ទីភ្នាក់ងារសារព័ត៌មានរើយធើ នៅថ្ងៃអាទិត្យ ទី ២៤ ខែតុលា រាយការណ៍ថា អាជ្ញាធរកូឡុំប៊ី កាលពីចុងសប្តាហ៍កន្លងទៅ បានចាប់ខ្លួនបុរសម្នាក់ ដែលប្រទេសកូឡុំប៊ីពណ៌នាថា ជាអ្នកជួញដូរគ្រឿងញៀនដ៏គ្រោះថ្នាក់បំផុតក្នុងពិភពលោក។
ដោយផ្អែកតាមប្រភពរដ្ឋាភិបាល រើយធើបានរំលេចឱ្យដឹងថា ឈ្មោះ ឌែរ៉ូ អង់តូនីញ៉ូ អ៊ុស្សាហ្គា ដែលគេតែងហៅថា អូតូនីញែល បានប្រាប់កងកម្លាំងសន្តិសុខថា «ឯងឈ្នះអញហើយ»។
បើតាមរើយធើ ពួកមន្ត្រីនិយាយនៅថ្ងៃសៅរ៍ថា បុរសវ័យ ៥០ ឆ្នាំរូបនេះ បាននិយាយដូច្នេះ នៅពេលដែលជននេះត្រូវបានចាប់ខ្លួនក្នុងប្រតិបត្តិការមួយ ដែលប្រើកងកម្លាំងពិសេសជាង ៥០០ នាក់ និងឧទ្ធម្ភាគចក្រ ២២ គ្រឿង។
រើយធើបញ្ជាក់ថា លោក អូតូនីញែល ត្រូវបានចោទប្រកាន់ពីបទនាំចេញកូកាអ៊ីនរាប់រយតោនក្នុងមួយឆ្នាំៗ ខណៈដែលប្រធានាធិបតីកូឡុំប៊ី អ៊ីវ៉ាន ឌុក បាននិយាយនៅថ្ងៃសៅរ៍ថា បុរសរូបនោះក៏ទទួលខុសត្រូវចំពោះការសម្លាប់មន្ត្រីប៉ូលីស ការជ្រើសរើសអនីតិជនឱ្យធ្វើការ និងការរំលោភបំពានផ្លូវភេទកុមារថែមទៀត។
យោងតាមរើយធើ ប្រទេសកូឡុំប៊ីបានប្រកាសផ្តល់រង្វាន់រហូតដល់ ៣ ពាន់លានប៉េសូ (ប្រហែល ៨ សែនដុល្លារ) សម្រាប់ព័ត៌មានទាក់ទងនឹងកន្លែងលាក់ខ្លួនរបស់ អូតូនីញែល ស្របពេលដែលរដ្ឋាភិបាលសហរដ្ឋអាមេរិកបានដាក់រង្វាន់ចំនួន ៥ លានដុល្លារ សម្រាប់ជំនួយក្នុងការស្វែងរកមេកន្ទ្រាញគ្រឿងញៀនរូបនេះ៕
