ភ្នំពេញ ៖ ក្រសួងការបរទេសកម្ពុជា បានប្រាប់ឲ្យដឹងថា កម្ពុជា គ្រោងចុះហត្ថលេខាលើកិច្ចព្រមព្រៀងចំនួន បី ជាមួយប្រទេសឥណ្ឌា។ នេះបើយោងតាមសេចក្ដីប្រកាសព័ត៌មានរបស់ក្រសួងការបរទេសកម្ពុជា ផ្សព្វផ្សាយកាលពីថ្ងៃទី២៤ ខែសីហា ម្សិលមិញ។
កិច្ចព្រមព្រៀងទាំង បី នោះរួមមាន កិច្ចព្រមព្រៀងរវាងរដ្ឋាភិបាល នៃសាធារណរដ្ឋឥណ្ឌា និងរាជរដ្ឋាភិបាលកម្ពុជា សម្រាប់ការអភិរក្ស ជួសជុលប្រាសាទព្រះវិហារ។ អនុស្សរណៈ នៃកិច្ចសហប្រតិបត្ដិការរវាងក្រសួងសុខាភិបាល និងកិច្ចការគ្រួសារ នៃសាធារណរដ្ឋឥណ្ឌា និងក្រសួងសុខាភិបាលកម្ពុជា ស្ដីពីកិច្ចសហប្រតិបត្ដិការលើវិស័យសុខភាព និងឱសថ។ នឹងមួយវិញទៀត អនុស្សរណៈ នៃការយោគយល់គ្នា រវាងវិទ្យាស្ថានជាតិការទូត និងទំនាក់ទំនង នៃក្រសួងការបរទេសកម្ពុជា និងវិទ្យាស្ថានបរទេស នៃក្រសួងការបរទេស ឥណ្ឌា។
ក្រសួងការបរទេសកម្ពុជា បញ្ញាក់ថា កិច្ចព្រមព្រៀងទាំងបីនេះ នឹងត្រូវចុះហត្ថលេខា ខណៈដែលលោកស្រី ស៊ុសម៉ា ស្វារ៉ាច រដ្ឋមន្ដ្រីការបរទេស នៃសាធារណរដ្ឋឥណ្ឌា មកបំពេញទស្សនកិច្ចនៅប្រទេសកម្ពុជា រយៈពេល ៣ថ្ងៃ ចាប់ពីថ្ងៃទី២៨ ដល់ថ្ងៃទី៣០ ខែសីហា ឆ្នាំ២០១៨។ ក្រៅពីចុះហត្ថលេខាលើកិច្ចព្រមព្រៀងទាំងបីនេះហើយ លោកស្រីរដ្ឋមន្ដ្រីការបរទេសឥណ្ដា ក៏នឹងចូលជួបសម្ដែងការគួរសមចំពោះប្រមុខដឹកនាំកំពូលៗ របស់កម្ពុជាផងដែរ៕
