រដ្ឋបាលសហរដ្ឋអាមេរិករបស់ប្រធានាធិបតី ចូ បៃឌិន នៅថ្ងៃចន្ទ បាននិយាយថា ខ្លួនបានសម្រេចចិត្តធ្វើពហិការការទូតចំពោះព្រឹត្តិការណ៍កីឡាអូឡាំពិកក្នុងទីក្រុងប៉េកាំងនៅឆ្នាំក្រោយ ដើម្បីបង្ហាញការតវ៉ាចំពោះប្រទេសចិនដែលរងការចោទប្រកាន់ថារំលោភសិទ្ធិជនជាតិភាគតិចនៅតំបន់ស៊ីនជាំង។

រដ្ឋបាលសហរដ្ឋអាមេរិករបស់ប្រធានាធិបតី ចូ បៃឌិន នៅថ្ងៃចន្ទ បាននិយាយថា ខ្លួនបានសម្រេចចិត្តធ្វើពហិការការទូតចំពោះព្រឹត្តិការណ៍កីឡាអូឡាំពិកក្នុងទីក្រុងប៉េកាំងនៅឆ្នាំក្រោយ។

នេះជាការបង្ហាញការតវ៉ារបស់សហរដ្ឋអាមេរិក ចំពោះប្រទេសចិនដែលត្រូវបានចោទប្រកាន់ថាបានរំលោភសិទ្ធិជនជាតិភាគតិចមូស្លីម អ៊ុយហ្គួរ និងជនជាតិភាគតិចដទៃៗទៀត។

អ្នកនាំពាក្យសេតវិមាន លោកស្រី ចេន សាគី បាននិយាយនៅក្នុងសេចក្តីប្រកាសមួយថា៖ «រដ្ឋបាលលោក បៃឌិន នឹងមិនបញ្ជូនអ្នកការទូត ឬតំណាងផ្លូវការណាមួយ ឱ្យទៅចូលរួមក្នុងព្រឹត្តិការណ៍កីឡាអូឡាំពិករដូវរងានិងកីឡាប៉ារ៉ាឡាំពិកទីក្រុងប៉េកាំងឆ្នាំ២០២២ឡើយ»។

ទោះបីជាយ៉ាងនេះក្ដី អត្តពលិកអាមេរិកនឹងនៅតែត្រូវបានអនុញ្ញាតឱ្យចូលរួមប្រកួតក្នុងព្រឹត្តិការណ៍កីឡាពិភពលោកមួយនេះ ដែលគ្រោងនឹងចាប់ផ្តើមនៅថ្ងៃទី៤ ខែកុម្ភៈ។

លោកស្រី សាគី បានប្រាប់សន្និសីទសារព័ត៌មានថា ជំហរនេះគឺចង់ផ្ញើ«សារច្បាស់លាស់»មួយថា សហរដ្ឋអាមេរិកមិនអាចប្រព្រឹត្ត«ដូចគ្មានរឿងអ្វីកើតឡើង»នោះទេ ដោយហេតុថាមានរបាយការណ៍អំពីការរំលោភសិទ្ធិមនុស្សដោយប្រទេសចិន។

រដ្ឋាភិបាលទីក្រុងវ៉ាស៊ីនតោនបានហៅការរំលោភសិទ្ធិជនជាតិភាគតិចពីសំណាក់ប្រទេសចិនថាជា«អំពើប្រល័យពូជសាសន៍»។

អ្នកនាំពាក្យបាននិយាយទៀតថា សហរដ្ឋអាមេរិកបានជូនដំណឹងដល់សម្ព័ន្ធមិត្តរបស់ខ្លួន អំពីការសម្រេចចិត្តនេះហើយ។ បើតាមសម្រង់សម្ដីផ្ទាល់ លោកស្រី សាគី បានថ្លែងថា៖ «យើងទុកឱ្យពួកគេសម្រេចចិត្តដោយខ្លួនឯង»។

រដ្ឋមន្ត្រីការបរទេសជប៉ុន លោក យ៉ូស្ស៊ីម៉ាសា ហាយ៉ាស្ស៊ី នៅថ្ងៃអង្គារ ទី០៧ ខែធ្នូ បាននិយាយថា រដ្ឋាភិបាលមិនទាន់សម្រេចថាតើត្រូវប្រកាន់ជំហរបែបណាទាក់ទងនឹងការចូលរួមក្នុងព្រឹត្តិការណ៍កីឡាអូឡាំពិករដូវរងានោះទេ។

លោក យ៉ូស្ស៊ីម៉ាសា បានប្រាប់សន្និសីទសារព័ត៌មាននៅទីក្រុងតូក្យូថា៖ «ដោយគិតគូរពីកត្តាជាច្រើនគ្រប់ជ្រុងជ្រោយ យើងនឹងសម្រេចចិត្តអំពីការឆ្លើយតបរបស់រដ្ឋាភិបាលចំពោះព្រឹត្តិការណ៍កីឡានោះ នៅពេលសមស្រប»។

កាលពីខែមុន នាយករដ្ឋមន្ត្រីជប៉ុន លោក ហ្វ៊ូមីអូ គីស្ស៊ីដា បានថ្លែងថា រដ្ឋាភិបាលនឹងធ្វើការសម្រេចចិត្ត ស្របពេលនឹងការគិតគូរពីផលប្រយោជន៍ជាតិជប៉ុន។

ប្រទេសខ្លះទៀតដូចជាអូស្ត្រាលី និងអង់គ្លេស ត្រូវបានរាយការណ៍ថា កំពុងពិចារណាធ្វើពហិការការទូត។

ប្រទេសចិនបានស្ថិតនៅក្រោមការពិនិត្យពិច័យជាអន្តរជាតិ ជុំវិញការប្រព្រឹត្តចំពោះជនជាតិ អ៊ុយហ្គួរ និងក្រុមជនជាតិភាគតិចផ្សេងៗទៀតក្នុងតំបន់ស៊ីនជាំង ដែលនៅចុងខាងលិចនៃប្រទេសនេះ។

រដ្ឋាភិបាលសហរដ្ឋ​អាមេរិក​បាន​ចោទ​អាជ្ញាធរ​ចិន​ពីរឿង​ឃុំឃាំងមនុស្ស​តាម​អំពើ​ចិត្តក្នុង​ទ្រង់ទ្រាយ​ធំ ពីរឿង​បង្ខំ​ឲ្យ​ក្រៀវកុំឱ្យមានកូន និងពីរឿង​បង្ខំ​ឲ្យ​ធ្វើ​ពលកម្ម ​ក្នុង​ចំណោម​ការ​រំលោភ​បំពាន​ផ្សេងៗទៀត។

រដ្ឋាភិបាលទីក្រុង​ប៉េកាំង​បាន​បដិសេធ​ការ​ចោទ​ប្រកាន់​ខាងលើ ហើយ​បាន​សម្ដែង​ការ​ប្រឆាំង​យ៉ាង​ខ្លាំង​ចំពោះ​សកម្មភាពនានា​ដែល«ធ្វើ​នយោបាយ»ពីលើវិស័យកីឡា។

គណៈកម្មាធិការអូឡាំពិកអន្តរជាតិបាននិយាយថា វត្តមានរបស់មន្ត្រីរដ្ឋាភិបាល និងរបស់អ្នកការទូត គឺជា«ការសម្រេចចិត្តផ្នែកនយោបាយសុទ្ធសាធសម្រាប់រដ្ឋាភិបាលនីមួយៗ ដែលគណៈកម្មាធិការគោរពយ៉ាងពេញលេញ ស្របតាមជំហរអព្យាក្រឹតផ្នែកនយោបាយរបស់គណៈកម្មាធិការ»។

គណៈកម្មាធិការអូឡាំពិកអន្តរជាតិក៏បាននិយាយផងដែរថា សេចក្តីប្រកាសរបស់ទីក្រុងវ៉ាស៊ីនតោន បានបញ្ជាក់«ច្បាស់លាស់»ថា ការចូលរួមរបស់អត្តពលិកអាមេរិកគឺ«មិនទាក់ទងនឹងនយោបាយទេ ហើយយើងសូមស្វាគមន៍ចំពោះរឿងនេះ»។

ពេលត្រូវគេសួរថាហេតុអ្វីបានជារដ្ឋបាលលោក បៃឌិន មិនហាមឃាត់អត្តពលិកកុំឱ្យចូលរួមក្នុងការប្រកួតនោះ, លោកស្រី សាគី ដែលជាអ្នកនាំពាក្យ បានឆ្លើយថា ពហិការការទូតគឺគ្រប់គ្រាន់ហើយ ដើម្បីបង្ហាញពីចេតនារបស់សហរដ្ឋអាមេរិក។

លោកស្រីបាននិយាយដោយទទូចថា អត្តពលិកដែលបានខិតខំប្រឹងប្រែងហ្វឹកហាត់ និងរៀបចំខ្លួនសម្រាប់ព្រឹត្តិការណ៍នោះ គួរតែអាចចូលរួមប្រកួតប្រជែងបាន៕

—

យោង៖ https://english.kyodonews.net/news/2021/12/ce002322ab13-urgent-us-decides-on-diplomatic-boycott-of-beijing-olympics.html