ភ្នំពេញ៖ សំឡេងផូងផាងលឹនលឺចេញពីផ្លែញញួរទង្គិចជាមួយបន្ទះដែកក្រហមឆ្អិនឆ្អៅ នេះជាទិដ្ឋភាពក្នុងរោងជាងដំដែកតូចមួយដែលកំពុងផលិតកាំបិត ពូថៅ ផ្គាក់ និងផ្លែចប របស់គ្រួសារលោក រី។

ស្របពេលដែលយុវជនមួយចំនួនសម្រេចចិត្តចំណាកស្រុករកការងារធ្វើឆ្ងាយពីស្រុកកំណើត លោក រី និងសមាជិកគ្រួសាររស់នៅភូមិត្រពាំងឈូក ឃុំបឹង ស្រុកបារាយណ៍ ខេត្តកំពង់ធំ បានចាប់យករបរដំដែកដើម្បីចិញ្ចឹមជីវិតជាង ៣០ ឆ្នាំក្នុងភូមិស្រុករបស់ខ្លួន។​

លោក រី បានឱ្យដឹងថា ជំនាញដំដែកលិត កាំបិត ពូថៅ និងសម្ភារៈផ្សេងៗនេះ លោកចេះពីដូនតាមក ហើយក៏បង្រៀនកូនចៅឱ្យចេះតៗគ្នា។ លោកបន្តថា សម្ភារៈទាំងអស់ផលិតតាមការកាម៉ុងរបស់ឈ្មួញ និងប្រជាពលរដ្ឋក្នុងភូមិស្រុក និងតាមបណ្តាខេត្តនានា។

លោកប្រាប់បន្តថា ការងារជាជាងដំដែកនេះត្រូវប្រើកម្លាំងច្រើន និងពឹងអាស្រ័យលើសុខភាពផងដែរដើម្បីដំណើរការការងារ។ តែយ៉ាងណា លោករីករាយជាមួយការងារនេះ ព្រោះ របរនេះអាចជួយផ្គត់ផ្គង់ជីវភាពគ្រួសារបានសមរម្យ និងអាចដរស់នៅជុំគ្រួសារដោយមិនចាំបាច់ឱ្យកូនចៅចំណាកស្រុករកការងារធ្វើឆ្ងាយពីផ្ទះ ដែលប្រឈមនឹងបញ្ហានានា៕

អត្ថបទខ្លីសរសេរដោយ ទៀត កាមីឡះ យុវជនខេត្តកំពង់ធំ ជាសិក្ខាកាមក្នុងវគ្គបណ្តុះបណ្តាលអំពីអក្ខរកម្មព័ត៌មាន និងប្រព័ន្ធផ្សព្វផ្សាយ (MIL) រៀបចំដោយមណ្ឌលព័ត៌មានស្រ្តីកម្ពុជា(WMC) ក្រោមជំនួយបច្ចេកទេសពីអង្គការអភិវឌ្ឍន៍ប្រព័ន្ធផ្សព្វផ្សាយអាឡឺម៉ង់(DW)។