ភ្នំពេញ៖ ស្ថានទូតអាមេរិកបានសម្ដែងនូវការសោកស្ដាយ និងព្រួយបារម្ភចំពោះគ្រួសារសម្ដេចក្រុមព្រះ ក្រោយការជួបគ្រោះថ្នាក់ចរាចរណ៍ ដែលអោយព្រះអង្គរងរបួសធ្ងន់ និងអ្នកម្នាងបានបាត់បង់ជីវិត។ នេះបើតាមការចុះផ្សាយលើទំព័រហ្វេសបុករបស់ស្ថានទូតសហរដ្ឋអាមេរិកប្រចាំនៅកម្ពុជា កាលពីថ្ងៃទី ១៨ មិថុនា ម្សិលមិញ។
តាមរយៈការចុះផ្សាយនេះ ស្ថានទូតអាមេរិកបានសំដែងនូវសមានទុក្ខយ៉ាងជ្រាលជ្រៅបំផុតចំពោះគ្រោះថ្នាក់ចរាចរណ៍ដែលកើតឡើងចំពោះគ្រួសាររបស់សម្ដេចក្រុមព្រះប្រធានគណៈបក្សហ្វុនស៊ិនប៉ិច ដែលឈានទៅដល់ការបាត់បង់ជីវិតរបស់អ្នកម្នាងអ៊ុក ផល្លា កាលពីថ្ងៃទី ១៧ មិថុនានេះ។ យ៉ាងណាក្ដីស្ថានទូតអាមេរិកសំដែងក្តីព្រួយបារម្ភផងដែរ ចំពោះស្វាម៉ីរបស់អ្នកម្នាង គឺសម្តេចក្រុមព្រះ នរោត្តម រណប្ញទ្ធិ ដែលបានរងរបួសយ៉ាងធ្ងន់ នៅក្នុងគ្រោះថ្នាក់នេះ។
សូមបញ្ជាក់ថា កាលពីថ្ងៃទី ១៧ មិថុនា មានគ្រោះថ្នាក់ចរាចរណ៍ទៅលើក្បួនឡានរបស់សម្ដេចក្រុមព្រះនរោត្តមរណឫទ្ធិ ដែលគ្រោះថ្នាក់នេះបណ្ដាលឲ្យមនុស្សចំនួន ៧នាក់រងរបួសធ្ងន់ និងស្រាល ដែលក្នុងនោះសម្ដេចក្រុមព្រះ រងរបួសធ្ងន់ ហើយបានបញ្ជូនទៅសង្គ្រោះបន្ទាន់ភ្លាមៗនៅគ្លីនិកសេតេ ខេត្តព្រះសីហនុ។ គ្រោះថ្នាក់នេះទៀតសោត បានផ្ដាច់យកជីវិតរបស់អ្នកម្នាង អ៊ុក ផល្លា ក្រោយពីក្រុមការងារគណបក្សមួយនេះបញ្ជូនទៅមន្ទីរពេទ្យក្នុងខេត្តព្រះសីហនុ។
សម្ដេចក្រុមព្រះ ដែលរងរបួសធ្ងន់ត្រូវបានបញ្ជូនទៅព្យាបាលនៅមន្ទីរពេទ្យមួយនៅទីក្រុងបាងកក។
នេះជាឧបទ្ធវហេតុទីពីរដែលបានកើតលើសម្ដេចក្រុមព្រះនិង អ្នកម្នាងអ៊ុងផល្លា ដែលលើកទីមួយ កើតឡើង នៅឆ្នាំ២០១៥ នៅខេត្តកំពង់ចាមហើយពេលនោះ អ្នកម្នាងបានរងរបួសធ្ងន់ធ្ងរ៕
