់ ដូចលោក កឹម សុខា ដែលជាមេដឹកនាំបក្សប្រឆាំងនោះទេ។
លោក សូ ចន្ថា សាស្ត្រាចារ្យ វិទ្យាសាស្ត្រនយោបាយ លើកឡើងថា មូលហេតុដែលនាំឥឲ្យសភា សម្រេចមិនលើកអភ័យឯកសិទ្ធិតំណាងរាស្ត្រទាំងពីរ របស់គណបក្សប្រឆាំង គឺ៖ ទី១ដោយសារករណីនេះ មិនមែនបទល្មើសជាក់ស្តែង ទី២. គណបក្សកាន់អំណាចមិនមានសំលេងគ្រប់គ្រាន់ពីរភាគបីដើម្បីដកអភ័យឯកសិទ្ធិតំណាងរាស្ត្រ និងហេតុផលមួយទៀត គណបក្សទាំងពីរ ចង់បញ្ចប់វិបត្តិនយោបាយ។
លោកបន្តថា ការអនុវត្តករណីរបស់តំណាងរាស្ត្រទាំងពីរ ខុសពីករណី លោក កឹម សុខា។ លោកថា ការអនុវត្តស្តង់ដារ នេះ ដោយសាររឿងរបស់តំណាងរាស្ត្រទាំងពីរ មិនសំខាន់ដូចលោក កឹម សុខា។
លោកសូ ចន្ថា៖ «គោលដៅនៃគណបក្សកាន់អំណាច គឺធ្វើយ៉ាងណាឱ្យមេដឹកនាំបក្សនេះជួបបញ្ហាចុះខ្សោយ ដោយការជាប់បណ្តឹងនានា នៅប្រព័ន្ធតុលាការតែប៉ុណ្ណោះ អញ្ចឹងគោលដៅធំបំផុត គឺមេដឹកនាំបក្ស»។
កិច្ចប្រជុំគណៈកម្មាធិការអចិន្ត្រៃយ៍រដ្ឋសភា នៅព្រឹកមិញនេះ មានសមាសភាពចូលរួម ពីថ្នាក់ដឹកនាំតំណាងរាស្ត្រ របស់គណបក្សប្រជាជនកម្ពុជា និងគណបក្សសង្គ្រោះជាតិ។ សមាសភាពពីគណបក្សប្រជាជនកម្ពុជាចំនួន៧រូប និងគណបក្សសង្គ្រោះជាតិចំនួន៥រូប។
គួរ រម្លឹកថា កាលពីថ្ងៃទី៣០ ខែមិថុនា រដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍនា បានផ្ញើលិខិតជូនរដ្ឋសភា ស្នើឱ្យ លើកអភ័យឯកសិទ្ធិសភា តំណារាស្ត្រគណបក្សប្រឆាំងពីរ រូបនេះ គឺ ក្រោយពីទទួលសំណើពីសាលាដំបូងរាជធានីភ្នំពេញ ក្នុងបទចោទ ថាបានប្រព្រឹត្តិអំពើសញ្ចារកម្ម ករណីរឿងអាស្រូវស្នេហា របស់លោក កឹម សុខា និងនាង ខុម ចាន់តារាទី ហៅស្រីមុំ៕
