ភ្នំពេញ៖ មជ្ឈមណ្ឌលសកម្មភាពកំចាត់មីនកម្ពុជាត្រូវការថវិកាប្រមាណ២០លានដុល្លារសហរដ្ឋអាមេរិកក្នុងឆ្នំា២០១៨នេះ ដើម្បីបន្តផែន ការបោសសំអាតចំការមីន និងចំការគ្រាប់បែកចង្កោមចំនួន ១១៧គីទ្បូម៉ែត្រ និងតំបន់សង្ស័យសំណល់គ្រាប់យុទ្ធភណ្ឌមិនទាន់ផ្ទុះចំនួនជាង៣០គីទ្បូម៉ែត្រក្រទ្បា។
នេះបើតាមទំព័រហ្វេសប៊ុក អគ្គនាយកមជ្ឈមណ្ឌលសកម្មភាពកំចាត់មីនកម្ពុជា លោក ហេង រតនា បង្ហោះផ្សាយនាយប់ថ្ងៃទី០៥ មករា ឆ្នំា ២០១៨ បន្ទាប់ពីលោកចូលរួមកិច្ចប្រជុំបូកសរុបការងារឆ្នំា២០១៧ និងផ្សព្វផ្សាយផែនការឆ្នំា២០១៨ កាលពីថ្ងៃទី០៥ មករា ម្សិលមិញ។
យោងតាមសំណេរខ្លឹមសារដើមលោកហេង រតនា បានឱ្យដឹងថា កាលពីឆ្នំា២០១៧កន្លងមកនេះអង្គភាពស៊ីម៉ាក់បានសំរេចជោគជ័យបោសសំអាតផ្ទៃដីគ្រាប់មីនបានចំនួនជាង ១១០គីទ្បូម៉ែត្រក្រទ្បា ប្រមាណជាង១០៥% នៃផែនការ និងរុករកកំទេចចោលគ្រាប់គ្រប់ប្រភេទបានចំនួនជាង ៤ ម៉ឺន (៤០.៩១៤) គ្រាប់ ស្នើនឹងប្រមាណ៩០%នៃផែនការ និងសមិទ្ធិផលសំខាន់ៗមួយចំនួនទៀត។
ការណ៍នេះដើម្បីបន្តសកម្មភាពបោសសំអាតចំការមីន និងចំការគ្រាប់បែកចង្កោមចំនួន ១១៧គីទ្បូម៉ែត្រ និងតំបន់សង្ស័យសំណល់គ្រាប់យុទ្ធភណ្ឌមិនទាន់ផ្ទុះចំនួនជាង ៣០គីទ្បូម៉ែត្រ ក្រទ្បាក្នុងឆ្នំា២០១៨នេះ «ស៊ីម៉ាក់ត្រូវការថវិកាប្រមាណ២០លានដុល្លារអាមេរិកដើម្បី បន្តសកម្មភាពមួយនេះ និងសមិទិ្ធផលសំខាន់ៗមួយចំនួនទៀតដូចជាការងារអប់រំអំពីគ្រោះថ្នាក់មីន ការស្រាវជ្រាវ និងការជួយសង្គ្រោះជនពិការនិងការសហការអន្តរជាតិជាដើម»។
បើតាមអគ្គនាយកមជ្ឈមណ្ឌលសកម្មភាពកំចាត់មីនកម្ពុជា លោកហេង រនតា គិតត្រឹមថ្ងៃទី០៥ ខែមករា ឆ្នំា២០១៨នេះ ស៊ីម៉ាក់ទទួលបានជំនួយ និងថិវកាពីគំរោងនានាមានចំនួនសរុបជាង១៤,៦លានដុល្លារហើយ។ ដោយទ្បែកចំពោះចំនួនដែលនៅខ្វះកំពុងកៀគរនិងចរចាគំរោងមួយចំនួនជាង៥,៧លានដុល្លារ។
