ដូចការគ្រោងទុកគណបក្សប្រជាជនកម្ពុជា ដែលជាគណបក្សកាន់អំណាច បានចុះហត្ថលេខាលើកិច្ចព្រមព្រៀងចងសម្ព័ន្ធភាពជាមួយបណ្ដាគណបក្សនយោបាយក្រៅរដ្ឋាភិបាលចំនួន២៧ផ្សេងទៀតជាផ្លូវការ នៅព្រឹកថ្ងៃទី២៥ ខែតុលា ឆ្នាំ២០២៣។ លោក គីម ចាន់ចាវ រាយការណ៍
ការចុះហត្ថលេខាសម្ព័ន្ធភាពគណបក្សនយោបាយនេះ មានការចូលរួមពីថ្នាក់ដឹកនាំគណបក្សប្រជាជនកម្ពុជាចំនួន៥រូប និងតំណាងគណបក្សនយោបាយចំនួន២៧ផ្សេងទៀត ដែលធ្វើឡើងនៅទីស្នាក់ការកណ្ដាលគណបក្សប្រជាជនកម្ពុជា រាជធានីភ្នំពេញ។
គណបក្សទាំង២៨រួមមាន គណបក្សប្រជាជនកម្ពុជា គណបក្សខ្មែររួបរួមជាតិ គណបក្សពន្លឺថ្មី គណបក្សសញ្ជាតិកម្ពុជា គណបក្សខ្មែរក្រោក គណបក្សសំបុកឃ្មុំសង្គមប្រជាធិបតេយ្យ គណបក្សរស្មីខេមរា គណបក្សខ្មែរសាធារណរដ្ឋ គណបក្សខ្មែរអភិវឌ្ឍន៍សេដ្ឋកិច្ច គណបក្សយុវជនកម្ពុជា គណបក្សធម្មាធិបតេយ្យ គណបក្សជនជាតិដើមប្រជាធិបតេយ្យកម្ពុជា គណបក្សខ្មែរតែមួយ គណបក្សឯកភាពជាតិខ្មែរ គណបក្សកម្លាំងប្រជាធិបតេយ្យ គណបក្សកសិករ គណបក្សស្ត្រីដើម្បីស្ត្រី គណបក្សបំណងពលរដ្ឋ គណបក្សខ្មែរអភិរក្ស គណបក្សមហាសាមគ្គីជាតិខ្មែរ គណបក្សនគរប្រជាធិបតេយ្យ គណបក្សអំណាចប្រជាពលរដ្ឋ គណបក្សខ្មែរអង្គរ គណបក្សកម្ពុជាសេរីឯករាជ្យប្រជាធិបតេយ្យ គណបក្សម៉ូលីណាកា គណបក្សចលនាប្រជាធិបតេយ្យ គណបក្សអភិវឌ្ឍន៍កម្ពុជា និង គណបក្សមហានគរ។
ទិដ្ឋភាពពិធីចុះហត្ថលេខាសម្ព័ន្ធភាពគណបក្សនយោបាយនេះទាំង២៨ (រូបភាពពីហ្វេសប៊ុកស)
បើតាមកិច្ចព្រមព្រៀងចងសម្ព័ន្ធភាពរវាងគណបក្សទាំង២៨ ចំណងសម្ព័ន្ធភាពនេះ ធ្វើឡើង ដើម្បីជំរុញការអនុវត្តនយោបាយបង្រួបបង្រួមជាតិឱ្យកាន់តែរឹងមាំ ដើម្បីប្រមូលផ្ដុំកម្លាំងស្នេហាជាតិ ចូលរួមថែរក្សាសន្តិភាព ស្ថិរភាពនយោបាយ សម្ដៅធានាឱ្យភាពសុខសាន្ត និងការអភិវឌ្ឍប្រទេសរយៈពេលយូរអង្វែង។
ក្នុងពិធីចុះហត្ថលេខាលើកិច្ចព្រមព្រៀងសម្ព័ន្ធភាពនេះដែរ សម្ដេច ហ៊ុន សែន ក្នុងនាមប្រធានគណបក្សប្រជាជនកម្ពុជា បកស្រាយថា ចំណងសម្ព័ន្ធនេះគណបក្សប្រជាជនកម្ពុជា មិនចាត់ទុកគណបក្សទាំង២៧ផ្សេងទៀត ជាគណបក្សចំណុះឱ្យគណបក្សប្រជាជនកម្ពុជានោះទេ ហើយគណបក្សទាំងអស់ក៏មិនស្ថិតក្រោមការគ្រប់គ្រងរបស់គណបក្សណាមួយឡើយ។
សម្តេច ហ៊ុន សែន ប្រធានគណបក្សប្រជាជនកម្ពុជា ក្នុងពិធីចុះហត្ថលេខាសម្ព័ន្ធភាពគណបក្សនយោបាយ(រូបភាពពីហ្វេសប៊ុកស)
ការណ៍ដែលបណ្ដាគណបក្សមួយចំនួននាំគ្នាចងសម្ព័ន្ធជាមួយគណបក្សកាន់អំណាចនេះ ធ្វើឡើង២សប្តាហ៍ក្រោយពេលដែល គណបក្សក្រៅរដ្ឋាភិបាលចំនួន៤ដែលមាននិន្នាការប្រជែងជាមួយគណបក្សកាន់អំណាចបានចងសម្ព័ន្ធភាពនឹងគ្នាដែលពួកគេហៅថា «សម្ព័ន្ធភាពឆ្ពោះ ទៅអនាគត» ។ គណបក្សចំនួន៤នោះ រួមមាន គណបក្សភ្លើងទៀន តំណាងដោយលោក សុក ហាច គណបក្សឆន្ទៈខ្មែរ តំណាងដោយលោក ផល ស៊ីថន គណបក្សប្រជាធិបតេយ្យមូលដ្ឋាន តំណាងដោយលោក យ៉េង វីរៈ និងគណបក្សកែទម្រង់កម្ពុជា របស់លោកប៉ុល ហំម។ តំណាងគណបក្សទាំង៤អះអាងថា មានតែការបង្រួបបង្រួមកម្លាំងនយោបាយប្រជាធិបតេយ្យពិតប្រាកដ ទើបអាចជាចលករមួយក្នុងការចូលរួមពង្រឹង និងលើកស្ទួយប្រកបដោយប្រសិទ្ធភាពនូវការគោរពសិទ្ធិមនុស្ស សិទ្ធិសេរីភាព និងរបបប្រជាធិបតេយ្យ សេរីពហុបក្ស ស្របតាមរដ្ឋធម្មនុញ្ញ និងច្បាប់ជាធរមាននានានៃព្រះរាជាណាចក្រកម្ពុជា។
លោក សុខ ហាច តំណាងគណបក្សភ្លើងទៀន ក្នុងសន្និសីទកាសែត ប្រកាស «សម្ព័ន្ធភាពឆ្ពោះទៅអនាគត»
ទន្ទឹមនឹងសម្ព័ន្ធភាព លោក សុក ហាច តំណាងឱ្យគណបក្សភ្លើងទៀន បានអំពាវនាវដល់អ្នកកាន់អំណាចផ្ដល់លទ្ធភាពដល់ក្រុមគណបក្សខ្លួនមានទីតាំងសម្រាប់ប្រជែងការបោះឆ្នោតផងដែរ ខណៈគណបក្សបក្សប្រឆាំងមួយនេះមិនត្រូវបានអនុញ្ញាតឱ្យចូលរួមបោះឆ្នោតថ្នាក់ជាតិអាណត្តិទី៧ថ្មីៗនេះឡើយ ដោយគ.ជ.ប អះអាងថាគណបក្សនេះមិនមានច្បាប់ដើមនៃការចុះបញ្ជីគណបក្សនយោបាយ៕
