នាយករដ្ឋមន្ត្រីអង់គ្លេស លោក បូរីស ចនសុន បាននិយាយកាលពីថ្ងៃព្រហស្បតិ៍ថា វិបត្តិអ៊ុយក្រែនបានក្លាយទៅជា«គ្រាដ៏គ្រោះថ្នាក់បំផុត»សម្រាប់អឺរ៉ុប ក្នុងរយៈពេលជាច្រើនទស្សវត្ស។

លោក ឯម មាឃ ជូនសេចក្ដីរាយការណ៍ ដោយផ្អែកតាមទីភ្នាក់ងារសារព័ត៌មានអេភី …

នាយករដ្ឋមន្ត្រីអង់គ្លេស លោក បូរីស ចនសុន បាននិយាយកាលពីថ្ងៃព្រហស្បតិ៍ថា វិបត្តិអ៊ុយក្រែនបានក្លាយទៅជា«គ្រាដ៏គ្រោះថ្នាក់បំផុត»សម្រាប់អឺរ៉ុប ក្នុងរយៈពេលជាច្រើនទសវត្ស ខណៈដែលប្រមុខការទូតអង់គ្លេសបានពិភាក្សាមិនចុះសម្រុងគ្នាជាមួយសមភាគីរុស្ស៊ី។

ចំពេលមានភាពជាប់គាំង កងកម្លាំងរុស្ស៊ីបានធ្វើសមយុទ្ធដ៏ធំនៅភាគខាងជើងនៃប្រទេសអ៊ុយក្រែន ពោលគឺក្នុងប្រទេសបេឡារុស។ សមយុទ្ធនេះជាផ្នែកមួយនៃការបង្កើនកងទ័ពជាង១សែននាក់ ដែលបានធ្វើឱ្យមានការភ័យព្រួយពីបស្ចិមលោក ចំពោះការលុកលុយអ៊ុយក្រែន។

អង្គការណាតូក៏បានបង្កើនការដាក់ពង្រាយយោធា ដើម្បីពង្រឹងតំបន់ភាគខាងកើតរបស់ខ្លួន ដោយសហរដ្ឋអាមេរិកបានបញ្ជូនកងទ័ពទៅកាន់ប្រទេសប៉ូឡូញនិងប្រទេសរូម៉ានី។ យន្តហោះ​របស់​កង​ទ័ព​អាកាស​អង់គ្លេស​មួយ​គ្រឿង​ ដឹក​ទាហាន​៣៥០​នាក់ ​បាន​ចុះ​ចត​នៅ​ថ្ងៃ​ព្រហស្បតិ៍​ ក្នុង​ប្រទេស​ប៉ូឡូញ ​បន្ទាប់ពីទី​ក្រុង​ឡុងដ៍​បាន​បញ្ជូន​កាំជ្រួច​ប្រឆាំង​រថក្រោះ​ទៅ​អ៊ុយក្រែន ​ដើម្បី​ជួយ​បង្កើន​ការ​ការពារប្រទេសនេះ៕

—

យោង៖ https://apnews.com/article/russia-ukraine-business-europe-moscow-berlin-e598acd2cd2726ac2e515fbe99210e6e