អង្គការលីកាដូបានលុបចោលបទចម្រៀងឈាមបាតុករពីបណ្ដាញសង្គមរបស់ខ្លួន ក្រោយពេលជួបជាមួយអាជ្ញាធរ ដោយបង្ហាញការសោកស្ដាយយ៉ាងខ្លាំងចំពោះការលុបបទច្រៀងនេះ ហើយហៅការចាត់វិធានការ លុបចម្រៀងនេះរបស់អាជ្ញាធរថាជាការរឹតត្បិតសេរីភាពក្នុងការបញ្ចេញមតិ។
លោក ឡាក់ ច័ន្ទតារា ជូននូវសេចក្ដីរាយការណ៍៖
អង្គការសង្គមស៊ីវិល លីការដូ ធ្វើការលើរឿងសិទ្ធិមនុស្ស បានសម្រេចលុចចោលបទចម្រៀង ឈាមបាតុករ របស់តារាចម្រៀងរ៉េប គា សុគន្ធ ក្រោយមន្ត្រីនគរបាលនៃស្នងការដ្ឋាននគរបាលរាជធានីភ្នំពេញបានចេញលិខិតកោះហៅជួបផ្ទាល់កាលពីថ្ងៃទី៩ ខែមករា ឆ្នាំ២០២៣។
ប្រសិនបើអង្គការ លីកាដូ មិនយល់ព្រមលុបវីដេអូចម្រៀងដែលមានចំណងជើងថា “ឈាមបាតុករ” ពីបណ្តាញសង្គម និងគេហទំព័ររបស់អង្គការនោះទេ នោះអាជ្ញាធរនឹងមានវិធានការផ្លូវច្បាប់បន្ត។ នេះបើតាមការបញ្ជាក់ពីអង្គការ លីកាដូ នៅថ្ងៃទី១០ ខែមករា ឆ្នាំ២០២៣ ជាថ្ងៃដែលសង្គមស៊ីវិលនេះ សម្រេចលុបចោលវីដេអូចម្រៀងចេញពីបណ្ដាញផ្សព្វផ្សាយរបស់ខ្លួនផងដែរ។
អង្គការ លីកាដូ នៅអះអាងយ៉ាងមុតមាំថា វីដេអូចម្រៀង ឈាមបាតុករ មិនមែនជាបទល្មើសញុះញង់នោះទេ ហើយផ្ទុយទៅវិញការចេញផ្សាយវីដេអូ គឺជាសេរីភាពក្នុងការបញ្ចេញមតិដែលត្រូវបានការពារដោយច្បាប់រដ្ឋធម្មនុញ្ញ ។ តែយ៉ាងណា ដើម្បីជៀសវាងពីការទទួលរងនូវវិធានការផ្លូវច្បាប់បន្ត អង្គការលីកាដូ សម្រេចចិត្តលុបវីដេអូចម្រៀងចេញពីបណ្តាញសង្គមតែម្ដង។
គួររម្លឹកថា ការកោះហៅមេដឹកនាំងសង្គមស៊ីវិលនេះ មិនមែនតែអង្គការលីកាដូ លោក អំ សំអាតទេ មានមេដឹកនាំសង្គមស៊ីវិលនៃអង្គការសង់ត្រាល់ លោក មឿន តុលា ប្រធានសេដ្ឋកិច្ចក្រៅប្រព័ន្ធ លោក វន់ ពៅ និងលោក ថេង សាវឿន ប្រធានអង្គការសម្ព័ន្ធសហគមន៍កសិករកម្ពុជា។ ការកោះហៅពីស្នងការដ្ឋាននគរបាលរាជធានីភ្នំពេញនេះដែរ ក្រោយលិខិតមួយចេញពីក្រសួងវប្បធម៌ របស់លោកស្រី ភឿង សកុណា ផ្ញើជូនទៅកាន់លោក នេត សាវឿន អគ្គស្នងការនគរបាលជាតិ ស្នើឱ្យចាត់វិធានការលើបទចម្រៀងឈាមបាតុករ ដែលក្រសួងវប្បធម៌ចាត់ទុកថា មានការញុះញង់ និងអាចបង្កអសន្ដិសុខសណ្ដាប់ធ្នាប់សង្គម។
យ៉ាងណា អង្គការលីកាដូបង្ហាញការសោកស្ដាយយ៉ាងខ្លាំងចំពោះការលុបបទច្រៀងនេះ ហើយហៅការចាត់វិធានការបន្ដបើមិនលុបចម្រៀងនេះ ជាការរឹតត្បិតសេរីភាពក្នុងការបញ្ចេញមតិ។
លីកាដូវថា វាគឺជាលើកទីមួយហើយក្នុងរយៈពេល ៣០ឆ្នាំ នៃការធ្វើការងារសិទិ្ធមនុស្សរបស់ អង្គការ លីកាដូ ដែលអាជ្ញាធររដ្ឋបានចាត់វិធានការផ្លូវច្បាប់តាមសំណើសុំរបស់ក្រសួងវប្បធម៌ និងវិចិត្រសិល្បៈ ទាក់ទងនឹងការបង្ហោះរបស់អង្គការ លីកាដូ លើគេហទំព័រ និងបណ្តាញសង្គមរបស់ស្ថាប័ន ។
ទោះបីជាអាជ្ញាធរបានកោះហៅយ៉ាងណា អង្គការលីកាដូ នៅតែបង្ហាញជំហខ្លួនលើបណ្ដាញសង្គមថានៅតែបន្តឈរជាសាមគ្គីភាពជាមួយជនរងគ្រោះពីព្រឹត្តិការណ៍ហិង្សាលើផ្លូវវេងស្រេង ។ មកដល់ថ្ងៃនេះ អាជ្ញាធរមិនទាន់រកឃើញជនណាម្នាក់ ដែលជាអ្នកទទួលខុសត្រូវលើការស្លាប់របស់កម្មករចំនួន ៤នាក់ គឺ លោក គឹម ផាលាប លោក សាម រ៉ាវី លោក យាន រឹទ្ធី និងលោកផេង កុសល និងការបាត់ខ្លួនរបស់កុមារ ខឹម សាផាត នៅឡើយ ។
កាលពីថ្ងៃទី៣ ខែមករា ស្ដ្រីម្នាក់ដែលជាម្ដាយរបស់ជនរងគ្រោះឈ្មោះ ផេង កុសល បានយំសោកតាមរយៈការផ្សាយផ្ទាល់ពីអង្គការសង់ត្រាល់ថា លោកស្រីនៅតែចូលរួមជាមួយសង្គមស៊ីវិលដើម្បីរកយុត្តិធម៌ដល់កូនប្រុសរបស់លោកស្រី បើសិនលោកស្រីនៅមានជីវិតរស់នៅ។
ស្របពេលនៃការលុបចម្រៀងដែលក្រសួងវប្បធម៌ថា មានការញុះញង់ អង្គការ លីកាដូ បានបន្តអំពាវនាវដល់អាជ្ញាធរ សូមឱ្យមាននូវការស៊ើបអង្កេតដោយឯករាជ្យទៅលើអំពើហិង្សា ការស្លាប់ និងការបាត់ខ្លួន ដែលបានកើតឡើងកាលពីថ្ងៃទី៣ ខែមករា ឆ្នាំ២០១៤ ទប់ស្កាត់កុំឱ្យកើតមាននូវអំពើហិង្សាដ៏អាក្រក់ដូចនេះបន្តទៀត និងបន្តប្រារព្ធខួបនៃអំពើហិង្សានៅលើផ្លូវវេងស្រេងនៅឆ្នាំក្រោយៗទៀត ។ បន្ថែមពីនេះ អង្គការ លីកាដូ ក៏អំពាវនាវដល់អាជ្ញាធររដ្ឋគោរពនូវសេរីភាពក្នុងការបញ្ចេញមតិរបស់ប្រជាពលរដ្ឋ ដែលរួមទាំងសកម្មជន សិល្បករ សិល្បការិនី និងបុគ្គលិកអង្គការ សង្គមស៊ីវិលទាំងឡាយ ៕
