កាលពីពេលថ្មីៗនេះ ក្រុមហ៊ុន FWD Cambodia បានរៀបចំព្រឹត្តិការណ៍គាំទ្រសហគមន៍មួយនៅខេត្តកំពតតាមរយៈការដាំដើមកោងកាងចំនួន ១ ០០០ ដើម និងការបិតបដាពាក្យស្លោកស្ដីពីការថែរក្សាបរិស្ថានធម្មជាតិនៅក្នុងសហគមន៍នេសាទត្រពាំងសង្កែ ក្នុងខេត្តកំពត ដែលកម្មវិធីនេះទទួលបានការចូលរួមពីគណៈគ្រប់គ្រង និងក្រុមការងារទាំងអស់របស់ក្រុមហ៊ុន។ កម្មវិធីនេះត្រូវបានធ្វើឡើងដើម្បីអបអរខួប ១០ ឆ្នាំរបស់ក្រុមហ៊ុន FWD ក្នុងតំបន់អាស៊ី និងអបអរខួប ២ ឆ្នាំរបស់ក្រុមហ៊ុនក្នុងប្រទេសកម្ពុជា ជាពិសេសដើម្បីផ្សាភ្ជាប់ទំនាក់ទំនងរវាងក្រុមការងារទាំងអស់ទៅនឹងសហគមន៍កម្ពុជា។ ក្រុមហ៊ុន FWD Cambodia ក៏បានភ្ជាប់សកម្មភាពនេះទៅនឹងអតិថិជនរបស់ខ្លួនផងដែរ ដោយក្រុមហ៊ុនបានបរិច្ចាគដើមកោងកាងមួយដើមសម្រាប់រាល់ការទិញគម្រោងធានារ៉ាប់រងអាយុជីវិតណាមួយចាប់ពីថ្ងៃទី ០១ ដល់ថ្ងៃទី ២០ ខែកញ្ញា។
លោក ជីម គង់ហ៊ុយ អគ្គនាយកក្រុមហ៊ុន FWD Cambodia មានប្រសាសន៍ថា៖ «ក្រុមហ៊ុន FWD មានការប្ដេជ្ញាចិត្តខ្ពស់ក្នុងការគាំទ្រឲ្យសហគមន៍កម្ពុជារស់នៅដោយភាពរីករាយ ហើយសកម្មភាពដែលយើងបានធ្វើរួមគ្នាជាមួយសហគមន៍នេសាទត្រពាំងសង្កែដើរស្របគ្នាយ៉ាងល្អទៅនឹងការប្ដេជ្ញាចិត្តនេះ ព្រោះដើមកោងកាងទាំងនេះនឹងក្លាយទៅជាព្រៃកោងកាងនៅថ្ងៃមុខដែលនឹងផ្ដល់ជាជម្រកដល់សត្វសមុទ្រ ព្រមទាំងផ្ដល់នូវគុណតម្លៃជាច្រើនដទៃដល់បរិស្ថានជុំវិញសហគមន៍ទាំងផងដែរ។» លោក គង់ហ៊ុយ បានបន្តថា៖ «ខ្ញុំសូមថ្លែងអំណរគុណដល់អតិថិជនទាំងអស់ដែលបានផ្ដល់ទំនុកចិត្តដល់ក្រុមហ៊ុន FWD Cambodia ជាពិសេសសម្រាប់ការរួមចំណែកក្នុងកិច្ចការសហគមន៍នេះតាមរយៈការប្រើប្រាស់សេវាកម្មធានារ៉ាប់រងអាយុជីវិតរបស់យើងខ្ញុំ ហើយខ្ញុំក៏សូមអរគុណផងដែរដល់ក្រុមការងាររបស់យើងទាំងអស់ដែលបានចូលរួមយ៉ាងសកម្មក្នុងកិច្ចការប្រកបដោយអត្ថន័យមួយនេះ។»
គួរបញ្ជាក់ផងដែរថា កម្មវិធីដាំដើមកោងកាងនេះក៏ជាផ្នែកសំខាន់មួយនៃសកម្មភាពគាំទ្រសហគមន៍ (Community Care) របស់ក្រុមហ៊ុន FWD Cambodia ផងដែរដែលគម្រោង Community Care ទាំងមូលផ្តោតលើការគាំទ្រចំណុចអាទិភាពបួនរួមមាន ចំណេះដឹងហិរញ្ញវត្ថុ សុខភាព ការអប់រំតាមបែបឌីជីថល និងបរិស្ថាន។ កន្លងមកក្រុមហ៊ុនបានចូលរួមក្នុងសកម្មភាពសង្គមនានាជាច្រើនក្នុងប្រទេសកម្ពុជាដែលរួមមានការបរិច្ចាគបង្គោល និងអំពូលភ្លើងសូឡា ការឧបត្ថម្ភដល់កម្មវិធីរត់ប្រណាំង កម្មវិធីកម្សាន្ត និងអប់រំសម្រាប់កុមារ E-Gen Kid កម្មវិធីវិទ្យុ តស់! សន្សំ និងសកម្មភាពជាច្រើនផ្សេងទៀតដើម្បីជួយឲ្យសហគមន៍កម្ពុជារស់នៅដោយភាពរីករាយ៕