វិបត្តិរំលាយអាហារ (functional dyspepsia) គឺជាជំងឺមួយដែលជួបប្រទះញឹកញាប់ចំពោះប្រជាជនកម្ពុជានាពេលបច្ចុប្បន្ន។ វាជាជំងឺមួយដែលមានលក្ខណៈរ៉ាំរ៉ៃ អាចប៉ះពាល់ដល់ការងារ និងជីវភាពប្រចាំថ្ងៃរបស់អ្នកជំងឺ និងគ្រួសារ។
មូលហេតុអាចបណ្តាលមកពីកត្តាមួយចំនួនដូចជា ការប្រព្រឹត្តទៅមិនប្រក្រតីនៃចលនាការរំលាយអាហាររបស់ក្រពះ ការទទួលរំញោចលើសលប់របស់ក្រពះ មេរោគក្រពះ (Helicobacter Pylori) នឹងកត្តាផ្លូវចិត្ត។ នេះដោយយោងតាមការលើកឡើងរបស់ទំព័រហ្វេសប៊ុកមន្ទីរពេទ្យ កាល់ម៉ែត។
វិបត្តិរំលាយអាហារស្តែងចេញជារោគសញ្ញា ៤ធំៗគឺ បរិភោគអាហារឆាប់ឆ្អែត តឹងណែនពោះក្រោយបរិភោគ ឈឺចុងដង្ហើម ក្រហាយចុងដង្ហើម។ចំណែកឯ រោគសញ្ញាគ្រោះថ្នាក់រួមមាន ការលេចឡើងថ្មីៗនូវរោគសញ្ញាលើអ្នកដែលមានអាយុលើសពី ៤៥ឆ្នាំ ការស្រកទំងន់ដោយគ្មានមូលហេតុ ពិបាកលេប ឬលេបឈឺ មិនបាត់ ស្លេកស្លាំង ស្ទាបប៉ះដុំនៅចុងដង្ហើម ប្រវត្តិគ្រួសារមានជំងឺមហារីកក្រពះពោះវៀនផ្នែកខាងលើ បន្ទោបង់មានឈាម កើតលឿង ព្រមទាំងមានរោគសញ្ញាបន្ទាប់បន្សំដូចជា ក្អួតចង្អោរ ហើមពោះ ភើជាដើម ។
ការធ្វើរោគវិនិច្ឆ័យពឹងផ្អែកទាំងស្រុងតាមរយៈការសាកសួរ ពីរោគសញ្ញានៃជំងឺផ្ទាល់ ហើយក៏អាចឈានទៅដល់ការមើលឈាមមួយចំនួន អេកូពោះ និងព្រមទាំងឈានទៅដល់ការឆ្លុះក្រពះ ក្នុងករណីជំងឺរ៉ាំរ៉ៃធ្ងន់ធ្ងរ ឬមានរោគសញ្ញាគ្រោះថ្នាក់ដែលសង្ស័យថាមានជំងឺផ្សេងៗដូចជា ជំងឺដំបៅក្រពះ មហារីកក្នុងបំពង់អាហារផ្នែកខាងក្រោម និងក្រពះ។
សម្រាប់ការព្យាបាលជារួមមាន ក្នុងករណីមានមេរោគក្រពះ ត្រូវព្យាបាលបំបាត់មេរោគក្រពះជាមុនសិន ប្រើថ្នាំបន្សាបជាតិអាស៊ីតរយៈពេលណាមួយជាក់ច្បាស់អាស្រ័យទៅតាមស្ថានភាពរបស់អ្នកជំងឺ ផ្តល់ប្រឹក្សា និងទំនុកចិត្តដល់អ្នកជំងឺ។
ជំងឺវិបត្តិរំលាយអាហារ គឺជាជំងឺរ៉ាំរ៉ៃ ប្រសិនបើអ្នកជំងឺមិនទទួលបានការព្យាបាលអោយបានត្រឹមត្រូវទេនោះ វាអាចប៉ះពាល់ដល់ការរស់នៅប្រចាំថ្ងៃព្រមទាំងមានការចំណាយច្រើន។
ដូច្នេះបើលោកអ្នកកើតមាននូវរាល់រោគសញ្ញាដូចដែលបានរៀបរាប់ខាងលើនេះ សូមអញ្ជើញមកពិគ្រោះជាមួយវេជ្ជបណ្ឌិតឯកទេសនៅមន្ទីរពេទ្យកាល់ម៉ែត ដើម្បីស្វែងរកការព្យាបាលអោយបានត្រឹមត្រូវ និងមានប្រសិទ្ធភាពខ្ពស់៕
អត្ថបទប្រែសម្រួល៖ចាន់រ៉ាត់ សៀវមិញ
