ភ្នំពេញ៖ តាមការសិក្សាមួយរបស់សាកលវិទ្យាល័យជាតិមានជ័យ ចុះផ្សាយកាលពីថ្ងៃទី០៨ ខែកុម្ភៈ ឆ្នាំ២០២៣ បង្ហាញថា តំលៃបារីជាមធ្យមមិនមានការប្រែប្រួលច្រើននោះទេក្នុងរយៈពេល ៧ឆ្នាំ កន្លងមកនេះ ខណៈតំលៃទំនិញមួយចំនួនធំបានឡើងថ្លៃជាលំដាប់ពីមួយឆ្នាំទៅ១ឆ្នាំ។ នេះបណ្តាលមកពីកម្ពុជាខកខានមិនបានដំឡើងពន្ធថ្នាំជក់រយៈពេល ៧ ឆ្នាំមកហើយ បើទោះបីកម្ពុជាជារដ្ឋភាគីនៃអនុសញ្ញាស្តីពីការត្រួតពិនិត្យថ្នាំជក់ក៏ដោយ។ កត្តានេះ ធ្វើអោយកម្ពុជាស្ថិតក្នុងចំណោមប្រទេសដែលមានពន្ធលើថ្នាំជក់តិចជាងគេ នៅតំបន់អាស៊ាន។
អង្គការសុខភាពពិភពលោក តម្រូវឱ្យរដ្ឋជាភាគី ដំឡើងពន្ធថ្នាំជក់ ឱ្យបានទៀងទាត់ និងជាប្រចាំ ដើម្បីឱ្យអត្រាពន្ធថ្នាំជក់ឡើងដល់ ៧៥% នៃតំលៃលក់រាយ។ ប៉ុន្តែ កម្ពុជាមានអត្រាពន្ធលើថ្នាំជក់តែ២៥%នៃតំលៃលក់រាយចំពោះបារីផលិតផលក្នុងស្រុក និង៣១%ចំពោះបារីនាំចូល ខណៈបណ្តាប្រទេសផ្សេងទៀតក្នុងតំបន់ មានអត្រាពន្ធថ្នាំជក់ខ្ពស់រហូតដល់ ៧៥% ឬប្រហាក់ប្រហែល។
អង្គការសុខភាពពិភពលោកបញ្ជាក់ច្បាស់ថា ការដំឡើងពន្ធថ្នាំជក់នឹងធ្វើឱ្យរដ្ឋាភិបាលទទួលបានចំណូលពន្ធយ៉ាងច្រើន និងកាត់បន្ថយចំនួអ្នកស្លាប់ ឈឺ និងពិការ ដោយសារថ្នាំជក់។ ស្របគ្នានេះ សម្ព័ន្ធត្រួតពិនិត្យថ្នាំជក់អាស៊ីអាគ្នេយ៍ បានបង្ហាញលទ្ធផលនៃការវិភាគមួយដោយបញ្ជាក់ថា ដោយសារខកខានមិនបានដំឡើងពន្ធថ្នាំជក់ តាមផែនទីបង្ហាញផ្លូវរបស់អង្គការសុខភាពពិភពលោកឆ្នាំ២០១៨ កម្ពុជាខាតបង់ចំណូលពន្ធប្រមាណ ១៣០លានដុល្លាអាមេរិក ស្មើនឹង ០,៥%នៃ GDP របស់ កម្ពុជា នៅឆ្នាំ២០២០។
តាមការសិក្សាមួយទៀតរបស់សាកលវិទ្យាជាតិមានជ័យ ដែលបានចុះផ្សាយកាលពីឆ្នាំ២០២១ បានបង្ហាញថា ប្រជាពលរដ្ឋកម្ពុជាច្រើនលើសលប់របស់ដល់ ៩៤% ចង់ឱ្យរាជរដ្ឋាភិបាលកម្ពុជា ដំឡើងពន្ធថ្នាំជក់ឱ្យបានខ្ពស់ដូចប្រទេសជិតខាងយើងដែរ។ ប៉ុន្តែឧស្សាហកម្មថ្នាំជក់ និងអ្នកពាក់ព័ន្ធនឹងផលប្រយោជន៍នៃជំនួញថ្នាំជក់ តែងតែរិះរកគ្រប់មធ្យោបាយដើម្បីរារាំងការដំឡើងពន្ធថ្នាំជក់ ដោយលើកជាមតិបំភាន់ខុសពីការពិតថា ការដំឡើងពន្ធថ្នាំជក់ នឹងនាំឱ្យរដ្ឋខាត់បង់ចំណូលពន្ធ ឬនាំឱ្យមានការគេចពន្ធបារីជាដើម។នេះបើតាមការបោះពុម្ភផ្សាយរបស់អង្គការសុខភាពពិភពលោក។
ការសិក្សាខាងលើបានបង្ហាញពីលទ្ធផលនៃការអង្កេតឆ្នាំ ២០២២ ដោយរកឃើញថា តម្លៃបារីក្នុងស្រុកជាមធ្យមត្រឹមតែ១៥០០រៀលក្នុងមួយកញ្ចប់តែប៉ុណ្ណោះ។ រីឯបារីនាំចូលមានតម្លៃជាមធ្យម៤០០០រៀលក្នុងមួយកញ្ចប់។ការសិក្សានេះចង្អុលចំៗថា តម្លៃបារីទាំងក្នុងស្រុកនិងបារីនាំចូលមិនបានកើនតម្លៃច្រើននោះទេក្នុងរយៈ៧ឆ្នាំចុងក្រោយនេះ។
ជាអនុសាសន៍ក្នុងរបាយការណ៍សិក្សារបស់សាកលវិទ្យាល័យជាតិមានជ័យ បានស្នើឱ្យរាជរដ្ឋាភិបាលគួរដំឡើងពន្ធបារីជាប្រចាំ ឱ្យស្របទៅតាមអនុសញ្ញាស្តីពីការត្រូតពិនិត្យថ្នាំជក់ និងឱ្យបានប្រដំប្រសងជាមួយប្រទេសជិតខាង។
សម្រាប់ការសិក្សាខាងយល់ឃើញថា ការដំឡើងតម្លៃបារីពិតជាមានសារៈសំខាន់ណាស់ ត្បិតការដំឡើងថ្លៃបារីនិងពន្ធថ្នាំជក់បានជួយកាត់បន្ថយនូវអត្រាអ្នកជក់ ពិសេសអ្នកជក់បារីជាយុវជន។
គួរបញ្ជាក់ថា ជារៀងរាល់ឆ្នាំការជក់បារីបណ្តាលឱ្យប្រជាពលរដ្ឋកម្ពុជា ១៥ ០០០នាក់ស្លាប់ ដោយសារជំងឺនាំមុខទាំង៥ រួមមាន ជំងឺដាច់សរសៃឈាមខួរក្បាល ជំងឺស្ទះសរសៃឈាមបេះដូង ជំងឺឆ្លងផ្លូវដង្ហើមផ្នែកខាងក្រោម ជំងឺត្បៀតទងសួតរ៉ាំរ៉ៃ និងជំងឺមហារីកសួត ទងសួតនិងបំពង់ខ្យល់៕
