សៀមរាប៖ ប្រាសាទអង្គរវត្តដែលជាកេរដំណែលពីដូនតានៃកម្ពុជាបានទទួលចំណាត់ថ្នាក់លេខ១ ពីទីភ្នាក់ងារប្រឹក្សាយោបល់លើការធ្វើដំណើរ (TripAdviser) ជាសំណង់ប្រវត្តិសាស្ត្រដ៏អស្ចារ្យបំផុតលើពិភពលោកសម្រាប់ឆ្នាំ២០១៨។ នេះបើតាមការចុះផ្សាយលើទំព័រហ្វេសបុករបស់ក្រសួងទេសសចរណ៍ នៅថ្ងៃទី ១០ សីហានេះ។
លោក សោម លាភ រាយការណ៍ !
ក្នុងសេចក្ដីជូនដំណឹងនេះបញ្ជាក់ទៀតថា ទីភ្នាក់ងារប្រឹក្សាយោបល់លើការធ្វើដំណើរ បង្ហាញថាភ្ញៀវទេសចរអន្តរជាតិរាប់លាននាក់ មានចាប់អារម្មណ៍យ៉ាងច្រើនលើសលុបលើបា្រសាទអង្គរវត្តរបស់កម្ពុជា។ ការណ៍នេះធ្វើឱ្យបា្រសាទអង្គរវត្តរបស់កម្ពុជា ទទួលបានជ័យលាភីលេខ១ ជាសំណង់ប្រវត្តិសាស្ត្រដ៏អស្ចារ្យបំផុតក្នុងលោក ដែលបញ្ជាក់ថា ពិភពលោកនៅតែសាទរចំពោះសំណង់អច្ឆរិយនៃកម្ពុជា។
លោកស្រី Sarah Mathews ជានាយកភ្នាក់ងារប្រឹក្សាយោបល់លើការធ្វើដំណើរ បានលើកឡើងថា ការផ្ដល់ចំណាត់ថ្នាក់លេខ១ ដល់ប្រាសាទអង្គរវត្តរបស់ប្រទេសកម្ពុជា ជា សំណង់ប្រវត្តិសាស្ដ្រដ៏អស្ចារ្យបំផុតក្នុងឆ្នាំ២០១៨នេះ ធ្វើឡើងតាមរយៈការស្រង់មតិរយៈពេល១២ខែ លើចំណាប់អារម្មណ៍ និងទស្សនៈរបស់អ្នកទេសចរណ៍រាប់លាននាក់ជុំវិញពិភពលោក កាលពីថ្ងៃទី២២ ខែឧសភា ឆ្នាំ២០១៨។
លោកស្រីបានផ្ដល់ពានរង្វាន់នេះ ទៅលោក ថោង ខុន រដ្ឋមន្ត្រីក្រសួងទេសចរណ៍ ការលពីរសៀលថ្ងៃទី ៩ សីហា ម្សិលមិញ នៅមុខប្រាសាទអង្គរវត្ត។
នេះមិនមែនជាលើកទីមួយទេដែលកេរមរតកដូនតាខ្មែរបានទទួលពានរង្វាន់លំដាប់ថ្នាក់ពិភពលោកពីស្ថាប័នវាយតម្លៃអន្តរជាតិជាច្រើននោះ។ ជាក់ស្ដែងនៅឆ្នាំ២០១៤ អង្គរវត្តជាប់ចំណាត់ថ្នាក់លេខ១ ជាតំបន់បុរាណវិទ្យា និងប្រវត្តិសាស្ត្រដ៏ទាក់ទាញបំផុតលើពិភពលោក នៅលើគេហទំព័រ ArcheaoMadness។ នៅឆ្នាំ២០១៦ អង្គរវត្តបានជាប់ចំណាត់ថ្នាក់លេខ១ ជារមណីយដ្ឋានទេសចរណ៍វប្បធម៌ដ៏ល្បីល្បាញលើពិភពលោក នៅលើគេហទំព័រ Lonely Planet។
នៅឆ្នាំ២០១៨នេះ រាជធានីអង្គរក៏ទទួលបានជ័យលាភីជារាជធានីទេសចរណ៍ និងវប្បធម៌ពិភពលោកផងដែរ។ ជាងនេះទៀត តាមរយៈការសិក្សាស្រាវជ្រាវរបស់គេហទំព័រ Expat Insider បញ្ជាក់ថា កម្ពុជាបានទទួលជ័យលាភី ជាគោលដៅទេសចរណ៍ ដែលមានភាពស្និទ្ធស្នាលបំផុតសម្រាប់ភ្ញៀវទេសចរបរទេស ។ ជយលាភីទាំងនេះ ត្រូវបានរៀបចំ និងចាត់ចំណាត់ដោយគេហទំព័រល្បីៗលើពិភពលោកផ្សេងៗគ្នា។
សុខ សង្វារ អគ្គនាយករងអាជ្ញាធរជាតិអប្សរាបានបង្ហាញសុទិដិនិយមថា តាមរយៈការផ្ដល់ចំណាត់ថ្នាក់លេខ១ដល់ប្រាសាទអង្គរវត្តនេះ ជាមូលហេតុមួយដែលធ្វើឱ្យភ្ញៀវទេសចរអន្តរជាតិជាច្រើនបន្ថែមទៀត មកទស្សនានៅកម្ពុជា និងក៏ជាការចូលរួមផ្សព្វផ្សាយទៅកាន់ពិភពលោកកាន់តែទូលំទូលាយអំពីភាពអច្ឆរិយៈនៃកម្ពុជាទៀតផង។
សូមបញ្ជាក់ថា ខេត្តសៀមរាប គឺជាខេត្តមួយពោរពេញទៅដោយសក្ដានុពលទេសចរណ៍ខ្ពស់ ដែលទាក់ទាញភ្ញៀវទេសចរជាតិ-អន្តរជាតិយ៉ាងច្រើនទៅទស្សនាកម្សាន្ត ជាពិសេសគឺតំបន់អង្គរតែម្តង។ ជាក់ស្ដែងគិតចាប់ពីខែ មករា ដល់ខែមិថុនា ឆ្នាំ២០១៨ កម្ពុជារកចំណូលបាន ពីការលក់សំបុត្រចូលទស្សនារមណីយដ្ឋានអង្គរ បានប្រមាណជាង ៦០ លានដុល្លារអាមេរិក ដែលមានការកើនឡើងជិត ១៨% ធៀបនឹងរយៈពេលដូចគ្នាកាលពីឆ្នាំ ២០១៧។ នេះបើតាមរបាយការណ៍ដែលបានចេញផ្សាយដោយគ្រឹះស្ថានអង្គរ។ តាមរយៈកំណើនទេសចរនៅឆ្នាំ២០១៨នេះ ត្រូវបានក្រសួងទេសចរណ៍រំពឹងថា នឹងមានកំណើនប្រមាណ១២% ឬស្មើនឹងចំនួនទេសចរប្រមាណ ៦លាននាក់ ខណៈដែលនៅឆ្នាំ ២០២០ គេរំពឹងថា ភ្ញៀវទេសចរនឹងកើនឡើងដល់លើស ៧លាននាក់ និងឆ្នាំ ២០២៥ ទៅ២០៣០ អាចកើនដល់ពី ១២ ទៅ១៥លាននាក់ ជាមួយនឹងចំណូលរំពឹងទុកពីវិស័យនេះ មានជាង ១០ពាន់លានដុល្លារអាមេរិក៕
