ភ្នំពេញ៖ គណៈកម្មាធិការអចិន្ត្រៃយ៍នៃគណបក្សសង្គ្រោះជាតិ នៅថ្ងៃសុក្រស្អែកនេះ នឹងបើកកិច្ចប្រជុំដើម្បីចេញសេចក្ដីសម្រេចមួយ ខណៈថ្នាក់ដឹកនាំគណបក្សនេះ បានទៅជួបប្រជុំជាមួយលោក សម រង្ស៊ី នៅប្រ ទេសហ្វីលីពីន។ នេះបើតាមសេចក្ដីប្រកាសព័ត៌មានរបស់ប្រឆាំងនេះ។
តាមសេចក្តីប្រកាសព័ត៌មានចេញផ្សាយនៅថ្ងៃព្រហស្បតិ៍នេះ គណបក្សសង្គ្រោះជាតិបានឲ្យដឹងថា នៅថ្ងៃទី៣០ ខែមិថុនានេះលោក សម រង្ស៊ី បានដឹកនាំកិច្ចពិភាក្សាមួយ ដោយផ្តោតសំខាន់ទៅលើការវិភាគនិងវាយតម្លៃស្ថានភាពនយោបាយបច្ចុប្បន្ន និងផែនការយុទ្ធសាស្ត្រ សកម្មភាពកន្លងមកនឹងទៅថ្ងៃខាងមុខ។
បើតាមតាមសេចក្តីប្រកាសព័ត៌មានលោក សម រង្ស៊ី ក៏បានលើកឡើងអំពីលទ្ធផលនៃបេសកកម្មរបស់លោកជាមួយសហគមន៍ខ្មែរ និងសកម្មជនបក្ស ព្រមទាំងនយោបាយការទូតរបស់បក្សជាមួយសហគមន៍អន្តរជាតិ។
តំណាងរាស្ត្រគណបក្សសង្គ្រោះជាតិលោក អេង ឆៃអ៊ាង បានសរសេរនៅលើហ្វេសប៊ុករបស់លោកថា គណៈប្រតិភូជាន់ខ្ពស់របស់គណបក្សបានជួបប្រជុំពិសេសជាមួយលោកប្រធាន សម រង្ស៊ី នៅព្រឹកថ្ងៃព្រហ ស្បតិ៍នេះ ដើម្បីពិភាក្សាស្ថានការណ៍នយោបាយនៅកម្ពុជាបច្ចុប្បន្ន និងផែនការសកម្មភាពដែលគណបក្សត្រូវអនុវត្តនាថ្ងៃខាងមុខ។
ក្នុងបទសម្ភាសន៍មួយជាមួយទីភ្នាក់ងារសារព័ត៌មាន Reuters មេបក្សប្រឆាំងនិរទេសខ្លួន គឺលោក សម រង្ស៊ី បានអះអាងថា លោកពិតជាវិលត្រឡប់ចូលប្រទេសវិញជាមួយនឹងការយល់ព្រមពីសម្ដេចនាយករដ្ឋមន្ត្រី គឺប្រហែលនៅខែឧសភា ឆ្នាំ២០១៧ ។
លោកថា វត្តមានរបស់លោកសំខាន់ណាស់ដើម្បីបញ្ជាក់ថា ការបោះឆ្នោតមានភាពសេរី និងត្រឹមត្រូវ ហើយ បើពុំនោះទេសហគមន៍អន្តរជាតិនឹងមិនទទួលស្គាល់លទ្ធផលបោះឆ្នោតនោះទេ បើលោកមិនអាចចូលប្រទេសវិញបាននោះ៕
