ភ្នំពេញ ៖ ក្រុមកម្មការិនី មានគ្នាប្រមាណជាង ១០០នាក់ដែលបានប្រមូលផ្ដុំគ្នាតវ៉ានៅខាងមុខ រោងចក្រកាត់ដេរសម្លៀកបំពាក់មួយនៅក្រុងបាវិត ខេត្ដស្វាយរៀង នៅថ្ងៃទី១៤ ខែវិច្ឆិកានេះ បានព្រមចូលធ្វើការវិញបន្ទាប់ពី ថៅកែ និយោជិក ជាជនជាតិចិន យល់ព្រមតាមសំណើរបស់ពួកគេជុំវិញលក្ខណការងារ។ នេះបើយោងតាម ប្រធានសម្ព័ន្ធសហជីពចលនាកម្មករ។ លោក លៀ ស៊ីណា រាយការណ៍៖
ការតវ៉ាបានកើតឡើងកាលពីថ្ងៃសៅរ៍ ទី១១ វិច្ឆិកា ដែលមានកម្មការិនីជាង ១០០នាក់ ប្រមូលផ្ដុំគ្នាតវ៉ាទាមទារឲ្យថៅកែជាជនជាតិ ចិន គោរពតាមច្បាប់ការងារកម្ពុជា ដោយមិនត្រូវបង្ខំពួកគេឲ្យធ្វើការងារច្រើន ដើម្បីបង្កើនការផលិត និងបញ្ឈប់ការប្រើពាក្យសម្ដីមិនសមរម្យដាក់ពួកគេបន្ដទៀត។ ការតវ៉ាបានបញ្ចប់ត្រឹមពេលរសៀលថ្ងៃទី១៣ ខែវិច្ឆិកា ក្រោយពីថៅកែ និយោជក បានយល់ព្រមតាមការទាមទារបស់កម្មការិនី។ នេះបើយោងតាមការឲ្យដឹងពីប្រធានសម្ព័ន្ធសហជីពចលនាកម្មករ ដែលបានប្រាប់វិទ្យុស្ដ្រីនៅថ្ងៃទី១៤ ខែវិច្ឆិកានេះ។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ បានឲ្យដឹងថា កម្មការិនី ក្នុងរោងចក្រ You Li International បានជួបផលលំបាកក្រោយពេលដែលមានថៅកែថ្មី ដែលជាជនជាតិចិន មកកាន់ការជំនួសថៅកែចាស់ក្នុងរយៈពេលប៉ុន្មានខែចុងក្រោយនេះ។
លោកបន្តថាថៅកែថ្មី របស់រោងចក្រកាត់ដេរ You Li International បានតម្រូវឲ្យកម្មករ កម្មការិនី ធ្វើការទ្វេដង ដើម្បីបង្កើនការផលិត នាំចេញទៅកាន់ទីផ្សារ ហើយថៅកែថ្មីនេះ តែងតែប្រើពាក្យមិនគួរគប្បីមួយចំនួនដាក់កម្មការិនីក្នុងរោងចក្រនេះ ដែលជាហេតុ នាំឲ្យក្រុមកម្មការិនី បានប្រមូលផ្ដុំគ្នាតវ៉ាជាមួយថៅកែជនជាតិចិន ឲ្យបញ្ឈប់ការបង្ខិតបង្ខំពួកគេធ្វើការទ្វេដង និងទាមទារឲ្យប្រើពាក្យសម្ដី ឲ្យបានសមរម្យជាងមុន។ លោក ប៉ាវ ស៊ីណា ៖«កាលពីមុន ឧទាហរណ៍ ៨ ម៉ោង គេធ្លាប់ឲ្យគាត់ដេរត្រឹម ៥០០ខោ ឬក៏អាវ អញ្ចឹងទៅដល់ឥឡូវគេលើកថា ដោយសារតែប្រាក់ខែឡើងខ្ពស់គេក៏តម្រូវឲ្យបង្កើនការផលិតដូចគ្នា ក៏ប៉ុន្ដែកម្មករគាត់ថា ធ្វើអត់បាន មួយទៀតដោយសារដូរអ្នកគ្រប់គ្រងថ្មី ដែលគាត់មានសម្ដីសំដៅមិនសមរម្យដែលជាហេតុធ្វើឲ្យមានការតវ៉ា»។
តែយ៉ាងណាក្រោយពេលដែលមានការតវ៉ា ពីក្រុមកម្មការិនី តំណាងសហជីពបានចរចាជាមួយថៅកែ ដោយមានការសម្របសម្រួលពីមន្ទីរការងារខេត្ដស្វាយរៀង និងអាជ្ញាធរ ទើបថៅកែ រោងចក្រកាត់ដេរមួយនេះបានយល់ព្រមតាមសំណើររបស់កម្មករ។ សំណើចំនួនបី ចំណុច ដែលមានដូចជា មិនបង្ខំកម្មករ កម្មការិនី ឲ្យធ្វើការច្រើនលើសកំណត់ ផ្ដល់រង្វាន់លើកទឹកចិត្ដដល់កម្មករ កម្មការិនី ដែលធ្វើការងារបានតាមកំណត់ ហើយថៅកែ ត្រូវបញ្ឈប់ការប្រើពាក្យសម្ដីមិនសមរម្យលើកម្មករ កម្មការិនីបន្ដទៀត។
ជាមួយគ្នានេះ លោក ប៉ាវ ស៊ីណា បានច្រានចោលការលើកឡើងមួយចំនួនដែលថា រោងចក្រកាត់ដេរ You Li International មួយនេះ បានយកកម្មការិនី ដែលធ្វើការងារយឺតទៅបង្ខាំងក្នុងទ្រុង ឬក៏ធ្វើទណ្ឌកម្ម។ លោកបានបញ្ជាក់ថា គ្រប់រោងចក្រសុទ្ធតែមានបច្ចេកទេសនៃការរៀបចំប្រហាក់ប្រហែលគ្នា ដែលមិនមែនជាកន្លែងឃុំឃាំមនុស្ស ឬក៏កន្លែងធ្វើទណ្ឌអ្វីឡើយ។ លោក ប៉ាវ ស៊ីណា ៖«អ្វីដែលកម្មករលើកឡើងថា មានការដាក់រនាំ ដាក់អីបាំងផ្សេងៗហ្នឹង គេរុះចោលទាំងអស់ ឥឡូវគេរុះអស់ហើយ អញ្ចឹងគឺគ្រប់យ៉ាង រហូតដល់ម៉ោងនេះគឺកម្មករបានចូលធ្វើការវិញអស់ហើយ»។
បើទោះជាបញ្ហានេះ ត្រូវបានដោះស្រាយជួនកម្មការិនី រួចរាល់ក៏ពិតមែន ក៏ប៉ុន្ដែប្រធានសម្ព័ន្ធសហជីពចលនាកម្មករ យល់ថា បើមិនមានការចូលរួមពីអាជ្ញាធរមានសមត្ថកិច្ចដែលពាក់ព័ន្ធ យកចិត្ដទុកដាក់តាមដានរាល់ការអនុវត្ដច្បាប់របស់ក្រុមថៅរោងចក្រឲ្យបានច្បាស់លាស់ទេ បញ្ហាដូចគ្នានេះនឹងកើតឡើងចំពោះកម្មករ កម្មការិនី នៅរោងចក្រកាត់ដេរផ្សេងទៀតជាពុំខាន។ ករណីនេះលោកសង្ឃឹមថា អាជ្ញាធរនឹងពង្រឹងការអនុវត្ដតួនាទី និងច្បាប់ ហើយរោងចក្រដែលមករកស៊ីនៅកម្ពុជា និងគោរពច្បាប់ការងារក្នុងប្រទេសកម្ពុជា។
រោងចក្រ You Li International មានកម្មករ បម្រើការងារប្រមាណ ៥០០០នាក់ ដែលជាង ៨០ភាគរយគឺជាស្ដ្រី។
វិស័យឧស្សាហកម្មកាត់ដេរ កម្ពុជាបាននាំមុខគេក្នុងការផ្ដល់ការងារដល់ពលរដ្ឋខ្មែរ។ វិស័យឧហ្សាហកម្មកាត់ដេរ គឺជាឆ្អឹងខ្នងសេដ្ឋកិច្ចដ៏ធំមួយរបស់កម្ពុជា ក្នុងចំណោមវិស័យអាទិភាពជាច្រើនទៀត ដែលមានដូចជា វិស័យទេសចរណ៍ និងវិស័យស្រូវ អង្ករ។ វិស័យឧហ្សាកម្មកាត់ដេរ បានផ្ដល់ការងារដល់ពលរដ្ឋខ្មែរប្រមាណជាង ៧០ម៉ឺននាក់ ហើយក្នុងនោះ៨០ភាគរយជាស្ដ្រី៕