ភ្នំពេញ ៖ កម្មការិនី រោងចក្រកាត់ដេរ ត្អូញត្អែពីផែនការរបស់ម្ចាស់ផ្ទះជួល ដែលកំពុងត្រៀមឡើងថ្លៃឈ្នួលផ្ទះ ប្រដេញប្រាក់ខែរបស់ពួកគេ ដែលដឹងថា នឹងត្រូវឡើងដល់ ១៧០ដុល្លារចាប់ពីឆ្នាំ២០១៨។ រឿងនេះតំណាងសហជីពចង់ឲ្យរដ្ឋអំណាច បង្ហាញវិធានការជាក់លាក់ ជាជាងត្រឹមតែការអំពាវនាវ។ លោក លៀ ស៊ីណា រាយការណ៍ ៖
កម្មការិនីរោងចក្រកាត់សម្លៀកបំពាក់នៅរាជធានីភ្នំពេញ និងខេត្ដកំណ្ដាល បានអះអាងថា ម្ចាស់ផ្ទះជួលបានជូនដំណឹងដល់ពួកគេរួចហើយ ថានឹងឡើងថ្លៃឈ្នួលផ្ទះម្ដងទៀត។
កម្មការិនីរោងចក្រកាត់ដេរម្នាក់ឈ្មោះ វ៉ាន់យិន ដែលកំពុងបំពេញការងារនៅក្នុងរោងចក្រមួយកន្លែងស្ថិតក្នុងសង្កាត់ទូលសង្កែ ខណ្ឌឬស្សីកែវ រាជធានីភ្នំពេញ បានប្រាប់វិទ្យុស្ដ្រីថា អ្នកស្រីសប្បាយចិត្ដ នៅពេលដែលដឹងថា រាជរដ្ឋាភិបាលសម្រេចដំឡើងប្រាក់ឈ្នួលកម្មករ ដល់ ១៧០ដុល្លារ ចាប់ពីឆ្នាំ២០១៨តទៅ។ ក៏ប៉ុន្ដែក្ដីរីករាយនេះ បានបាត់ទៅវិញក្រោយពេលដែលម្ចាស់ផ្ទះជួលបានប្រាប់អ្នកស្រីថា ផ្ទះជួលនឹងត្រូវឡើងថ្លៃ ១០ដុល្លារបន្ថែមទៀតនៅឆ្នាំក្រោយ។ អ្នកស្រី វ៉ាន់ យិន ៖«ខាងខ្ញុំនៅហ្នឹង វា ២០ ឡើង ១០ដុល្លារទៀត»។
អ្នកស្រីយល់ថា បើប្រាក់ខែឡើងថ្លៃ តែតម្លៃទំនិញ និងផ្ទះជួលឡើងប្រដេញដូចនេះ ទោះជាប្រាក់ខែឡើងបានច្រើនប៉ុណ្ណាក៏មិនអាចធ្វើឲ្យកម្មការិនីក្រីក្រដូចជា អ្នកស្រីអាចរស់នៅបានសមរម្យនោះដែរ។ អ្នកស្រី វ៉ាន់ យិន បន្ដថា ប្រាក់ខែ ១៧០ដុល្លារនេះ បើគិតឲ្យយូឲ្យទៅ គឺមិនបានសល់អ្វីនោះទេ។ អ្នកស្រី វ៉ាន់ យិន ៖«ខ្ញុំធ្វើការរោងចក្រតាំងពីជំនាន់នៅ ៣០ដុល្លារ តែសាច់ជ្រូក ១ខាំតែ ៧០០រៀលទេ ខ្ញុំអាចថា គ្រាន់បើដែរ ដល់មកសម័យឥឡូវនេះ ប្រាក់ខែច្រើនមែនតែចាយអត់គ្រប់ ថ្លៃផ្ទះក៏ឡើង ទំនិញញាំក៏ឡើង»។
មិនថាតែផ្ទះជួលនៅភ្នំពេញទេ ដែលឡើងថ្លៃសូម្បីផ្ទះជួលសម្រាប់កម្មករ រោងចក្រកាត់ដេរនៅខេត្ដកណ្ដាល ក៏ត្រៀមនឹងឡើងថ្លៃដែរ។
អ្នកស្រី ស៊ិន ធារី កម្មការិនីរោងចក្រកាត់ដេរមួយកន្លែង នៅក្នុងខេត្ដកណ្ដាល បានឲ្យដឹងថា ក្រោយពេលសេចក្ដីប្រកាស ស្ដីពីការដំឡើងប្រាក់ឈ្នួលកម្មករត្រូវបានផ្សព្វផ្សាយ ម្ចាស់ផ្ទះជួលបានប្រាប់អ្នកស្រីភ្លាមថា ផ្ទះជួលរបស់គាត់ នឹងត្រូវចាប់ផ្ដើមឡើងថ្លៃនៅដើមឆ្នាំក្រោយ ព្រោះទំនិញលើទីផ្សារក៏ចាប់ផ្ដើមឡើងថ្លៃដែរ។ អ្នកស្រី ស៊ិន ធារី ៖«ខាងខ្ញុំគេឡើងដូចគ្នាបង គេឡើងពីមុនបន្ទប់ហ្នឹង ៣៥ទេ ឥឡូវឡើងថែម ១០រៀល អីទៀត អញ្ចឹងឡើង ៤៥ ហើយនៅទឹកភ្លើងអីបន្ដអញ្ចឹង»។
អ្នកស្រី ធារី បន្ដថា អ្វីដែលប្រមុខដឹកនាំរាជរដ្ឋាភិបាលបានអំពាវនាវកន្លងមក គឺមិនបានជួយអ្វីដល់ពួកគេទេ ព្រោះតែពេលដែលពួកគាត់ប្រាប់ម្ចាស់ផ្ទះ ពីការអំពាវនាវរបស់សម្ដេច ហ៊ុន សែន កុំឲ្យមានការដំឡើងថ្លៃឈ្នួលផ្ទះ ម្ចាស់ផ្ទះបែរជាបដិសេធថា គាត់មិនដែលឮការអំពាវនាវនេះឡើយ។
ចំណែកអ្នកស្រី ពិសី ជាកម្មការិនីរោងចក្រកាត់ដេរ នៅម្ដុំសួនកាណាឌីយ៉ា បានឲ្យដឹងដែរថា ម្ចាស់ផ្ទះជួលដែលគាត់កំពុងរស់នៅសព្វថ្ងៃ ក៏បានប្រាប់អ្នកស្រីពីការឡើងថ្លៃផ្ទះជួលរបស់ពួកគាត់ដែរ។ អ្នកស្រី ពិសី បញ្ជាក់ថា ថ្លៃផ្ទះឡើងតាមប្រាក់ខែដូច្នេះ គឺជាបញ្ហាលំបាកមួយរបស់កម្មការិនីក្រីក្រដូចអ្នកស្រី។
អ្នកស្រី ពិសី ៖«ព្រោះលុយដែលឡើងហ្នឹង គឺយើងយកមកដើម្បីទ្រទ្រង់សុខភាព ហើយយើងត្រូវយកមកចំណាយលើថ្លៃផ្ទះ ថ្លៃទឹក ថ្លៃភ្លើង ហើយមួយចំនួនទៀតត្រូវផ្ញើទៅ ឪពុក ម្ដាយ ហើយដល់ពេលប្រាក់ខែឡើង គឺទំនិញឡើងហើយអ្វីៗឡើងទាំងអស់ អញ្ចឹងយើងអត់មានលុយដែលយើងគិតថា ឡើងបានប៉ុណ្ណឹង យើងដក់ ២០រៀលហ្នឹង សម្រាបសាគួទៅផ្ទះ ថែមលុយយើងធ្វើបានហ្នឹងទៀតទៅវាបានច្រើនជាងមុន តែអត់ទេ វាទៅជាដកយកលុយហ្នឹងទៅសៀតចូលតាមទំនិញទីផ្សារផ្សេងៗទៀត»។
ជុំវិញរឿងនេះ ប្រធានសហជីព ស៊ីខាវឌូ មើលឃើញថា ជារឿងលំបាកណាស់សម្រាប់កម្មករ ព្រោះឲ្យតែដល់ពេលរដ្ឋដំឡើងប្រាក់ឈ្នួល ថ្លៃផ្ទះរបស់ពួកគាត់ក៏តែងតែឡើង តាមពីក្រោយប្រាក់ឈ្នួលរបស់ពួកគាត់ដែរ។
លោក បុន វណ្ណ ប្រធានសហជីព ស៊ីខាវឌូ បានលើកឡើងថា ម្ចាស់ផ្ទះជួលនឹងមិនព្រម បញ្ឈប់ការឡើងថ្លៃឈ្នួលផ្ទះសម្រាប់កម្មករនោះទេ ប្រសិនបើរដ្ឋអំណាចបានត្រឹមតែអំពាវនាវ ដោយគ្មានវិធានការជាក់លាក់ ជុំវិញរឿងនេះ។
ម្យ៉ាងវិញទៀតលោកមើលឃើញថា ម្ចាស់ផ្ទះដែលតែងតែប្រឹងតម្លើងថ្លៃឈ្នួលផ្ទះ តាមប្រាក់ឈ្នួលរបស់កម្មករ គឺភាគច្រើន សុទ្ធតែជាមន្ដ្រីមានអំណាចនៅក្នុងជួររាជរដ្ឋាភិបាល។
លោក ប៊ុន វណ្ណ៖«ខ្ញុំសំណូមពរដល់រាជរដ្ឋាភិបាលដែរ បើគាត់ប្រកាស់ហើយ សូមចេញជាក្រិត្យណាមួយ ច្បាប់ណាមួយ ដើម្បីឲ្យវាត្រឹមត្រូវតិចទៅ បើអញ្ចឹងអ្នកលក់ដូរប្រហែលគេមិនស្ដាប់យើងទេ យើងប្រកាសតើ សំណូមពរតើ មានទាន់ជាច្បាប់ឯណា ទាល់តែច្បាប់បានគេខ្លាច ហើយច្បាប់ហ្នឹងដាក់បានទណ្ឌកម្មទៅលើគេទៀតបានគេខ្លាច អាហ្នឹងបើយើងចង់ការពារអ្នកក្រពិតប្រាកដមែន»។
លើសពីនេះ ប្រធានសហជីព ស៊ីខាវឌូ ក៏សំណូមពរដល់ម្ចាស់ផ្ទះជួល គួរគិតដល់ជីវភាព កម្មករ កម្មការិនី ផង កុំគិតតែប្រឹងឡើងថ្លៃឈ្នួលផ្ទះ តាមប្រាក់ខែរបស់កម្មករ ព្រោះពួកគេសុទ្ធតែជាពលរដ្ឋក្រីក្រ ទើបបានជាពួកគេទៅធ្វើការងារនៅតាមរោងចក្រ។
កន្លងមកគេតែងតែឮជារឿយៗ នូវប្រសាសន៍របស់សម្ដេច ហ៊ុន សែន ប្រមុខដឹកនាំរាជរដ្ឋាភិបាលកម្ពុជា ក្នុងវេទិកាថ្នាក់ជាតិធំៗមួយចំនួន ឬក៏ក្នុងវេទិកាដែលលោក បានជួបជាមួយក្រុមកម្មករ កម្មការិនី ពីការអំពាវនាវដល់ម្ចាស់ផ្ទះជួលកុំឲ្យដំឡើងថ្លៃឈ្នួលផ្ទះសម្រាប់កម្មករ កម្មការិនី។ តែមកដល់ពេលនេះ គឺមានតែថ្លៃទឹក ថ្លៃភ្លើងប៉ុណ្ណោះដែលមានតម្លៃសមរម្យសម្រាប់កម្មករ ក៏ប៉ុន្ដែថ្លៃផ្ទះជួលវិញ ហាក់នៅតែបន្ដឡើងដដែល នៅរាល់ពេលដែលក្រុមកម្មរ ទទួលបានប្រាក់ឈ្នួលកើនឡើង។
បច្ចុប្បន្ន ពលរដ្ឋខ្មែរចំនួនជាង ៨០ម៉ឺននាក់កំពុងបម្រើការងារ ក្នុងវិស័យឧស្សាហកម្មកាត់ដេរ ។ ក្នុងនោះមានជាង ៧០ភាគរយគឺជាស្ដ្រី។ ប្រាក់ឈ្នួលគោលរបស់កម្មករ កម្មការិនី ឆ្នាំ២០១៧នេះ គឺ ១៥៣ដុល្លារ ហើយនឹងឡើងដល់ ១៧០ដុល្លារនៅឆ្នាំ២០១៨៕
