វ៉ាស៊ិនតោន ៖ រដ្ឋមន្ដ្រីការពារជាតិសហរដ្ឋអាមេរិកលោក ចេមម៉ាទីស ដែលកំពុងមានវត្តមាននៅលើទឹកដីកូរ៉េខាងត្បូង បានធ្វើការព្រមានទៅលើកូរ៉េខាងជើងដោយប្រាប់ថា អាមេរិកនឹងវាយប្រហារ ហើយកម្ទេចរបបក្រុងព្យុងយ៉ាង ប្រសិនបើមានការសាកល្បងអាវុធនុយក្លេអ៊ែ ហើយបាញ់ទៅលើគោលដៅរបស់អាមេរិកម្ដងទៀតនោះ។
ក្នុងដំណើរទស្សនកិច្ចដើម្បីត្រួសត្រាយផ្លូវ សម្រាប់ដំណើរទៅដល់របស់លោក ដូណាត្រាំ នោះលោក ចេមម៉ាទីស បានប្រាប់ទៅកូរ៉េខាងជើងទៀតថា គ្មានពិភពលោកណាទទួលស្គាល់កម្មវិធីអាវុធនុយក្លេអ៊ែររបស់ក្រុងព្យុងយ៉ាងនោះទេ ហើយក្រុងព្យុងយ៉ាង ត្រូវតែគ្មានអាវុធនុយក្លេអ៊ែជាដាច់ខាត។
តាមប្រភពរបស់គេហទំព័រ The Star Online ទស្សនកិច្ចរបស់ប្រមុខការពារជាតិអាមេរិករូបនេះបានជួបជាមួយសមភាគីកូរ៉េខាងត្បូង របស់លោកដោយ មានពិធីស្វាគមន៍ជាផ្លូវការទៀតផង។ លោកដូណាត្រាំ នឹងធ្វើដំណើរទៅកូរ៉េខាងត្បូងនៅថ្ងៃ៧ វិច្ឆិការ នាខែក្រោយនេះ។ ក្នុងដំណើរទស្សនកិច្ច លើកដំបូងរបស់មេដឹកនាំអាមេរិករូបនេះ ទៅកូរ៉េខាងត្បូង ត្រូវបានអ្នកសង្កេតការណ៍មើលឃើញថា គឺជាការជាន់ដីសមរភូមិលើឧបទ្វីបកូរ៉េមុនសង្គ្រាមផ្ទុះឡើង។ តែទស្សនកិច្ចរបស់លោកត្រាំ នេះ ក៏នាំឲ្យមានការព្រមានពីការវាយប្រហារដោយមិនបានប្រាប់ជាមុនពីសំណាក់កូរ៉េខាងជើងផងដែរ៕