កំពង់ធំ៖ កាលពីពេលថ្មីៗនេះ ប្រជាពលរដ្ឋខ្មែរឥស្លាមក្នុងភូមិដូនប៉ែន ឃុំបឹង ស្រុកបារាណា៍ ខេត្តកំពង់ធំ បានប្រារព្ធពិធីបុណ្យស្រាយបួស ឬហៅថា រ៉ូយ៉ាហាជី។ ក្នុងកម្មវិធីនេះអ្នករៀបចំកម្មវិធីបានចែកសាច់គោជូនប្រជាពលរដ្ឋក្នុងភូមិតាមក្រុមនីមួយៗ។

បើតាមគណៈកម្មការអ្នករៀបចំកម្មវិធីស្រាយបួសបានឱ្យដឹងថា សាច់គោដែលត្រូវចែកជូនប្រជាពលរដ្ឋក្នុងភូមិដូនប៉ែន គឺមានចំនួន ៥​ គីឡូក្រមក្នុងមួយគ្រួសារ។ ចំណែកថវិកាទិញគោ ១០០ក្បាលចែកសាច់ជូនប្រជាពលរដ្ឋនេះ ទទួលបានថវិកាពីសប្បុរសជនរស់នៅប្រទេសម៉ាឡេស៊ី ដែលមានចំនួន ១៥០០០ដុល្លារអាមេរិក។

តាមការឱ្យដឹងពីគណៈកម្មការបញ្ជាក់ថា ពិធីស្រាយបួស ឬរ៉ូយ៉ាហាជីនេះ ធ្វើឡើងជារៀងរាល់ឆ្នាំ បន្ទាប់ពីអ្នកប្រតិបត្តិបានតមហូបអាហារ និងទឹក រយៈពេលមួយខែ ​ចាប់ពីថ្ងៃរះរហូតដល់ថ្ងៃលិចវិញទើបអាចទទួលទានអាហារបាន។

ពិធីបុណ្យរ៉ូយ៉ាហាជីនេះ មានគោលបំណងឱ្យអ្នកប្រតិបត្តិបានដឹង និងពិចារណាពីភាពអត់ឃ្លានរបស់ជនក្រីក្រពេលគ្មានអាហារបរិភោគ៕

អត្ថបទខ្លីសរសេរដោយ យូ កទី យុវជនខេត្តកំពង់ធំ ជាសិក្ខាកាមក្នុងវគ្គបណ្តុះបណ្តាលអំពីអក្ខរកម្មព័ត៌មាន និងប្រព័ន្ធផ្សព្វផ្សាយ (MIL) រៀបចំដោយមណ្ឌលព័ត៌មានស្រ្តីកម្ពុជា(WMC) ក្រោមជំនួយបច្ចេកទេសពីអង្គការអភិវឌ្ឍន៍ប្រព័ន្ធផ្សព្វផ្សាយអាឡឺម៉ង់(DW)។