ភ្នំពេញ៖សម្តេច ហ៊ុន សែន នាយករដ្ឋមន្ត្រី បានណែនាំឲ្យអាជ្ញាធរមានសមត្ថកិច្ចតាមចាប់ខ្លួនជនដៃដល់បង្កហិង្សាលើលោកសាស្ត្រាចារ្យសកលវិទ្យាល័យកម្ពុជាម្នាក់ឲ្យរងរបួសធ្ងន់កំពុងសម្រាកព្យាបាលនៅក្រៅប្រទេសយកមកកាត់ទោសតាមច្បាប់។រហូតមកដល់ពេលនេះអាជ្ញាធរបានឃាត់និងឃុំខ្លួនជនសង្ស័យបីនាក់ករណីវាយដំក្នុងករណីគ្រោះថ្នាក់ចរាចរណ៍ កាលពីសប្តាហ៍មុន។
នៅក្នុងកម្មវិធីសំណេះសំណាលជាមួយកម្មកររោងជាង១ម៉ឺននាក់នៅខណ្ឌពោធិ៍សែនជ័យ រាជធានីភ្នំពេញ នៅថ្ងៃទី ២១ ខែ មីនានេះ សម្តេច ហ៊ុន សែន បានអំពាវនាវដល់អាជ្ញាធរមានសមត្ថកិច្ចតាមស្វែងរកចាប់ខ្លួនជនដៃដល់មួយចំនួនទៀតដែលបានបង្កហិង្សាលោកបណ្ឌិត ស៊ុយ សារ៉េត សាស្ត្រាចារ្យសកលវិទ្យាល័យកម្ពុជាឲ្យរងរបួសធ្ងន់ស្ទើស្លាប់យកមកផ្តន្ទាទោសតាមច្បាប់។
សម្តេច ហ៊ុនសែន៖«ខ្ញុំពិតជាសោកស្តាយនិងបង្ហាញនូវការឈឺចាប់។តើហេតុអ្វីទៅបានជាកើតជាសីលធម៌បែបនេះចំពោះមនុស្សមួយក្រុមតូចណាមួយនោះ។ឥឡូវត្រូវបានចាប់ខ្លួនមួយចំនួនហើយ យើងនឹងបន្តតាមរកស្វែងចាប់ខ្លួនដោយមិនត្រូវឲ្យអ្នកជនពាលបែបនេះបង្កើតឡើងនូវស្ថានភាពហើយដោយខ្វះការទទួលខុសចំពោះផ្នែកព្រហ្មទណ្ឌនោះទេ។»
សម្តេច ហ៊ុន សែន ថ្លែងថ្កោលទោសចំពោះការវាយប្រហារទៅលើលោកសាស្ត្រាចារ្យក្នុងករណីគ្រោះថ្នាក់ចរាចរណ៍។ប៉ុន្តែសម្តេចប្រជាជនរដ្ឋត្រូវចាប់ជនសង្ស័យបញ្ជូនទៅឲ្យអាជ្ញាធរមានសមត្ថកិច្ចដោយមិនត្រូវប្រើអំពើហិង្សាលើពួកគេទេ។
កាលពីថ្ងៃទី១១ ខែមីនា លោកបណ្ឌិត ស៊ុយ សារ៉េត សាស្ត្រាចារ្យភាសាអង់គ្លេសនៅសកលវិទ្យាល័យកម្ពុជារងការចោទប្រកាន់ថាបង្កគ្រោះថ្នាក់ចរាចរណ៍ហើយព្យាយាមរត់គេចត្រូវបានហ្វូងមនុស្សឃាត់រថយន្តនិងវាយដំឲ្យរងរបួសធ្ងន់ធ្ងរកំពុងព្យាបាលជំងឺនៅប្រទេសវៀតណាម។
បច្ចុប្បន្នអាជ្ញាធរមានសមត្ថកិច្ចបានចាប់និងឃុំខ្លួនជនសង្ស័យបីនាក់ជាប់ពាក់ព័ន្ធនឹងអំពើហិង្សាទៅលើលោកបណ្ឌិត ស៊ុយ សារ៉េត សាស្ត្រាចារ្យមហាវិទ្យាល័យវ័យ៥២ឆ្នាំស្ទើស្លាប់កាលពីសប្តាហ៍មុន។ជនសង្ស័យទាំងនោះឈ្មោះ យាត ទិត្យា លោក អាន វិនទី និងលោក អាន ផល្លី។
ក្រោយព្យាបាលអស់ពេលជិតពីរសប្តាហ៍នៅក្រៅប្រទេសលោក ស៊ុយ សារ៉េត បានបង្ហោះវីដេអូឃ្លីបនៅលើបណ្តាញសង្គមហ្វេសប៊ុកកាលពីថ្ងៃចន្ទ ទី២០ មីនានេះ ច្រានចោលថាលោកមិនបានបង្កគ្រោះថ្នាក់ចរាចរណ៍ហើយបើឡានរត់គេចទេ។
លោក ស៊ុយ សារ៉េត៖«ប្អូនម្នាក់វាលេងទូរស័ព្ទដល់ឡានខ្ញុំចាប់ហ្វាំងវាក៏ជិះទៅបុខគូទឡានគេ ហើយវាក៏ដួលនៅខាងមុខខាងស្តាំដៃ ហើយខ្ញុំក៏ចាប់ហ្វាំងដោយចាប់ហ្វាំងទៅមាម៉ូតូស្រវឹងមានមនុស្សចាស់ខ្ទង់វ័យ៤០ពីរនាក់ដូចអត់អាវបើតាមខ្ញុំដឹងអត់មានពាក់មួកទៀត(សុវត្ថិភាព)ដោយជិះមកគៀរឡានខ្ញុំនៅខាងស្តាំ។»
ក្រោយកើតហេតុពីរថ្ងៃកូនស្រីលោកបណ្ឌិត ស៊ុយ សារ៉េត បានដាក់ពាក្យប្តឹងទៅតុលាការទាមទារសំណងជំងឺចិត្ត១ពាន់២រយលានរៀលប្រហែល៣០ម៉ឺនដុល្លារ។
យោងតាមក្រមព្រហ្មទណ្ឌត្រង់មាត្រា២១៧បានចែងថាអំពើហិង្សាដោយចេតនាលើអ្នកដទៃត្រូវផ្តន្ទាទោសដាក់ពន្ធនាគារពី១ឆ្នាំទៅ៣ឆ្នាំនិងពិន័យជាប្រាក់២លានរៀលទៅ៦លានរៀល។មាត្រា២១៨ បានចែងថាអំពើហិង្សាដោយចេតនា ដោយមានការគិតទុកជាមុន ដោយប្រើអាវុធឬគំរាមកំហែងនឹងអាវុធនិងអំពើហិង្សាដោយមនុស្សច្រើនក្នុងឋានៈជាចារី សហចារីអ្នកផ្តើមគំនិតនិងអ្នកសមគំនិតត្រូវផ្តន្ទាទោសដាក់ពន្ធនាគារពី២ឆ្នាំទៅ៥ឆ្នាំនិងពិន័យជាប្រាក់ពី៤លានរៀលទៅ១០លានរៀល៕
