ខេត្តកំពង់ធំ៖ ជាគំរូមួយដ៏ល្អប្រសើរ ប្រជាពលរដ្ឋក្នុងភូមិបាណក ឃុំបារាយណ៍ ស្រុកបារាយណ៍ ខេត្តកំពង់ធំ មួយចំនួនបានសង់បង្គន់អនាម័យបិទបាំងដោយស្លឹកត្នោត និងស័ង្កសីចាស់ៗ ជំរុញអនាម័យរស់នៅ បញ្ចប់ការបន្ទោបង់ពាសវាលពាសកាល។
អ្នកស្រី ឡេង រ៉ុម រស់នៅភូមិបាណក ឃុំបារាយណ៍ ស្រុកបារាយណ៍ ខេត្តកំពង់ធំ បានប្រាប់ថា កាលពីមិនទាន់មានបង្គន់អនាម័យប្រើ អ្នកស្រីនិងសមាជិកគ្រួសារតែងតែបន្ទោបង់ពាសវាលពាសកាលតាមកម្ពោតព្រៃ។
អ្នកស្រីបន្តថា គ្រួសារខ្លះប្រើបង្គន់ចាក់ផេះ ខ្លះកាប់ដីបន្ទោបង់ហើយលប់វិញ ខ្លះទៀតមានផ្ទះជាប់មាត់ទឹកក៏សង់បង្គន់បន្ទោបង់ដាក់ក្នុងទឹកតែម្ដង។ អ្នកស្រីបញ្ជាក់ទៀតថា ការបន្ទោបង់ពាសវាលពាសកាល ធ្វើឱ្យអ្នកស្រីនិងគ្រួសារមានសុខភាពមិនល្អ កូនៗជួបបញ្ហារាករូស ប្រឈមក្លិនស្អុយ បណ្តាលឱ្យប្រភពទឹកកង្វក់មិនអាចយកមកប្រើប្រាស់បាន។
អ្នកស្រីបន្ថែមថា ការសង់បង្គន់អនាម័យប្រើ ព្រោះអ្នកស្រីបានយល់ដឹងច្រើនពីបញ្ហាសុខភាពតាមរយៈប្រព័ន្ធផ្សព្វផ្សាយ និងភ្នាក់ងារក្រសួងសុខាភិបាលដែលបានចុះមកបង្រៀន អប់រំណែនាំ។ អ្នកស្រី ឡេង រ៉ុម បន្តទៀតថា ការងាកមកប្រើបង្គន់អនាម័យ គឺមានភាពងាយស្រួល ជាពិសេសមានសុវត្ថិភាពសម្រាប់ស្ត្រីៗ និងក្មេងស្រី ធ្វើឱ្យបរិយាកាសល្អបរិសុទ្ធ មិនមានជម្ងឺរាករូសដូចមុន និងមិនប៉ះពាល់ដល់ប្រភពទឹកប្រើប្រាស់។
ជាចុងក្រោយអ្នកស្រី ឡេងរ៉ុម សុំអំពាវនាវដល់ប្រជាជនក្នុងសហគមន៍ទាំងអស់ បែរមកប្រើបង្គន់អនាម័យអោយបានគ្រប់ៗគ្នា និងសង់បង្គន់ទៅតាមលទ្ធភាពដែលអាចធ្វើទៅបាន៕
អត្ថបទខ្លីសរសេរដោយ ហុក ដេប៉ូ យុវជនខេត្តកំពង់ធំ ជាសិក្ខាកាមក្នុងវគ្គបណ្តុះបណ្តាលអំពីអក្ខរកម្មព័ត៌មាន និងប្រព័ន្ធផ្សព្វផ្សាយ (MIL) រៀបចំដោយមណ្ឌលព័ត៌មានស្រ្តីកម្ពុជា(WMC) ក្រោមជំនួយបច្ចេកទេសពីអង្គការអភិវឌ្ឍន៍ប្រព័ន្ធផ្សព្វផ្សាយអាឡឺម៉ង់(DW)។
