ប្រធានស្ដីទីគណបក្សសង្រ្គោះជាតិលោក សម រង្ស៊ី អំពាវនាវឱ្យសហគមន៍អន្តរជាតិ ជាពិសេស កាកបាទក្រហមអន្តរជាតិ (ICRC) និងកម្មវិធីផ្បៀងអាហារពិភពលោក (WFP) ផ្តល់ជំនួយបន្ទាន់ ជាស្បៀងអាហារជូនដល់ប្រជាពលរដ្ឋខ្មែរនៅទីក្រុងភ្នំពេញ ក្រុងតាខ្មៅ និងក្រុងព្រះសីហនុដែលកំពុងស្ថិតក្នុងការបិទខ្ទប់ប្រឆាំងនឹងកូវីដ១៩។
លោក សម រង្ស៊ី បានសរសេរនៅលើហ្វេសប៊ុក កាលពីថ្ងៃទី២៦ ខែមេសាថាការបិទខ្ទប់ទីក្រុងទាំង៣នេះ មានសភាពតឹងរឹងជ្រុលហួសហេតុបាននាំមកនូវទុក្ខលំបាករហូតដល់មានទុរ្ភិក្ស ឬធ្វើឱ្យអត់ឃ្លាន ដោយខ្វះអាហារសម្រាប់ប្រជាពលរដ្ឋរងគ្រោះ។
លិខិតអំពាវនាវរបស់ លោក សម រង្ស៊ីដែលបានធ្វើឡើងទៅកាន់ សហគមន៍អន្តរជាតិ ជាពិសេស កាកបាទក្រហមអន្តរជាតិ និងកម្មវិធីស្បៀងអាហារពិភពលោក គឺលោកបានបញ្ជាក់ថាក្នុងនាមប្រជាជនកម្ពុជាដែលលោកបានជាប់ឆ្នោតធ្វើជាតំណាងរយៈពេល ២៥ ឆ្នាំមកហើយ។
សារលិខិតរបស់លោកសមរង្ស៊ី បានសរសេររៀបរាបដូចនេះថា ៖ការបង្ខាំងប្រភេទតឹងរ៉ឹងបំផុតជារបៀបមិនបានគិតគូរត្រឹមត្រូវ និងអាជ្ញាសឹកត្រូវបានដាក់ភ្លាមៗកាលថ្ងៃទី១៥ ខែមេសាឆ្នាំ២០២១ នៅក្នុងទីក្រុងចំនួន ៣ គឺរាជធានីភ្នំពេញ ក្រុងតាខ្មៅ និងខេត្តព្រះសីហនុ។ ក្នុងតំបន់ទាំងនោះ គឺប្រជាជនភាគច្រើនមិនត្រូវបានអនុញ្ញាតឱ្យចាកចេញពីផ្ទះ ចាប់តាំងពីថ្ងៃនោះមកដោយប៉ូលីសប្រើអំពើហឹង្សា ដើម្បីអនុវត្តច្បាប់។ រីឯការផ្គត់ផ្គង់ស្បៀងអាហារបានធ្លាក់ចុះភ្លាមៗដល់សូន្យប៉ះពាល់ប្រជាជនភាគច្រើនជាពិសេសប្រជាជនក្រីក្រ ដែលរកទទួលទានរស់ដើម្បីមួយក្រពះ របស់ពួកគេប៉ុណ្ណោះ។
លើសពីនេះប្រព័ន្ធចែកចាយស្បៀងអាហារដែលអាជ្ញាធរបានដាក់ឱ្យដំណើរការដូចជាស្តង់លក់គ្រឿងទេសចល័តរបស់រដ្ឋ គឺមិនមានលទ្ធភាព និងមិនអាចទៅដល់ជនក្រីក្រ។ ប្រជាជនទាំងនេះលែងមានមធ្យោបាយក្នុងការទិញម្ហូបពីព្រោះពួកគេធ្វើការក្នុងវិស័យក្រៅផ្លូវការហើយក្នុងមួយថ្ងៃរកប្រាក់បានគ្រប់គ្រាន់សម្រាប់ផ្គត់ផ្គង់តម្រូវការប្រចាំថ្ងៃប៉ុណ្ណោះ។
លោកសមរង្ស៊ីដែលជាអតីតរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ សរសេរបញ្ជាក់ក្នុងសាររបស់លោកទៀតថា នៅក្រោមការបិទខ្ទប់នៅពេលនេះ និងការហាមឃាត់ដាច់ខាតក្នុងការចាកចេញពីផ្ទះ គឺពលរដ្ឋងាយនឹងរងគ្រោះថ្នាក់ដល់ការខ្វះជីវជាតិ និងទុរ្ភិក្ស ឬអត់ឃ្លាន។
នៅពុំទាន់ឃើញប្រតិកម្មជា ចំពោះសេចក្ដីថ្លែងការណ៍របស់លោកសមរង្ស៊ី ដែលរិះគន់ វិធានការបិទខ្ទប់ របស់អាជ្ញាធរ ដែលលោកថា បានប៉ះពាល់ធ្ងន់ធ្ងរ ពលរដ្ឋក្រីក្រ ក្នុងការចេញទៅរកស្បៀងអាហារ។
ករណីបិទខ្ទប់នេះ គេសង្កេតឃើញរដ្ឋាភិបាល និងអាជ្ញាធរមូលដ្ឋាន បានចែកចាយស្បៀងដល់ តំបន់បិទខ្ទប់ ប៉ុន្តែនៅ ឃើញមានការបង្ហោះ រូបភាព និងវិដេអូឃ្លីប អំពាវនាវសុំស្បៀងជាបន្ទាន់។
បែបណា ប្រមុខរដ្ឋាភិបាល បានប្រកាសអោយអាជ្ញាធរ នៅតំបន់បិទខ្ទប់ត្រូវសកម្មជួយពលេរដ្ឋ គឺមិនត្រូវទុកអោយពលរដ្ឋ ធ្លាក់ក្នុងជំងឺមួយទៀត នៃការអត់ស្បៀងនោះទេ។ រដ្ឋាភិបាល ប្រកាសថា នឹងបើក រាជធានីភ្នំពេញ និងទីក្រុងតាខ្មៅខេត្តកណ្ដាលឡើងវិញនៅ គឺនៅថ្ងៃទី៥ឧសភា ប៉ុន្តែព្រមានថា នឹងនៅបន្តបិទខ្ទប់ បើពលរដ្ឋនៅតែ បណ្ដោយអោយខ្លួនគេ ប៉ះពាល់ ការឆ្លងជំងឺកូវិដ ដោយខ្វះការប្រុងប្រយ័ត្ន៕
