ភ្នំពេញ ៖ លោក ហុក សុទ្ធិ ប្រធានអង្គការស៊ីប៉ា បានគ្រឿងឥស្សរិយយសសិល្បៈ និងអក្សរសាស្ត្រថ្នាក់អស្សឬទ្ធិ ពីរដ្ឋាភិបាលបារាំងសំរាប់ស្នាដៃរបស់លោកក្នុងការជួយលើកស្ទួយវិស័យអប់រំ និងប្រឆាំងអនក្ខរភាពនៅកម្ពុជា។
លោក ហ្សង់ក្លូដ ពាំបឹហ្វ ឯកអគ្គរដ្ឋទូតបារាំងប្រចាំកម្ពុជាបានបំពាក់គ្រឿងឥស្សរិយយសនេះដល់លោក ហុក សុទ្ធិ កាលពីថ្ងៃព្រហស្បត្តិ៍ ទី២៦ ខែមករា ក្នុងទីក្រុងភ្នំពេញ។ លោកឯកអគ្គ រដ្ឋទូតបានលើកឡើងពីការប្រឹងប្រែងមិនចេះនឿយហត់របស់លោក ហុក សុទ្ធិ ក្នុងការលើកតម្កើងវិស័យអប់រំ និងការប្រយុទ្ធប្រឆាំងអនក្ខរភាពនៅកម្ពុជា។
អង្គការស៊ីប៉ា ជាអង្គការមួយដែលបានបោះពុម្ព និងផ្សព្វផ្សាយសៀវភៅអប់រំជាច្រើនសំរាប់កុមារនិងយុវវ័យ។ បន្ថែមពីនោះអង្គការនេះបានបង្កើតបណ្ណាល័យចល័តតាមរថយន្តដើម្បីជំរុញឲ្យមានការអានសៀវភៅឲ្យបានច្រើនក្នុងចំណោមកុមារកម្ពុជា។
លើសពីនេះអង្គការដដែលបានបង្កើតបណ្ណាល័យនៅតាមពន្ធនាគារទៀតផង។ លោក ហុក សុទ្ធិ បានចូលបម្រើការងារនៅអង្គការស៊ីប៉ានៅឆ្នាំ ១៩៩៥ ក្នុងនាមជាទីប្រឹក្សាផ្នែកទំនាក់ទំនងនិងគរុកោសល្យ។ បន្ទាប់មក លោកក្លាយទៅជាអ្នកសម្របសម្រួលកម្មវិធីបណ្ណាល័យរបស់អង្គការ ដោយបានជួយបណ្តុះបណ្តាលបណ្ណារក្សជាង ២៥០០នាក់នៅទូទាំងប្រទេស មុនពេលក្លាយទៅជាប្រធាន អង្គការស៊ីប៉ា នៅឆ្នាំ២០០៤។ ក្នុងអំឡុងឆ្នាំ ២០០០ លោកបានបង្កើតកម្មវិធីបោះពុម្ពសៀវភៅជាភាសាខ្មែរសម្រាប់យុវជន៕