Milan៖ ឆ្មាំសមុទ្រប្រទេសអ៊ីតាលី និយាយថា ជនចំណាកស្រុកប្រមាណ ១១០០ នាក់ត្រូវបានជួយសង្គ្រោះចេញពីទូក នៅច្រកសមុទ្រក្រុងសិសីលី(Sicily) កាលពីថ្ងៃអាទិត្យទី២៨សីហា ខណៈដែលពួកគេព្យាយាមស្វែងរកកន្លែងជ្រកកោនថ្មីនៅទ្វីបអឺរ៉ុប។
សេចក្តីប្រកាសព័ត៌មាន របស់ឆ្មាំសមុទ្រអ៊ីតាលីបានឱ្យដឹងថា យ៉ាងតិចណាស់មានជនចំណាកស្រុក ៨ នាក់ត្រូវបានជួយសង្គ្រោះចេញពីទូកតូចមួយដែលធ្វើពីពោងកៅស៊ូ។ ចំណែកភ្នាក់ងារឆ្មាំសមុទ្របានប្រើទូកធំមួយសង្គ្រោះមនុស្សបាន ១១នាក់ ក្នុងប្រតិបត្តិការជួយសង្គ្រោះនៅលើផ្ទៃសមុទ្រមេឌីទែរ៉ាណេ។
តែយ៉ាងណាអាជ្ញាធរអ៊ីតាលីនៅមិនទាន់អាចកំណត់អត្តសញ្ញាណជនភៀសខ្លួនទាំងនេះនៅឡើយនោះទេ ថាតើពួកគេមកពីប្រទេសណានោះ។
ទិន្នន័យចុងក្រោយបំផុត របស់អង្គការអន្តោប្រវេសន៍អន្តរជាតិដែលចេញផ្សាយកាលពីថ្ងៃសុក្រ បានឱ្យដឹងថា មានជនអន្តោរប្រវេសន៍ចំនួន ១០៥ ៣៤២នាក់ បានភៀសខ្លួនតាមទូកទៅកាន់ប្រទេសអ៊ីតាលីនៅឆ្នាំនេះ។
ជនភៀសខ្លួនភាគច្រើន ពួកគេបានចាកចេញពីប្រទេសលីប៊ីដោយធ្វើដំណើរតាមទូកតូចៗ ដែលមកដល់ពេលនេះ ពួកគេប្រមាណ ២៧២៦នាក់ ទាំង បុរស ស្ត្រីនិងកុមារ បានស្លាប់ក្នុងរយៈពេលដូចគ្នាដោយសារការព្យាយាមដើម្បីស្វែងរកជីវិតថ្មី។ ហើយពួកគេជាច្រើន ក៏បានស្លាប់បាត់បង់ជីវិតដោយសារទូករបស់ពួកគេក្រឡាប់។
ប្រទេសអ៊ីតាលី ស្ថិតនៅជួរមុខនៃប្រទេសដែលជួបវិបត្តិជនភៀសខ្លួនរបស់អឺរ៉ុបរយៈពេលបីឆ្នាំកន្លងមកនេះ ហើយមនុស្សជាង ៤ សែននាក់បានធ្វើដំណើរដោយជោគជ័យទៅកាន់ប្រទេសនេះ។ ជនភៀសខ្លួនភាគច្រើនមកពីអាហ្វ្រិកខាងជើងដោយ ពួកគេព្យាយាមភៀសខ្លួនចេញពីអំពើហិង្សា និងភាពក្រីក្រ ដែលផ្ទុះឡើងតាំងពីឆ្នាំ ២០១៤ មក។
មូលហេតុដែលជនភៀសខ្លួនសម្រុកមកអ៊ីតាលី ក៏ព្រោះតែអ៊ីតាលីស្ថិតនៅភាគខាងត្បូងនៃទ្វីបអឺរ៉ុប និងនៅក្បែរទ្វីបអាហ្វ្រិកជាងគេ គ្រាន់តែឆ្លងសមុទ្រមេឌីទែររ៉ាណេបន្តិច គឺទៅដល់អ៊ីតាលីហើយ។ ជនភៀសខ្លួនទាំងនេះតែងតែប្រថុយជីវិតរត់តាមទូកចូលទៅអ៊ីតាលី រឺប្រទេសផ្សេងទៀតនៅអឺរ៉ុបខាងត្បូង បែបយ៉ាងអេស្ប៉ាញជាដើម។
អ៊ីតាលីធ្លាប់បានទាមទារអោយសហភាពអឺរ៉ុប ជួយជាថវិកាក្នុងប្រតិបត្តិការសង្គ្រោះ និងជួយដោះស្រាយបញ្ហានៅតំបន់សង្គ្រាម និងបញ្ហាអសន្តិសុខដូចជាស៊ីរី អ៊ីរ៉ាក់ និងប្រទេសម៉ាលី ព្រោះវាជាប្រភពអន្តោប្រវេសន៍ខុសច្បាប់ ប្រភពមហន្តរាយជីវិតជនភៀសខ្លួន៕
ប្រភព៖CNA
