ភ្នំពេញ ៖ គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានចេញសេចក្ដីបំភ្លឺមួយកាលពីថ្ងៃទី០៣ ខែសីហា ឆ្នាំ២០១៨ ដែលប្រតិកម្មទៅនឹងការលើកឡើងរបស់ប្រធានគណបក្សសម្ព័ន្ធដើម្បីប្រជាធិបតេយ្យ (LDP) ដែលបាននិយាយចោទប្រកាន់ទៅលើមន្ដ្រីរបស់ គ.ជ.ប ពាក់ព័ន្ធនិងដំណើរការបោះឆ្នោតជ្រើសតាំងតំណាងរាស្ដ្រកាលពីថ្ងៃទី២៩ ខែកក្ដដា ឆ្នាំ២០១៨។
លោក លៀ ស៊ីណា រាយការណ៍ ៖
តាមសេចក្ដីបំភ្លឺនេះ គ.ជ.ប បានស្រង់សម្ដីលោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ ពីក្នុងបទសម្ភាសន៍ជាមួយវិទ្យុបារាំងអន្ដរជាតិ RFI កាលពីថ្ងៃទី០១ ខែសីហា កន្លងទៅ ដែលប្រធានគណបក្សនេះ និយាយថា គណៈកម្មការការិយាល័យបោះឆ្នោត រួមគំនិតជាមួយអាជ្ញាធរ ធ្វើការគាបសង្កត់ភ្នាក់ងារគណបក្សនយោបាយ ដែលសង្កេតការបោះឆ្នោត និងរាប់សន្លឹកឆ្នោតនៅតាមការិយាល័យបោះឆ្នោត។ បន្ថែមពីនេះលោក ខឹម វាសនា បាននិយាយទៀតថា ភ្នាក់ងារគណបក្សនយោបាយ ត្រូវប្រធានការិយាល័យបោះឆ្នោតបង្ខំឲ្យចុះហត្ថលេខាលើទម្រង់ ១១០១ និង ទម្រង់ ១១០២ មុនដំណើរការបោះឆ្នោត និងរាប់សន្លឹកឆ្នោត និងមានការចាប់វាយខ្នោះពីសំណាក់អាជ្ញាធរមានសមត្ថកិច្ច ដោយសារការមិនចុះហត្ថលេខានេះ។
ជាងនេះ ប្រធានគណបក្សសម្ព័ន្ធដើម្បីប្រជាធិបតេយ្យ បានអះអាងទៀតថា ប្រជាពលរដ្ឋចេញទៅបោះឆ្នោតយ៉ាងច្រើនបំផុតត្រឹម តែ៧០ភាគរយ និងមានការហាមឃាត់ពីសំណាក់ប្រធានការិយាល័យបោះឆ្នោត មិនឲ្យថតរូបសកម្មភាពដំណើរការរាប់សន្លឹកឆ្នោត។
ជុំវិញការចោទប្រកាន់ទាំងប៉ុន្មានខាងលើនេះ គណៈកម្មាធិការជាតិរៀបចំការបោះឆ្នោត បានបញ្ជាក់ក្នុងសេចក្ដីបំភ្លឺរបស់ខ្លួន ដោយបដិសេធចោលទាំងស្រុង និងអះអាងថា ការលើកឡើងរបស់លោក ខឹម វាសនា គឺផ្ទុយពីការពិត។ គ.ជ.ប ទាមទារឲ្យលោក ខឹម វាសនា បង្ហាញភស្ដុតាងទៅកាន់ គ.ជ.ប ករណីដែលលោកថា មានការគាបសង្កត់ភ្នាក់ងារគណបក្សនយោបាយ ដែលសង្កេតមើលការបោះឆ្នោត និងរាប់សន្លឹកឆ្នោតនៅតាមការិយាល័យបោះឆ្នោត។
លើសពីនេះ គ.ជ.ប បញ្ជាក់ថា ការចុះហត្ថលេខាលើទម្រង់ ១១០១ និងទម្រង់ ១១០២ មិនមែនជាការចាប់បង្ខំទេ គឺធ្វើឡើងដោយស្ម័គ្រចិត្ដ ហើយការមិនព្រមចុះហត្ថលេខារបស់ភ្នាក់ងារគនបក្សនយោបាយ មិនអាចមោឃភាពទម្រង់ទាំង ២នេះបានឡើយ។ ដោយឡែកចំពោះការវាយខ្នោះ គឺជាការនិយាយបំផ្លើស ពីព្រោះថា នៅការិយាល័យបោះឆ្នោត នៃឃុំចំនួន ៣ ក្នុងខេត្ដកំពង់ធំ ភ្នាក់គណបក្ស LDP បានធ្វើការរំខានដល់ដំណើរការបោះឆ្នោត និងរាប់សន្លឹកឆ្នោត បើទោះជាមានការណែនាំច្រើនលើកច្រើនសា ពីប្រធានការិយាល័យបោះឆ្នោតក៏ដោយ។ ព្រោះតែដូច្នេះទើបមន្ដ្រីការិយាល័យបោះឆ្នោត តម្រូវឲ្យនាំភ្នាក់ងារដែលរំខាននោះចេញពីការិយាល័យបោះឆ្នោត ក៏ប៉ុន្ដែគឺពុំបានដាក់ខ្នោះនោះទេ។
ចំណែការដែលលោក ខឹម វាសនា និយាយថា ពលរដ្ឋចេញទៅបោះឆ្នោតបានត្រឹមតែ ៧០ភាគរយនោះ គ.ជ.ប បានអះអាងដោយបដិសេធចោលទាំងស្រុង ហើយបញ្ជាក់ថា ការបោះឆ្នោតជ្រើសតាំងតំណាងរាស្ដ្រនីតិកាលទី០៦ ឆ្នាំ២០១៨ ពលរដ្ឋបានចេញទៅបោះឆ្នោតរហូតដល់ ៨២,៨៩ភាគរយ។ មួយវិញទៀត ករណីដែលថា មានការហាមឃាត់មិនឲ្យថតរូបសកម្មភាពរាប់សន្លឹកឆ្នោត គ.ជ.ប ទទួលស្គាល់ថា ពិតជាមានមន្ដ្រីការិយាល័យបោះឆ្នោតមួយចំនួនតូច អនុវត្ដមិនបានល្អចំពោះករណីថតរូបនេះ ក៏ប៉ុន្ដែក្រោយពីមានអន្ដរាគមន៍របស់ គណៈកម្មការរាជធានី ខេត្ដ រៀបចំការបោះឆ្នោត សកម្មភាពថតរូបក៏ត្រូវអនុញ្ញាតឲ្យដំណើរការធម្មតា។
គ.ជ.ប បានប្រាប់ថា ខ្លួនបានទទួលបណ្ដឹងពី LDP ចំនួន ២៥៩២ ក្នុងនោះបណ្ដឹងពាក់ព័ន្ធនឹងគំនូសសញ្ញានៅលើសន្លឹកឆ្នោតមានរហូតដល់ទៅ ២៤៩៣បណ្ដឹង ហើយបណ្ដឹងដែលពាក់ព័ន្ធនឹងការផ្ដន្ទាទោសមានចំនួនត្រឹមតែ ៩៩បណ្ដឹង សម្រាប់ ៩៩ការិយាល័យ នៃការិយាល័យបោះឆ្នោតសរុបចំនួន ២២៩៦៧ ប៉ុណ្ណោះ។
តាមរយៈសេចក្ដីបំភ្លឺនេះ គណៈកម្មាធិការជាតិរៀបចំការបោះឆ្នោត ស្នើឲ្យអ្នកដែលនិយាយ ឬថ្លែងណាមួយ គួរផ្អែកទៅលើភស្ដុតាង និងមូលដ្ឋានច្បាស់លាស់ ដើម្បីជៀសវាងការភាន់ច្រឡំ ដែលនាំឲ្យបាត់ទំនុកចិត្ដលើការបោះឆ្នោត ដែលជាសមត្ថកិច្ចពេញលេញរបស់ គ.ជ.ប ស្រប់តាមរដ្ឋធម្មនុញ្ញ និងច្បាប់៕