ហ្គាំប៊ៀ៖ ប្រធានាធិបតីថ្មីនៃប្រទេស Gambia លោក Adama Barrow ដែលបានឈ្នះឆ្នោតនៅក្នុងការបោះឆ្នោត ប្រធានាធិបតីកាលពីខែធ្នូឆ្នាំ ២០១៦ នៅថ្ងៃចន្ទ ទី២៧កុម្ភៈ បានសម្រេចបញ្ចប់តំណែង មេគុកដ៏ធំជាងគេរបស់ប្រទេស ស្របពេលឩត្តមសេនីយ៍មួយចំនួនត្រូវចាប់ខ្លួន និងបញ្ចប់តំណែង។
តាមទីភ្នាក់ងារសារព័ត៌មាន Reuters ប្រធានពន្ធនាគារនៅតាមខេត្តមួយចំនួន ត្រូវបញ្ចប់តំណែង ចំណែក ប្រធានពន្ធនាគារដ៏ធំជាងគេ នៅរដ្ឋ ធានី Banjul គឺលោក David Colley ត្រូវបានចាប់ខ្លួនបន្ទាប់ពីមេគុគ និងមេគុងរង ៩នាក់ទៀត ត្រូវបានចាប់ខ្លួនកាលពីសប្ដាហ៍មុននេះ។ ពួកគាត់រងការចោទប្រកាន់ ករណីបញ្ជាឆ្មាំគុកធ្វើទារុណអ្នកទោស។
ដោយឡែក ឧត្តមសេនីយ៍ ២០នាក់ទៀត ត្រូវបានចាប់ខ្លួនដែលពួកគេជាអ្នកចេញមុខការពារ អតីតជនផ្ដាច់ការ Yahya Jammeh ឱ្យបន្តក្រាញអំណាច រហូតដល់ទ័ពអន្តរជាតិគាំទ្រដោយ អង្គការសហប្រជាជាតិ មកអន្តរាគមន៍បណ្ដេញពីតំណែង។
តែនៅពេលជាមួយគ្នានេះ មេបញ្ជាការកងទ័ពឧត្តមសេនីយ៍ Ousman Badjie មិនត្រូវបានចាប់ខ្លួនទេ តែលោកត្រូវផ្ទេរតំណែង។ ឧត្តមសេនីយ៍ Ousman Badjie គឺជាមេទ័ពសម័យ លោក Jammeh តែលោកជាមេទ័ពដែលប្រកាន់ជំហរអព្យាក្រិត្យ។
អ្នកនាំពាក្យក្រសួងការពារជាតិ អនុសេនីយត្រី Kemo Kanuteh និយាយថា មាននាយទាហ៊ាន ១០នាក់ផ្សេងទៀត ក៏បានដងហូតតំណែងដែរ។ ឧត្តមសេនីយ៍ Massaneh Kinteh ដែលធ្លាប់ជា នាសេនាធិការ កងទ័ពរបស់ Jammeh ត្រូវបានតែងតាំងជំនួស លោក Ousman Badjie ។
ឧត្តមសេនីយ៍ Kinteh ជាមេទ័ពម្នាក់រត់ភៀសខ្លួន ទៅក្រៅប្រទេសដោយសារមិនអាចធ្វើការងារជូនលោកJammeh។
តែនៅពេលជាមួយគ្នានេះ នាយទាហាន ២០នាក់ដែល រៀបចំធ្វើរដ្ឋប្រហារមិនបានសម្រេចដើម្បី ទម្លាក់ លោកJammeh កាលពីឆ្នាំ ២០១៤ ត្រូវបាន ប្រកាសតែងតាំងឱ្យចូលកាន់តំណែងវិញ។
កាលពីសប្ដាហ៍មុន ប្រធានាធិបតី Adama Barrow បានដាក់ផែនការរយៈពេល ១០០ថ្ងៃ ក្នុងការរុះរើ ប្រព័ន្ធតុលាការ ដែលជាកំអែលរបស់អតីតប្រធានាធិបតី Jamme។
Gambia ជាប្រទេសតូចមួយនៅភាគខាងលិចនៃទ្វីបអាហ្វ្រិក មានប្រជាជនជិត ពីរលាននាក់។ ប្រជាជនប្រទេសនេះភាគច្រើនធ្វើចំណាកស្រុកទៅស៊ីឈ្នូលធ្វើពលកម្មឲ្យប្រទេសជិតខាង។ Gambia ស្ថិតនៅក្រោមការគ្រប់គ្រងរបស់លោក Jammeh រយៈពេល ២២ឆ្នាំដែល ពោរពេញដោយ ការរំលោភសិទ្ធិមនុស្ស និង ការបំបាត់សំឡេង របស់ក្រុមប្រឆាំង៕ ប្រភព:Reuters