ភ្នំពេញ៖អង្គការ ដើម្បីភាពញញឹមនៃកុមារ ហៅកាត់ថា (ប៉េ អេស អឺ) នឹង រៀបចំកម្មវិធីសប្បុរស ធម៌ប្រចាំឆ្នាំដែលព្រឹត្តិការណ៍នោះ គឺ “ពិព័រណ៍ម្ហូបអាហារអាស៊ាន”នៅថ្ងៃទី ១ - ២ ខែមេសា ឆ្នាំ២០១៧ នៅពហុកីឡដ្ឋានជាតិអូឡាំពិក ចាប់ពីម៉ោង ៥ រសៀលតទៅ។
តាមសេចក្ដីជូនដំណឹង គឺកម្មវិធីនោះនឹងមានការដាក់តាំង មុខម្ហូបជាង ៧០មុខមកពីបណ្តាប្រទេសអាស៊ាន រួមទាំងការសម្តែងសិល្បៈប្រចាំប្រទេសនីមួយៗផងដែរ។ ភ្ញៀវជាតិនិងអន្តជាតិអាចចូលរួមក្នុងកម្មវិធីនោះបាន ដោយចំណាយ ៣ដុល្លា សម្រាប់សំបុត្រមួយដែលអាចរកទិញបាននៅភោជនីយដ្ឋាន លូទូសប្លង់ ប៉េ អេស អឺ និងនៅពហុកីឡដ្ឋានជាតិអូឡាំពិក។
លោក សាន សាម៉េត ប្រធានកម្មវិធីអប់រំរបស់ អង្គការដើម្បីភាពញញឹមនៃកុមារ មានប្រសាសន៍ថា ថវិកាដែលបានមកពីការលក់សំបុត្រនេះត្រូវយកទៅផ្គត់ផ្គង់សម្រាប់កុមារ ដែលកំពុងរស់នៅ ក្នុងអង្គការនេះ។ លោកបន្តថា នៅពេលនេះអង្គការកំពុងត្រូវការជំនួយដើម្បីជួយកុមារទាំងនោះ។
អង្គការ ដើម្បីភាពញញឹមនៃកុមារមានទីតាំងនៅក្នុងខណ្ឌមានជ័យ រាជធានីភ្នំពេញ បានបង្កើតឡើងកាលពីខែមេសា ឆ្នាំ១៩៩៥។ ស្ថាបនិកនៃអង្គការនេះគឺ លោក គ្រីស្យង់ និងអ្នកស្រី ម៉ារីហ្វ្រង់ ដេប៉ាលីយ៉ែរ។ អង្គការនេះបានជួយដល់កុមារកម្ពុជា កំព្រា ក្រីក្រ កុមារអនាថា រាប់ពាន់នាក់ដែលរស់នៅលើគំនរសំរាម ឲ្យបានសិក្សាមានចំណេះដឹងជាច្រើន៕