ភ្នំពេញ៖ លោក Robeto Cavatho Azevedo អគ្គនាយកអង្គការពាណិជ្ជកម្មពិភពលោក WTO ( World Trade Organization ) មានប្រសាសន៍ប្រាប់នាយករដ្ឋមន្រ្តីកម្ពុជាថា ប្រទេសកម្ពុជា ជាប្រទេសដែលមានការអភិវឌ្ឍតិចតួចនៅឡើយ។ នេះបើយោងតាមការចុះផ្សាយលើទំព័រហ្វេសបុករបស់សម្ដេច ហ៊ុន សែន នៅថ្ងៃពីថ្ងៃទី ២៣ តុលានេះ។
បើតាមហ្វេសប៊ុកសម្តេច ហ៊ុន សែន ការថ្លែងរបស់អគ្គនាយកអង្គការពាណិជ្ជកម្មពិភពលោក ធ្វើឡើងនៅក្នុងជំនួបពិភាក្សាការងារមួយរវាងលោក និងសម្ដេច ហ៊ុន សែន កាលពីល្ងាចថ្ងៃទី ២២តុលាម្សិលមិញ។
នាឱកាសនោះ លោក Robeto Cavatho Azevedo មានប្រសាសន៍ជំរាបសម្តេច ហ៊ុន សែនថា កម្ពុជាគឺជាប្រទេសដែល មានការអភិវឌ្ឍនៅមានកម្រិតនៅឡើយ។ ប៉ុន្តែ អគ្គនាយកនៃអង្គការពាណិជ្ជកម្មពិភពលោក រូបនេះបញ្ជាក់ទៀតថា ប្រទេសកម្ពុជាគឺជាប្រទេសមួយដែលបានក្លាយជាសមាជិក របស់អង្គការពាណិជ្ជកម្មពិភពលោក (WTO) ហើយបានអនុវត្តដោយជោគជ័យ ក្នុងចំណោមប្រទេសមានសេដ្ឋកិច្ចលូតលាស់លឿនបំផុតនៅក្នុងពិភព លោក។
យ៉ាងណាមិញ លោក Robeto Cavatho Azevedo បង្ហាញក្ដីសង្ឃឹមថា សម្ដេច ហ៊ុន សែន នឹងធ្វើទស្សនកិច្ច នៅទីស្ដីស្នាក់ការណ្តាលរបស់ អង្គការពាណិជ្ជកម្មពិភពលោកលើកក្រោយទៀត ។
នាយករដ្ឋមន្រ្តីកម្ពុជាមានប្រសាសន៍ថា នៅឆ្នាំ២០១៨ ដល់ឆ្នាំ២០២០ កម្ពុជាស្ថិតនៅក្នុងយន្តការត្រីភាគី នៃក្របខណ្ឌអង្គការពាណិជ្ជកម្មពិភពលោក ហេតុនេះសម្ដេចសង្ឃឹមថា កម្ពុជានឹងបន្តទទួលបាននូវជំនួយពីអង្គការនេះ។
គួររំឮកថា កម្ពុជាទទួលបានជំនួយផ្នែកបច្ចេកទេសពីអង្គការពាណិជ្ជកម្មពិភពលោក មានទឹកប្រាក់ប្រមាណ ៧,៧លានដុល្លា ចន្លោះពីឆ្នាំ២០១០ ដល់ឆ្នាំ២០១៨ ។ ជាងនេះ ក្នុងរយៈពេល ៤ឆ្នាំចុងក្រោយ អង្គការពាណិជ្ជកម្មពិភពលោក ក៏បានចូលរួមបណ្ដុះបណ្ដាល កសាងសមត្ថភាពមន្រ្តីកម្ពុជាមានចំនួនរហូតដល់ ៤១១នាក់ ដែលជាមន្រ្តីរបស់រាជរដ្ឋាភិបាលកម្ពុជា៕
អត្ថបទ៖លោក សោម លាភ
