ភ្នំពេញ៖ នៅថ្ងៃទី២៦ ខែតុលា ឆ្នាំ២០២១នេះ សាលាដំបូងរាជធានីភ្នំពេញបានសម្រេចផ្ដន្ទាទោសសកម្មជនសង្គម សកម្មជននយោបាយ និងក្រុមយុវជនខ្មែរថាវរៈឱ្យជាប់ពន្ធនាគារចំនួន ២០ខែ និងពិន័យជាប្រាក់ម្នាក់ៗចំនួន ២ លានរៀល។ អង្គការសង្គមស៊ីវិលយល់ថា ការផ្តន្ទាទោសនេះមានលក្ខណៈធ្ងន់ធ្ងរនិងជាសារមួយគម្រាមដល់អ្នកស្រលាញ់ឈឺឆ្អាលការងារសង្គម។
លោក កែវ សុខា រាយការណ៍លម្អិតពីព័ត៌មាននេះ
ផ្អែកតាមក្រមព្រហ្មទណ្ឌមាត្រា ៤៩៤ និងមាត្រា ៤៩៥ ពីបទញុះញង់ ចៅក្រមសាលាដំបូងរាជធានីភ្នំពេញបានសម្រេចផ្តន្ទាទោសក្រុមយុវជនខ្មែរថាវរៈ និងសកម្មជននយោបាយផ្សេងទៀតជាង១០នាក់ ឱ្យជាប់ពន្ធធនាគាររយៈ ២០ខែ និងពិន័យជាប្រាក់ម្នាក់ៗចំនួន ២ លានរៀល។ នេះបើតាមខ្លឹមសារក្នុងអត្ថបទខ្លីរបស់អង្គការលីកាដូចេញផ្សាយនៅលើទំព័រហ្វេសប៊ុកថ្ងៃនេះ។
តាមលីកាដូ សកម្មជនសង្គម និងក្រុមយុវជនខ្មែរថាវរៈ ដែលត្រូវបានផ្ដន្ទាទោសរួមមាន កញ្ញា ឈឿន ដារ៉ាវី លោក ហ៊ុន វណ្ណៈ លោក មាន ព្រហ្មមុន្នី ព្រះតេជព្រះគុណ កើត សារ៉ាយ លោក ថា ឡាវី លោក មួង សុភ័ក្រ និងកញ្ញា អេង ម៉ាឡៃ។
កញ្ញា ដារ៉ាវី និងលោក វណ្ណៈ ត្រូវបានកាត់ទោសម្នាក់ៗឱ្យអនុវត្តទោសជាប់ពន្ធនាគារចំនួន ១៥ខែ ខណៈដែលអ្នកផ្សេងទៀត ត្រូវអនុវត្តទោសជាប់ពន្ធនាគារចំនួន ១៤ខែ។ អ្នកទាំងនេះ ត្រូវបានចាប់ខ្លួន ក្នុងខែសីហា និងខែកញ្ញា ឆ្នាំ២០២០ ពាក់ព័ន្ធនឹងការជួបជុំគ្នាដោយសន្តិវិធីរបស់ពួកគេ នៅក្បែរតុលាការ ដើម្បីអំពាវនាវឱ្យមានការដោះលែង លោក រ៉ុង ឈុន ប្រធានសហជីពលេចធ្លោមួយរូប។
ចំណែកអតីតសកម្មជន ឬសមាជិកនៃអតីតគណបក្សសង្គ្រោះជាតិចំនួន ៣នាក់ផ្សេងទៀត រួមមានលោក ជុំ ពុទ្ធី និងលោក ឈួ ផេង ត្រូវអនុវត្តទោសជាប់ពន្ធនាគារចំនួន ១៥ខែ ខណៈលោក គង់ សំអាន នឹងត្រូវអនុវត្តទោសចំនួន ១៤ខែ។
ដោយឡែកអតីតមន្រ្តីជាន់ខ្ពស់បក្សប្រឆាំងមានលោក ហូ វ៉ាន់ លោក អ៊ូ ចាន់រិទ្ធ លោក គង់ សុភា និងលោក សេង ម៉េងប៊ុនរ៉ុង អ្នកទាំងបួននាក់ត្រូវបានកាត់ទោសឱ្យជាប់ពន្ធនាគារម្នាក់ៗចំនួន ២ឆ្នាំ ព្រមទាំងពិន័យជាប្រាក់ម្នាក់ៗចំនួន ៤លានរៀល។ សម្រាប់អ្នកទាំងបួនត្រូវបានកាត់ទោសដោយកំបាំងមុខ ហើយតុលាការបានចេញដីកាចាប់ខ្លួនផងដែរ។ រីឯលោក ហុង លីម ត្រូវបានតុលាការទម្លាក់ចោលបទចោទប្រឆាំងនឹងលោក។
នៅក្នុងសវនាការ សកម្មជនភាគច្រើនត្រូវបានសួររកមេក្លោងនៅក្រៅប្រទេសដែលនៅពីក្រោយសកម្មភាពរបស់ពួកគេ និងការសុំការអនុញ្ញាតមុនមានការជួបជុំ។ ក្នុងសេចក្ដីសន្និដ្ឋាន សកម្មជនជាច្រើនបានកត់សម្គាល់ថា ពួកគេគ្រាន់តែចូលរួមក្នុងការតវ៉ាដោយសន្តិវិធីតែប៉ុណ្ណោះ និងបានលើកឡើងពីស្ថានភាពលំបាកចង្អៀតណែននៅក្នុងពន្ធនាគារ ព្រមទាំងរិះគន់ថា សវនាការមិនមានភាពយុត្តិធម៌។
ទាក់ទិនក្នុងរឿងនេះ លោក អំ សំអាត នាយករងទទួលបន្ទុកកម្មវិធីឃ្លាំមើលនៃអង្គការលីកាដូនិយាយថា សាលក្រមផ្តន្ទាទោសមកលើសកម្មជននយោបាយ និងក្រុមយុវជនខ្មែរថារវៈនេះ មានលក្ខណៈធ្ងន់ធ្ងរដែលស្តែងឱ្យឃើញរូបភាពគម្រាមកំហែងដល់អ្នកស្រលាញ់ការងារសង្គម បរិស្ថាន និងសិទ្ធិសេរីភាព ឱ្យមានការភិតភ័យលែងហ៊ានចូលរួមកិច្ចការសង្គម។ លោកយល់ថា តុលាការគួរទម្លាក់ចោលបទចោទលើក្រុមយុវជននិងសកម្មជននយោបាយ ដើម្បីឱ្យពួកគេមានឱកាសចូលរួមការងារការពារបរិស្ថាន ការងារសង្គម និងសិទ្ធិមនុស្ស ដែលពួកគេជាធនធានក្នុងការអភិវឌ្ឍន៍ប្រទេសជាតិ។
លោក អំ សំអាត៖«ទីមួយយើងសោកស្តាយ ហើយយើងមើលឃើញថាសាលក្រមផ្តន្ទាទោសអ្នកទាំងអស់ហ្នឹងមានសភាពធ្ងន់ធ្ងរណាស់ ដែលកន្លងមកទាំងអង្គការសិទ្ធិមនុស្សជាតិ និងអន្តរជាតិ ក្រុមប្រឹក្សាសិទ្ធិមនុស្សអង្គការសហប្រជាជាតិ អង្គទូត អ្នកជំនាញសិទ្ធិ យល់ថាទង្វើរបស់ក្រុមយុវជនខ្មែរថាវរៈ ឬអ្នកពាក់ព័ន្ធរឿងនេះកន្លងមក គ្រាន់តែជាការចូលរួមជួបជុំប្រមូលផ្តុំដោយសន្តិវិធី និងការបញ្ចេញមតិដោយសន្តិវិធី វាមិនមែនជាបទល្មើសនោះទេ ហើយត្រូវបានធានាដោយរដ្ឋធម្មនុញ្ញ ក៏ដូចជាបទដ្ឋានអន្តរជាតិស្តីពីសិទ្ធិមនុស្ស»។
ជាការកត់សម្គាល់ ក្រុមអង្គការសង្គមស៊ីវិលមួយចំនួនបានបន្តធ្វើយុទ្ធនាការ«សុំឱ្យដោះលែងសកម្មជននិងអ្នកការពារសិទិ្ធមនុស្ស»តាមរយៈទំព័រហ្វេសប៊ុកជារៀងរាល់សប្តាហ៍ ដែលគិតមកដល់ពេលនេះជាសប្តាហ៍ទី ១១ ហើយ។
តាមរយៈយុទ្ធនាការនេះ ក្រុមអង្គការសង្គមស៊ីវិលបានអំពាវនាវឱ្យដោះលែងអ្នកការពារសិទ្ធិមនុស្ស សកម្មជនបរិស្ថាន និងសកម្មជននយោបាយ ដែលពួកគេគ្រាន់តែបញ្ចេញមតិលើកឡើងពីបញ្ហាក្នុងសង្គមដូចជា បញ្ហាព្រំដែន សិទ្ធិកម្មករ សិទ្ធិគ្រូបង្រៀនជាដើម។ ក្នុងនោះផងដែរ ពួកគេក៏បានលើកឡើងពីបញ្ហាជំនន់ជន់លិចផ្ទះសម្បែងដែលបណ្តាលមកពីការលុបបឹងធម្មជាតិក្នុងរាជធានីភ្នំពេញ ជាមួយនឹងការបង្ហូរកាកសំណល់ចូលសមុទ្រ និងទន្លេ ផងដែរ។
ក្រុមអង្គការសង្គមស៊ីវិលដែលធ្វើយុទ្ធនាការនេះ សម្គាល់ឃើញថា សកម្មភាពរបស់ក្រុមយុវជននិងអ្នកការពារសិទ្ធិមនុស្សមិនត្រូវបានការគាំទ្រពីអាជ្ញាធរនោះទេ តែផ្ទុយទៅវិញអ្នកទាំងនោះត្រូវបានចោទប្រកាន់ ចាប់ខ្លួន និងឃុំខ្លួនក្នុងពន្ធនាគារដោយមិនត្រឹមត្រូវទៅវិញ៕
