ភ្នំពេញ៖ សហជីពធំមួយដែលគាំទ្រផលប្រយោជន៍កម្មករ បានសម្តែងក្តីព្រួយបារម្ភបន្ទាប់ពីសហគមន៍អឺរ៉ុបបានព្រមានពីការដកពន្ធអនុគ្រោះចេញពីកម្ពុជា ដែលជាហេតុនាំឱ្យប៉ះពាល់ដល់កំណើនសេដ្ឋកិច្ចកម្ពុជា។ ស្របគ្នានេះ ស្ថាប័នដែលធ្វើការលើវិស័យកម្មករកាត់ដេរក៏ព្រមានពីផលវិបាកជាច្រើន បើសហភាពអឺរ៉ុបពិជាដកគោលការអនុគ្រោះពន្ធពីកម្ពុជាមែននោះ។
(លោក សោម លាភ រាយការណ៍ពីព័ត៌មាននេះ)
លោក រ៉ុង ឈុន ប្រធានសហភាពសហជីពការងារកម្ពុជា បានគូសបញ្ជាក់ប្រាប់វិទ្យុស្រ្តីនៅថ្ងៃទី២៣ តុលានេះថា កម្ពុជានឹងខានបង់ផលចំណេញយ៉ាងច្រើន បើសិនជាសហភាពអឺរ៉ុបពិតជាព្យួរការអនុគ្រោះពន្ធអ្វីៗគ្រប់យ៉ាងក្រៅពីអាវុធ EBA ពីកម្ពុជាមែននោះ។ លោកបន្ថែមថា ប្រសិនបើមានការដកការអនុគ្រោះពន្ធ នោះនឹងបង្កផលប៉ះពាល់ដល់កម្មករដោយផ្ទាល់ ចំណែក សាច់ញាតិកម្មករ អ្នកលក់ដូរនៅតាមរោងចក្រ អ្នកដឹកកម្មករ និងម្ចាស់ផ្ទះជួលជាដើម នឹងទទួលបានផលប្រយោជន៍ជាប្រយោលពីបញ្ហានេះ។
ជុំវិញរឿងនេះ ភ្នាក់ងារវាយតម្លៃចំណាត់ថ្នាក់ឥណទានពិភពលោក (Moody’s Investors Service) កាលពីថ្ងៃ២០តុលា បានព្រមានថា ការបាត់បង់ប្រព័ន្ធអនុគ្រោះពន្ធពាណិជ្ជកម្មរបស់កម្ពុជា ក្នុងការនាំទំនិញចូលទៅសហភាពអឺរ៉ុប នឹងធ្វើឱ្យប៉ះពាល់ដល់កំណើនសេដ្ឋកិច្ច។ ទីភ្នាក់ងារនេះបញ្ជាក់ក្នុងរបាយការណ៍របស់ខ្លួនថា កំណើនសេដ្ឋកិច្ចកម្ពុជារឹងមាំបាន ដោយសារមានវិស័យកាត់ដេរសម្លៀកបំពាក់ និងវាយនភ័ណ្ឌ។
យ៉ាងណាភ្នាក់ងារដដែលនេះ វាយតម្លៃថា ការដក EBA ពីកម្ពុជា អាចបង្កើនល្បឿនកិច្ចខិតខំប្រឹងប្រែងរបស់កម្ពុជា ក្នុងការធ្វើពិពិធកម្មនៅក្នុងឧស្សាហកម្មផលិតកម្មផ្សេងៗ។
ស្របគ្នានេះកាលពីថ្ងៃទី២២ តុលាម្សិលមិញ សមាគមរោងចក្រកាត់ដេរនៅកម្ពុជាហៅកាត់(GMAC) តំណាងឱ្យរោងចក្រកាត់ដេរសម្លៀកបំពាក់ និងស្បែកជើងនាំចេញទាំងអស់ក្នុងប្រទេសកម្ពុជា បានចេញលិខិតមួយច្បាប់ ទៅកាន់លោកស្រី Cecilia Malmström ស្នងការពាណិជ្ជកម្ម នៃគណៈកម្មការអឺរ៉ុប ដោយអះអាងថា ការព្យួរបណ្តោះអាសន្ននៃគម្រោង EBA ឬទណ្ឌកម្មឯកតោភាគីរយៈពេលខ្លីមកលើកម្ពុជា អាចមានផលប៉ះពាល់អវិជ្ជមានរយៈពេលវែង ដល់ជីវិតនិងជីវភាពកម្មករ កម្មការនី ព្រមទាំងគ្រួសាររបស់ពួកគេនៅកម្ពុជា។
GMAC បន្ថែមថា កម្មករ កម្មាការិនីប្រមាណ៧០ម៉ឺននាក់នឹងប្រឈមបាត់បង់ការងារ ប្រសិនបើសហភាពអឺរ៉ុបដកពន្ធអនុគ្រោះ។ ចំណែកគ្រួសាររបស់កម្មករនឹងអាចធ្លាក់ក្នុងភាពក្រីក្រវិញជាពុំខាន។
ជាដំណោះស្រាយសម្រាប់កម្ពុជាដែលគួរធ្វើក្នុងដំណាក់កាលនេះ លោក រ៉ុង ឈុន ឱ្យដឹងថា កម្ពុជាគួរតែធ្វើតាមការចង់បានរបស់សហភាពអឺរ៉ុប ឬអង្គការអន្តរជាតិធំៗផ្សេងៗ។ លោកថា កម្ពុជាគ្រាន់តែធ្វើឱ្យស្ថានភាពនយោបាយកម្ពុជាដូចកាលពីមុនការបោះឆ្នោត ឬអាចរៀបចំការបោះឆ្នោតឡើងវិញ។
ទោះបីជាយ៉ាងណាក៏ដោយ ប្រធានសហជីពរូបនេះថា ខ្លួននៅតែធ្វើបាតុកម្មដើម្បីស្នើឱ្យរាជរដ្ឋាភិបាលកម្ពុជាអនុវត្តតាមការស្នើពីសហភាពអឺរ៉ុប ហើយបាតុកម្មនេះអាចនឹងមានការចូលរួមពីស្ថាប័នមួយចំនួន ដូចជា GMAC ជាដើម។
សូមបញ្ជាក់ថា អ្វីៗគ្រប់យ៉ាងលើលែងតែអាវុធ (EBA) ត្រូវបានអនុម័តដោយ វិធានរបស់ក្រុមប្រឹក្សា សហភាពអឺរ៉ុប លេខ No.416/2001 ចុះថ្ងៃទី២៨ ខែកុម្ភៈ ឆ្នាំ២០០១។ EBA គឺជាគំនិតផ្តួចផ្តើម របស់សហភាពអឺរ៉ុប ដែលអនុញ្ញាតឱ្យ ការនាំចូលទំនិញទាំងអស់ លើកលែងតែសព្វាវុធ ទៅសហភាពអឺរ៉ុបពីប្រទេសអភិវឌ្ឍន៍តិចតួចទទួលនូវការអនុគ្រោះដោយមិនជាប់ពន្ធនាំចូលនិងកូតា ក្នុងនោះគឺមានកម្ពុជាផងដែរ។
យ៉ាងណា ក្រោយពីការបោះឆ្នោតសភានីតិកាលទី ៦ កាលពីថ្ងៃទី ២៩ កក្កដាកន្លង សហភាពអឺរ៉ុបបានគម្រាមកាន់តែខ្លាំងចំពោះការដកការអនុគ្រោះពន្ធនេះ បើកម្ពុជាមិនស្ដាលទ្ធិប្រជាធិបតេយ្យនៅកម្ពុជាវិញ ដោយរៀបចំការបោះឆ្នោតឱ្យមានភាពសេរី និងត្រឹមត្រូវវិញទេនោះ៕
អត្ថបទ៖ លោក សោម លាភ