ភ្នំពេញ៖ មន្រ្តីនៃសមាគមអាដហុកនិងអ្នកឃ្លាំមើលសវនាការក្នុងបណ្តឹងសាទុក្ខរបស់មន្រ្តីអាដហុករំពឹងដោយជឿជាក់ថា តុលាការកំពូលនឹងទម្លាក់បទចោទលើមន្រ្តីអាដហុកទាំង ៥ រូបព្រោះពួកគេយល់ថា ការសម្រេចចោទប្រកាន់របស់តុលាការដំបូងនិងសាលាឧទ្ធរណ៍ គឺគ្មានសំអាងហេតុគ្រប់គ្រាន់។
(លោក កែវ សុខា រាយការណ៍ពីព័ត៌មាននេះ)
នៅព្រឹកថ្ងៃទី០៤ ខែវិច្ឆិកាឆ្នាំ២០២២នេះ ចៅក្រមតុលាការកំពូលបានបើកសវនាការតាមបណ្តឹងសាទុក្ខរបស់មេធាវីការពារក្តីជូនមន្រ្តី និងអតីតមន្រ្តីសមាគមអាដហុកចំនួន ៥នាក់ ក្នុងនោះមានលោក នី សុខា លោក នី ចរិយា លោកស្រី លឹម មុន្នី លោក យី សុខសាន្ត និងលោក ណៃ វ៉ងដា ដែលមិនសុខចិត្តការសម្រេចរបស់សាលាដំបូងរាជធានីភ្នំពេញ និងសាលាឧទ្ធរណ៍។
ចៅក្រមទាំង៥រូបនៃតុលាការកំពូល ដែលមានលោក និល នន់ ចៅក្រមដឹកនាំសវនាការលោកបានអនុញ្ញាតឱ្យមហាអយ្យការអមតុលាការកំពូលនិងសហមេធាវីការពារក្តីមន្រ្តីអាដហុកឡើងថ្លែងការពារឬជំទាស់សាលដីការបស់សាលាឧទ្ធរណ៍។
ក្នុងសាលសវនាការពេលនោះ មហាអយ្យការអមតុលាការកំពូល បានថ្លែងការពារសេចក្តីសម្រេចរបស់សាលាឧទ្ធរណ៍ ព្រោះមហាអយ្យការអមតុលាការកំពូលយល់ថា មន្រ្តីអាដហុកពិតជាបានប្រព្រឹត្តិរៀបចំការផ្តល់សំណូកដល់កញ្ញា ឃុម ចាន់តារាទីហៅស្រី មុំ មែនដោយសូមចៅក្រមតុលាការកំពូលតម្កល់សាលដីកាសាលាឧទ្ធរណ៍ទុកជាបានការ។
ប៉ុន្តែ សហមេធាវីដែលការពារក្តីជូនមន្រ្តីនិងអតីតមន្រ្តីអាដហុកវិញ បានលើកអំណះអំណាងមួយចំនួនដោយរកឃើញថា សកម្មភាពកូនក្តីរបស់ខ្លួនមិនធ្លាក់ចូលបទចោទប្រកាន់ សូកប៉ាន់សាក្សីនិងសមគំនិតក្នុងអំពើសូកប៉ាន់សាក្សីមកលើកញ្ញា ខុម ចាន់តារាទី ហៅស្រី មុំ នោះទេ។
សំអាងទីមួយនោះ បើតាមមេធាវីលោក សំ សុគង់ លើកឡើងថា ការផ្តល់ប្រាក់ជូនស្រី មុំ គ្រានោះ ធ្វើឡើងគោរពតាមគោលការណ៍របស់សមាគមអាដហុកសម្រាប់ជួយជនរងគ្រោះដែលមកសុំជំនួយពីអង្គភាព។ ហើយលោកថា ទង្វើរបស់កូនក្តីពុំមែនជាអំពើសមគំនិតលួចផ្តល់សំណូក ឬជាការឧបត្ថម្ភគាំទ្រក្នុងចេតនាទុច្ចរិតអ្វីនោះទេ។
ចំពោះចំណុច ដែលអាចដោះបន្ទុកមន្រ្តីអាដហុកចេញពីបទសូកប៉ាក់សាក្សីទៀតនោះ បើតាមមេធាវីគឺដោយសារផ្លូវច្បាប់ចែងថា ការផ្តល់ប្រាក់ជួយសម្រួលការលំបាកដល់ចុងបណ្តឹងមិនមែនជាអំពើសូកប៉ាន់នោះទេ ព្រោះស្រី មុំ គ្រានោះស្ថិតក្នុងឋានៈជាចុងបណ្តឹងប្តឹងដោយកញ្ញា ធី សុវណ្ណថា ពោលគឺស្រី មុំ មិនមែនជាសាក្សីនៅពេលនោះទេ។ ការលើកឡើងរបស់មេធាវីនេះ ក៏ព្រោះថា បទសូកប៉ាន់សាក្សីអាចកើតឡើងបាន លុះត្រាតែសូកប៉ាន់សាក្សីដើម្បីឆ្លើយបំភ្លៃការពិតទើបជាអំពើសូកប៉ាន់។
សម្រាប់លោក នី សុខា មន្រ្តីសមាគមអាដហុករំពឹងថា ចៅក្រមតុលាការកំពូលនឹងពិចារណាទម្លាក់ចោលបទចោទមកលើរូបលោកនិងមន្រ្តីផ្សេងទៀត ព្រោះការការពាររបស់មេធាវីខ្លួនមានអំណះអំណាងគ្រប់គ្រាន់។
ដោយឡែកលោកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជាយល់ថា រឿងនេះមានជាប់ពាក់ព័ន្ធនឹងរឿងនយោបាយ មានចេតនាចង់ធ្វើទុក្ខបុកន្នេញដល់អ្នកធ្វើការងារលើកស្ទួយសិទ្ធិមនុស្ស។
កាលពីខែកញ្ញាឆ្នាំ២០១៨ សាលាដំបូងរាជធានីភ្នំពេញបានកាត់ទោសមន្រ្តីនិងអតីតមន្រ្តីការពារសិទ្ធិមនុស្ស៥រូបរបស់សមាគមអាដហុកម្នាក់ៗឱ្យជាប់ពន្ធនាគារចំនួន៥ឆ្នាំ ពីបទសូកប៉ាន់សាក្សីនិងសមគំនិតសូកប៉ាន់សាក្សីក្នុងសំណុំរឿងអាស្រូវស្នេហារបស់លោក កឹម សុខា អតីតប្រធានគណបក្សសង្គ្រោះជាតិជាមួយនាង ខុម ចាន់តារ៉ាទី ហៅស្រីមុំ។
អ្នកទាំង៥រូបរួមមានលោក នី សុខា លោក យី សុខសាន្ត លោក ណៃ វ៉ង់ដា និងអ្នកស្រី លឹម មុនី ជាមន្ត្រីការពារសិទ្ធិមនុស្សនៃសមាគមអាដហុក និងលោក នី ចរិយា អគ្គលេខាធិការរងគណៈកម្មាធិការជាតិរៀបចំការបោះឆ្នោត(គ.ជ.ប.) និងជាអតីតមន្រ្តីការពារសិទ្ធិមនុស្សអាដហុក។
នៅថ្ងៃទី២៣ ខែតុលា ឆ្នាំ២០១៨អ្នកទាំង៥រូបបានដាក់ពាក្យបណ្តឹងឧទ្ធរណ៍ដោយមិនសុខចិត្តទៅនឹងការសម្រេចរបស់សាលាដំបូងដែលបានផ្តន្ទាទោសពួកគេដាក់ពន្ធនាគារម្នាក់ៗចំនួន៥ឆ្នាំដោយត្រូវអនុវត្តក្នុងពន្ធនាគាររយៈពេល១៤ខែនិងសល់ប៉ុន្មានព្យួរពីបទ «សូកប៉ាន់សាក្សី»។តែក្រោយមក ពួកគេត្រូវបានដោះលែងឱ្យនៅក្រៅឃុំកាលពីចុងខែមិថុនា ឆ្នាំ២០១៧បន្ទាប់ពីតុលាការឃុំខ្លួនពួកគេក្នុងពន្ធនាគារអស់រយៈពេលជាង១ឆ្នាំ បន្ទាប់ពីរឿងរ៉ាវនេះ រងការរិះគន់ពីអ្នកធ្វើការសិទ្ធិមនុស្ស៕
