ភ្នំពេញ៖ ដើម្បីទប់ស្កាត់នូវហានីភ័យនានាដែលអាចបណ្តាលឱ្យប្រភពទឹកមួយចំនួណក្នុងមូលដ្ឋានមួយខ្វះខាតទឹកប្រើប្រាស់ ក្រសួងអភិវឌ្ឍន៍ជនបទកាលពីថ្ងៃទី២៥ កុម្ភៈបានចេញសេចក្តីណែនាំទៅកាន់មន្រ្តីថ្នាក់ក្រោយត្រូវឧស្សាហ៍ចុះពិនិត្យ ជៀសវាងគ្មានទឹកប្រើប្រាស់សម្រាប់ប្រជាពលរដ្ឋ។ សេចក្តីណែនាំនេះធ្វើឡើងនៅគ្រាដែលកម្ពុជា កំពុងទទួលរងនូវឥទ្ធិពលបាតុភូត អែលនីណូ(El Nino) ដោយប្រយោល ដែលបាតុភូតនេះបង្កឱ្យធាតុអាកាសក្តីហួតហែង ហើយសីតុណ្ហភាពអាចហក់ឡើងដល់៤០-៥០អង្សារសេ។
បើតាមសេចក្តីប្រកាសព័ត៌មាននេះ ឥទ្ធិពលនៃបាតុភូតនេះនឹងធ្វើឱ្យកម្ពុជាអាចប្រឈមនឹងការខ្វះខាតទឹកសម្រាប់ប្រើប្រាស់ ពិសេសប្រជាពលរដ្ឋតាមតំបន់ជនបទ។
ដើម្បីកាត់បន្តយការខ្វះខាតទឹកប្រើប្រាស់ក្រសួងអភិវឌ្ឍន៍ សូមធ្វើការណែនាំដល់មន្រ្តីខេត្តក្រុង ត្រូវចុះពិនិត្យមើល អណ្តូង ស្រះទឹក និងរកវិធីដោះស្រាយជាបន្ទាន់នៅពេលអណ្តូងខូច និងទឹកស្រះរីងស្ងួត។ ទី២ ត្រូវធ្វើការណែនាំ និងអប់រំផ្សព្វផ្សាយ ដល់ប្រជាពលរដ្ឋដែលរស់នៅតាមតំបន់ដែលងាយរងគ្រោះ ដោយសារខ្វះខាតទឹកឱ្យបង្កើនការយកចិត្តទុកដាក់ខ្ពស់ ក្នុងការថែរក្សាប្រភពទឹកសម្រាប់ប្រើប្រាស់ប្រចាំថ្ងៃ និងប្រើប្រាស់ទឹកក្នុងលក្ខណៈសន្សំសំចៃ។ ទី៣ ត្រូវទំនាក់ទំនងជាមួយអាជ្ញាធរមូលដ្ឋាន ដៃគូអភិវឌ្ឍន៍នានា អង្គការជាតិ និងអន្តរជាតិដើម្បីឆ្លើយតបភ្លាមៗដល់ប្រជាពលរដ្ឋដែលកំពុងខ្វះខាតទឹកប្រើប្រាស់ ។ ចុងក្រោយ ត្រូវធ្វើរបាយការណ៍ និងរាយការណ៍ជាប្រចាំមកក្រសួងដើម្បីមានវិធានការជួយជាបន្ទាន់។
ទឹកជំនន់ក្នុងឆ្នាំ២០០៩ ឆ្នាំ២០១១ និងឆ្នាំ២០១៣បាននាំឱ្យមានការខូចខាតគិតជាទឹកប្រាក់គឺជាងមួយពាន់លានដុល្លារ ហើយវាបណ្តាលឲ្យបាត់បង់ជីវិតមនុស្ស៤៦១នាក់។
របាយការណ៍ហានិភ័យឆ្នាំ២០១៥ របស់អង្គការសហប្រជាជាតិ ឲ្យដឹងថា ប្រទេសកម្ពុជា គឺជាប្រទេសទី៩ ដែលងាយរងគ្រោះជាងគេដោយសារគ្រោះមហន្តរាយនៅលើពិភពលោក ដែលជាឧបសគ្គដល់ដំណើរការអភិវឌ្ឍសម្រាប់ប្រទេសនេះ។ ករណីនេះ បានធ្វើឲ្យខូចខាតដល់វិស័យសំខាន់ៗមួយចំនួន ដូចជា កសិកម្ម សេដ្ឋកិច្ច សុខភាព និងអប់រំជាដើម។ ជាងនេះទៀត បើតាមតួលេខព្យាករណ៍របស់អង្គការសុខភាពពិភពលោក នៅរវាងពីឆ្នាំ២០៣០ ដល់ឆ្នាំ២០៥០ ការប្រែប្រួលអាកាសធាតុ នឹងអាចបង្កឲ្យមានមនុស្សស្លាប់បន្ថែមប្រមាណ ២៥ម៉ឺននាក់ (២៥០.០០០នាក់) ក្នុងមួយឆ្នាំៗ ក្នុងនោះជិត ៤ម៉ឺននាក់ (៣៨.០០០នាក់) ស្លាប់ដោយសារកម្ដៅខ្លាំង ជិត ៥ម៉ឺននាក់ (៤៨.០០០នាក់) ដោយការរាករូស ៦ម៉ឺននាក់ដោយរោគគ្រុនចាញ់ និងជិត ១០ម៉ឺននាក់ (៩៥.០០០នាក់) ជាកុមារដោយសារកង្វះចំណីអាហារ៕