ស្ដ្រី២រូប ជាសកម្មជនដីធ្លីរ៉ាំរ៉ៃនៃខេត្តកោះកុង ត្រូវបានសាលាឧទ្ធរណ៍ខេត្តព្រះសីហនុ សម្រេចលើកចោលបទចោទមួយ ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍នៅថ្ងៃឡើងសវនាការម្សិលមិញ តែបន្ដតម្កល់បទចោទមួយទៀតពីបទបរិហាកេរ្ដិ៍ជាសាធារណៈ។
លោក ឡាក់ ច័ន្ទតារា ជូននូវសេចក្ដីរាយការណ៍៖
នៅថ្ងៃទី១៩ ខែធ្នូ ឆ្នាំ២០២៣ សាលាឧទ្ធរណ៍ខេត្តព្រះសីហនុ បានសម្រេចលើកចោលបទចោទមួយ និងតម្កល់បទចោទមួយ លើស្ដ្រីសកម្មជនដីធ្លី២រូបជាពលរដ្ឋខេត្តកោះកុង ដែលចោទប្រកាន់អតីតអ្នកតំណាងសហគមន៍ម្នាក់ កាលពីឆ្នាំ២០១៩ ថាបានរំលោភយកដីធ្លីសមាជិកសហគមន៍របស់ពួកគេជិត២០០នាក់។ នេះបើផ្អែកតាមអង្គការសម្ព័ន្ធខ្មែរជំរឿន និងសិទ្ធិមនុស្សលីកាដូ។
ស្ដ្រីសកម្មជនដីធ្លីទាំងពីររូប មានម្នាក់ ឈ្មោះ ផាវ ញើង និងម្នាក់ទៀតឈ្មោះ សេង លីន។ អ្នកទាំងពីរធ្លាប់បានតុលាការចាប់ដាក់ពន្ធនាគារឃុំខ្លួនបណ្តោះអាសន្នរង់ចាំសវនាការ កាលពីថ្ងៃទី៣០ ខែមិថុនា ដល់ថ្ងៃទី៦ ខែតុលា ឆ្នាំ២០២៣នេះ ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ ។
តែនៅថ្ងៃឡើងសាលាឧទ្ធរណ៍ម្សិលមិញនេះ តុលាការក៏បានលើកចោលបទចោទញុះញង់ឱ្យប្រព្រឹត្តបទឧក្រិដ្ឋជាអាទិ៍ យោងតាមមាត្រា ៤៩៤ និង៤៩៥ នៃក្រមព្រហ្មទណ្ឌ ពីអ្នកទាំងពីរ។ ទោះបីបទចោទមួយត្រូវបានលើកចោល តែសាលាឧទ្ធរណ៍នៅតំកល់បទចោទមួយទៀត គឺបទបរិហារកេរ្តិ៍ជាសាធារណៈ ដែលបទចោទនេះ ត្រូវបានដាក់ដោយសាលាដំបូងខេត្តកោះកុង កាលពីខែសីហាកន្លងទៅ ។
ផ្អែកតាមមជ្ឈមណ្ឌលសិទ្ធិមនុស្សកម្ពុជាCCHR កាលពីខែសីហា ឆ្នាំ២០២៣ សាលាដំបូងខេត្តកោះកុងបានប្រកាសសាលក្រមផ្តន្ទាទោសស្ដ្រីកម្មជនទាំងពីរនាក់ ឱ្យជាប់ពន្ធនាគាររយៈពេលមួយឆ្នាំពីបទ ញុះញង់ឱ្យប្រព្រឹត្ដអំពើបង្កឱ្យមានភាពវឹកវរធ្ងន់ធ្ងរដល់សន្ដិសុខសង្គម និងបទបរិហារកេរ្តិ៍ជាសាធារណៈ តាមមាត្រា៤៩៤, ៤៩៥ និងមាត្រា៣០៥ នៃក្រមព្រហ្មទណ្ឌកម្ពុជា និងបង្គាប់ឱ្យបង់ប្រាក់សំណងចំនួន៤០លានរៀល ទៅឱ្យដើមបណ្តឹងរដ្ឋប្បវេណី។ ក្រោយសាលាឧទ្ធរណ៍លើកចោលបទចោទមួយកាលពីម្សិលមិញ ចំនួនសំណងរដ្ឋប្បវេណី បានបន្ថយមកត្រឹម១០លានរៀលវិញ។ ទោះបីដូចនេះក៏ដោយ តុលាការបានបង្គាប់ឱ្យអ្នកទាំងពីរបង់ប្រាក់ពិន័យម្នាក់ៗចំនួន៤លានរៀល។
គួរជម្រាបថា ស្ដ្រីទាំងពីរ ជាអ្នកតំណាងពលរដ្ឋចំនួនជិត ២០០ គ្រួសារ ដែលដីស្រែចំការរាប់រយហិកតារបស់ពួគេ ត្រូវបានរំលោភបំពានដោយក្រុមហ៊ុនកសិឧស្សាហកម្ម របស់លោក ឧកញ៉ា ហេង ហ៊ុយ ចាប់តាំងពីឆ្នាំ ២០០៨ ដើម្បីយកដីធ្វើចំការអំពៅ ។
ស្ដ្រីតំណាងទាំងពីរនាក់ ត្រូវបានប្តឹងដោយអតីតអ្នកតំណាងសហគមន៍ម្នាក់ឈ្មោះ ឆាយ វី ដែលលោកជាអតីតមេឃុំ និងជាអ្នកដែលត្រូវបានស្ត្រីទាំងពីរចោទប្រកាន់ថាបានលួចរំលោភយកដីរបស់សមាជិកសហគមន៍សម្រាប់ផលប្រយោជន៍ផ្ទាល់ខ្លួនកាលពីឆ្នាំ ២០១៩ អំឡុងពេលជម្លោះដីធ្លីនៅទីនោះមិនទាន់ត្រូវបានដោះស្រាយ ។
តែយ៉ាងណា សម្រាប់ការលើកចោទបទចោទ ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ពីស្ដ្រីសកម្មជនដីធ្លីទាំងពីរអំឡុងពេលសវនាការ ត្រូវបានសង្គមស៊ីវិល លីកាដូថា នេះជាសញ្ញាវិជ្ជមានមួយ នឹងមិនមានការប្តឹងជំទាស់សាលាដីកាសាលាឧទ្ធរណ៍ ទៅតុលាការកំពូលនោះទេ៕