ក្រោយពេលកម្ទេសកំណាត់ពីរោងចក្រមួយចំនួន ត្រូវបានយកទៅប្រើសម្រាប់បញ្ឆេះក្នុងសិប្បកម្មឡឥដ្ឋ ហើយបង្កផលប៉ះពាល់ដល់សុខភាពអ្នកធ្វើការ និងបរិស្ថាន អង្គការលីការដូបានស្នើឱ្យរោងចក្រទាំងនោះ ស៊ើបអង្កេតជាបន្ទាន់ លើការចោលកាកសំណល់របស់ខ្លួន។
លោក ឡាក់ ច័ន្ទតារា ជូននូវសេចក្ដីរាយការណ៍៖
អង្គការខ្មែរជំរឿន និងសិទ្ធិមនុស្សលីកាដូ បានស្នើឱ្យក្រុមហ៊ុនសម្លៀកបំពាក់ម៉ាកល្បីៗ ស៊ើបអង្កេតជាបន្ទាន់ លើការចោលកាកសំណល់កម្ទេចកំណាត់របស់ពួកគេ ខណៈនៅតាមសិប្បកម្មផលិតឡឥដ្ឋមួយចំនួនបានប្រើកម្ទេចកំណាត់ទាំងនេះ សម្រាប់បញ្ឆេះក្នុងឡ នឹងបានបង្កផលប៉ះពាល់ដល់សុខភាព អ្នកធ្វើការក្នុងសិប្បកម្មនេះយ៉ាងច្រើន។
របាយការណ៍ពីអង្គការលីកាដូបានបញ្ជាក់ថា មានសិប្បកម្មឡឥដ្ឋចំនួន៧ទីតាំង នៅរាជធានីភ្នំពេញ និងខេត្តកណ្ដាល បានប្រើកម្ទេចកំណាត់ពីរោងចក្រកាត់ដេរសម្លៀកបំពាក់ ដើម្បីបញ្ឆេះក្នុងឡឥដ្ឋ ដោយក្នុងនោះយកកម្ទេចកំណាត់ ពីម៉ាកយីហោលំដាប់អន្តរជាតិចំនួន ១៩ក្រុមហ៊ុន។ លីកាដូអះអាងថា សំណល់រោងចក្ររបស់ក្រុមហ៊ុនអន្តរជាតិទាំងនោះ រួមចំណែកបង្កហានិភ័យដល់សិទ្ធិមនុស្ស និងបរិស្ថាននៅក្នុងសិប្បកម្មផលិតឥដ្ឋនៅកម្ពុជា ។
គិតត្រឹមថ្ងៃទី១៩ ខែវិច្ឆិកា ឆ្នាំ២០២៣ មានរោងចក្រតែ៦ប៉ុណ្ណោះ បានឆ្លើយតមទៅកាន់អង្គការលីកាដូ ក្នុងការស្នើឱ្យបញ្ឈប់ ទប់ស្កាត់ និងដោះស្រាយផលប៉ះពាល់អាក្រក់ ដែលបង្កឡើងដោយកាកសំណល់របស់ពួកគេ បន្ទាប់ពីអង្គការលីកាដូបានសរសេរលិខិតទៅក្រុមហ៊ុនមេចំនួន១៦ ដែលជាម្ចាស់ម៉ាកសម្លៀកបំពាក់ទាំងនេះ ឱ្យពួកគេទទួលបានព័ត៌មានអំពីការរកឃើញនៃផលប៉ះពាល់។ នេះបើតាមការឱ្យដឹងពីលីកាដូដដែល។
លោក ផៃ ប៊ុនឈឿន មន្ដ្រីនាំពាក្យនៃក្រសួងបរិស្ថានមិនទាន់ឆ្លើយតបសំណួរអ្នកសារព័ត៌មានវិទ្យុស្ដ្រីទេនៅព្រឹកនេះ ទាំងតាមទូរសព្ទ និងប្រព័ន្ធតេឡេក្រាម។
ផ្អែមតាមរបាយការណ៍ពីអង្គការលីកាដូ ក្នុងចំណោរោងចក្រទាំង៦ដែលឆ្លើយតប មានតែរោចក្រ២ប៉ុណ្ណោះ បានសន្យាថានឹងស៊ើបអង្កេត និងរោងចក្រ២ផ្សេងទៀតបានចាត់វិធានការផ្សេងៗ។
គួរជម្រាបថា ការដុតសំណល់កម្ទេចក្រណាត់ នាំឱ្យកម្មករសិប្បកម្មផលិតឥដ្ឋ និងកូនៗរបស់ពួកគេ ក៏ដូចជាសហគមន៍នៅក្បែរនោះប្រឈមនឹងផ្សែងប្រកបដោយគ្រោះថ្នាក់ និងផលប៉ះពាល់អវិជ្ជមានដល់សុខភាព និងបរិស្ថាន ។ ក្រៅពីបញ្ហានេះ លីកាដូបានរកឃើញបញ្ហាមួយទៀតនៅក្នុងសិប្បកម្មផលិតឡឥដ្ឋ គឺកម្មករឡឥដ្ឋ បញ្ចាំខ្លួនដោះបំណុល បានរងផលប៉ះពាល់ផ្ទាល់ពីផ្សែង ដែលឆេះដោយការដុតកម្ទេចកំណាត់ចេញពីរោងចក្រ។ កម្មករដែលត្រូវបានសម្ភាសដោយអង្គការលីកាដូ បានប្រាប់ឱ្យដឹងថា បានជួបប្រទះបញ្ហាប្រព័ន្ធដកដង្ហើម ការឈឺក្បាល និងអារម្មណ៍ថាកើតមានជំងឺច្រើន ខណៈដែលមានផ្ទៃពោះ៕
