loader

សហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍៖ កូដកម្មបញ្ចប់ទៅបានដរាបណាពួកគេទាំងអស់គ្នាទទួលបាននូវដំណោះស្រាយ និងភាពយុត្តិធម៌ដ៏សមស្រប

ក្នុងឱកាសខួបមួយឆ្នាំដែលបុគ្គលិកនៃក្រុមហ៊ុនណាហ្គាវើលដ៍បានចេញមកធ្វើកូដកម្មការពារសិទ្ធិការងារ សហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនកាស៊ីណូដ៍ធំមួយនេះ ចេញសេចក្ដីថ្លែងការណ៍បង្ហាញពីការវិវឌ្ឍន៍នៃស្ថានភាពកូដករ និងទាមទារ ឱ្យដោះលែង កញ្ញា ឈឹម ស៊ីថរ ដោយទម្លាក់ចោលរាល់បទចោទលើ កញ្ញា ឈឹម ស៊ីថរ រួមទាំងតំណាងសហជីព និង សមាជិកសហជីពផ្សេងទៀត ព្រមទាំងដោះស្រាយបញ្ចប់វិវាទការងារនេះដោយយុត្តិធម៌។ លោក​ គីម ចាន់ចាវ រាយការណ៍​

 

គិតមកដល់ថ្ងៃនេះគឺថ្ងៃគម្រប់ខួប១ឆ្នាំហើយដែលបុគ្គលិកនៃក្រុមហ៊ុនណាហ្គាវើលដ៍បានចេញមកធ្វើកូដកម្ម ចាប់តាំងពីថ្ងៃទី១៨ ខែធ្នូ ឆ្នាំ២០២១ ដល់ ថ្ងៃទី១៨ ខែធ្នូ ឆ្នាំ២០២២ ដើម្បីទាមទាររកយុត្តិធម៌ ការពារសិទ្ធិការងារ ព្រមទាំងការពារសំឡេងសហជីពឯករាជ្យ(LRSU)។ បើតាមសេចក្ដីថ្លែងការណ៍ របស់សហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុន​ណាហ្គាវើលដ៍ថា សហជីពត្រូវបានក្រុមហ៊ុនណាហ្គាវើលដ៏រើសអើង ព្យាយាមរំលាយចោលជាមួយចេតនាអាក្រក់របស់ខ្លួន ដែលក្រុមហ៊ុនបរទេសមួយនេះកំពុងរំលោភសិទ្ធិការងារ និងច្បាប់ការងារនៃប្រទេសកម្ពុជាម្ដងហើយម្ដងទៀត។

 

សេចក្ដីថ្លែងការដដែលបញ្ជាក់ថា រយៈពេលមួយឆ្នាំមកនេះ វិវាទការងារមួយនេះនៅមិនទាន់ដោះស្រាយបាននៅឡើយទេ សូម្បីតែមួយចំណុច ហើយក្នុងកំឡុងពេលនៃការធ្វើកូដកម្ម ក្រុមកូដករដែលភាគច្រើនសុទ្ធសឹងតែជាស្ត្រីត្រូវបានរងនូវអំពើហិង្សា និងការបៀតបៀនពីសំណាក់ កងកម្លាំងអាជ្ញាធរមានសមត្ថកិច្ចដែល ពួកគេអះអាងថា បានចូលមកកាងឱ្យក្រុមហ៊ុនបរទេសដែលរំលោភច្បាប់ការងារ សិទ្ធិការងារ សិទ្ធិសហជីព រួមទាំងសិទ្ធិរបស់បុគ្គលិកកម្មករក្រុមហ៊ុននេះ ដោយក្រុមកូដករបានរងរបួសស្នាមលើរាងកាយ ឈានដល់ការហូរឈាមលើផ្លូវថ្នល់កណ្ដាលទីក្រុង ព្រមទាំងធ្វើឱ្យកូដករដែលជាស្ត្រីម្នាក់ រលូតបាត់បង់កូននៅក្នុងផ្ទៃទៀតផង។ មិនត្រឹមតែប៉ុណ្ណោះ តំណាងសហជីព និងសកម្មជនសហជីពចំនួន១១នាក់ ត្រូវបានតុលាការចោទប្រកាន់ដោយគ្មានមូលដ្ឋានច្បាប់រឹងមាំ ព្រមទាំងចាប់ដាក់ពន្ធនាគារទាំងអយុត្តិធម៌ទៀតផង ហើយនៅមានសកម្មជន និងសមាជិក១៣នាក់ផ្សេងទៀតដែលសុទ្ធសឹងជាស្ត្រីក៏ត្រូវបានតុលាការចោទប្រកាន់ ដោយគ្មានមូលដ្ឋានច្បាប់រឹងមាំដូចគ្នា។ រហូតមកដល់ថ្ងៃទី២៦ ខែវិច្ឆិការ ឆ្នាំ២០២២ វេលាម៉ោង១១ព្រឹក ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ត្រូវបានសមត្ថកិច្ចអន្តោប្រវេសន៍ឃាត់ខ្លួនកញ្ញាភ្លាមៗក្រោមបទចោទ រំលោភលើលក្ខខណ្ឌ​​​នៃការនៅក្រៅឃុំ ដោយល្មើសបម្រាម បន្ទាប់ពីកញ្ញាវិលត្រឡប់ពីកិច្ចប្រជុំសហជីពអន្តរជាតិនៅប្រទេសអូស្ត្រាលីវិញ«ខណៈពេលដែលសមីខ្លួន ព្រមទាំងមេធាវី មិនដែលបានទទួលបម្រាបពីតុលាការម្ដងណាឡើយ» ហើយ​​នៅវេលាម៉ោង៣:៣០នាទី រសៀល កញ្ញា ឈឹម ស៊ីថរ ត្រូវបានបញ្ជូនខ្លួនទៅ មណ្ឌលអប់រំកែប្រែទី២(ម២)។

 

សហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុន​ណាហ្គាវើលដ៍  បានអះអាងថា ពួកគេនៅតែបន្តធ្វើកូដកម្មរហូតដល់មានដំណោះស្រាយយោងតាមសេចក្ដីជូនដំណឹងកាលពីថ្ងៃទី២២ ខែវិច្ឆិកា ឆ្នាំ២០២២ ស្របតាមលក្ខខណ្ឌតម្រូវ ហើយកូដកម្មនេះបញ្ចប់ទៅបានដរាបណាពួកគេទាំងអស់គ្នាទទួលបាននូវដំណោះស្រាយ ភាពយុត្តិធម៌ដ៏សមស្រប រួមទាំងសិទ្ធិការងារ សិទ្ធិសហជីពពេញលេញរបស់ពួកគេ ដោយពួកគេអះអាងថាសិទ្ធិនោះ ក្នុងនាមជាមនុស្ស និងជាបុគ្គលិកកម្មករ មិនមែនជាទាសករសម័យថ្មី។

 

ទោះយ៉ាងណាលើបញ្ហានេះ កន្លងមកលោក ​ជិន ម៉ាលីន ​អ្នក​នាំពាក្យ​ក្រសួង​យុត្តិធម៌ ​តែងអះអាងថា អាជ្ញាធរតែង​អនុវត្ត​ទៅ​តាម​នីតិវិធី​ច្បាប់ ​ផ្លូវ​ច្បាប់​របស់​កម្ពុជា​ដែល​មាន​ជា​ធរមាន​ ហើយការអនុវត្តនោះទៀតសោទគឺ​ មិន​មែន​ជា​ការ​រំលោភ​បំពាន​សិទ្ធិ​ឬ​ក៏​ធ្វើ​ទុក្ខ​បុក​ម្នេញ​នោះ​ទេ ប៉ុន្តែវាជា​វិធាន​ការ​ច្បាប់​ទូទៅ​ នៅ​ក្នុង​សង្គម​ប្រជា​ធិបតេយ្យ​នីតិ​រដ្ឋ

 

ទោះជាបែបនេះក្ដី ក្រុមកូដករនៅតែទទូចឱ្យ ដោះលែង កញ្ញា ឈឹម ស៊ីថរ ទម្លាក់ចោលរាល់បទចោទលើ កញ្ញា ឈឹម ស៊ីថរ រួមទាំងតំណាងសហជីព និង សមាជិកសហជីពផ្សេងទៀត ព្រមទាំងដោះស្រាយបញ្ចប់វិវាទការងារនេះដោយយុត្តិធម៌ និងត្រឹមត្រូវសម្រាប់កូដករ៕

0 0 votes
Article Rating
guest
0 Comments
Inline Feedbacks
View all comments

ព័ត៌មានទាក់ទង

អតីតបុគ្គលិកក្រុមហ៊ុនណាហ្គាវើលដ៍បង្ហោះប៉ោងប៉ោងមុខពន្ធនាគារព្រៃសជំរុញឱ្យមានការដោះលែងតំណាងខ្លួន

ភ្នំពេញ៖ ក្រុមអតីតបុគ្គលិកនៃក្រុមហ៊ុនណាហ្គាវើ[...]

មេធាវីកញ្ញា ឈឹម ស៊ីថរ ពិភាក្សាជាមួយតំណាងសហជីពនៅក្រៅឃុំស្វែងរកដំណោះស្រាយបន្ត

នៅព្រឹកថ្ងៃទី០៦ ធ្នូនេះ ក្រុមមេធាវីការពារក្ដី[...]

ស្រ្តីៗរស់នៅតំបន់ឧទ្យានអង្គរប្រាថ្នាចង់បានសំណងដោះដូរជាប្រាក់ជាងប្តូរទៅរស់នៅតំបន់ពាក់ស្នែង

ស្រ្តីៗរស់នៅតំបន់ឧទ្យានអង្គរប្រាថ្នាចង់បានសំណ[...]

ព័ត៏មានថ្មី

វីដេអូថ្មីបំផុត

0
Would love your thoughts, please comment.x
()
x