ភ្នំពេញ៖ ប្រធានសមាគមពង្រឹងសេដ្ឋកិច្ចក្រៅប្រព័ន្ឋ និងជាសមាជិក គណបក្សសង្គ្រោះជាតិ លោក ឌិន ពុទ្ធី បានដាក់លិខិតលាលែងពីសមាជិកគណបក្សសង្គ្រោះជាតិ បន្ទាប់ពីតុលាការសម្រេចដោះលែងនៅក្រៅឃុំបណ្តោះអាសន្ន កាលពីពាក់កណ្តាល ខែ មករា ឆ្នាំ ២០១៧។
អ្នកតាមដានស្ថានការណ៍សង្គម និងនយោបាយយល់ថា ការលាលែងពីគណបក្សប្រឆាំងជាហេតុផលនយោបាយនៅក្នុងសង្គមនាពេលនេះ។ លោក ធូ វិរៈ រាយការណ៍៖
បើយោងតាមពាក្យសុំលាលែងដែលបានផ្សព្វផ្សាយជាសាធារណៈនៅថ្ងៃទី ២៧ ខែ មករានេះ មូលហេតុ លោកសម្រេចចិត្តដើរចេញពីគណបក្សសង្គ្រោះជាតិ ដោយជាប់បំពេញភារកិច្ចជាសមាគម និងគ្មានពេលគ្រប់គ្រាន់ ដើម្បីបំពេញការងារគណបក្សសង្គ្រោះជាតិបន្តទៀត។
លោក ឌិន ពុទ្ធី ប្រធានសមាគមពង្រឹងសេដ្ឋកិច្ចក្រៅប្រព័ន្ឋ បានបញ្ជាក់បន្ថែមថា លោកសម្រេចដើរចេញ ពីគណបក្សសង្គ្រោះជាតិ តែលោកក៏មិនទៅចូលរួមជាមួយគណបក្សផ្សេងឡើយ ព្រោះលោកចង់ផ្តោតនៅលើសមាគមសេដ្ឋកិច្ចក្រៅប្រព័ន្ធឲ្យបានពេញលេញ។
ម្យ៉ាងលោកថា ការសម្រេចដើរចេញពីសមាជិកគណបក្សប្រឆាំង ក៏ព្រោះតែលោកព្រួយបារម្ភអំពីបណ្តឹងជាច្រើននៅតុលាការ។
លោក ឌិន ពុទ្ធី៖«គេឲ្យនៅក្រៅឃុំគឺពីរ រឿងមុខទីស្នាក់ការគយ នៅឆ្នាំ ២០១៥ ហើយរឿងនិងក៏ដោះលែងឲ្យនៅក្រៅឃុំបណ្តោះអាសន្ន ហើយរឿងឡានធ្វើបាតុកម្មក៏គេចោទខ្ញុំដែរ អញ្ចឹងវាបីករណីនៅតុលការ អញ្ចឹងបងឯងជ្រាប់ អារឿងហ្នឹង»។
គឺជារឿងធម្មតាក៏ថាបាន ចំពោះការលាលែងពីបក្សនយោបាយ ហើយទៅធ្វើអ្វីមួយ ប៉ុន្តែ ជាទម្លាប់ គឺសង្គម បច្ចុប្បន្ន បើមានអ្នកណាចេញពីបក្សប្រឆាំង គឺជាហេតុផលនយោបាយ និង ការទិញទឹកចិត្តឱ្យដើរចេញ។ ករណីលោក ឌិន ពុទ្ធី ជាសមាជិករបស់គណបក្សសង្គ្រោះជាតិ ត្រូវបានអ្នកវិភាគ ថាគឺជាគំរាមកំហែងខាងនយោបាយ ជាជាងរឿងផ្សេងៗ។
អ្នកឃ្លាំមើលពីបញ្ហាសង្គម និងនយោបាយ លោក គឹម សុខ យល់ថា ការសម្រេចដើរចេញពីគណបក្សសង្គ្រោះជាតិ របស់លោក ឌិន ពុទ្ធី ប្រហែលអាចជាហេតុផលនយោបាយ ព្រោះលោកថា លោក ឌិន ពុទ្ធី គឺជា បុគ្គលសំខាន់មួយរូបនៅថ្នាក់មូលដ្ឋានដែលអាចទាក់ទាញប្រជាប្រិយភាពឲ្យគណបក្សនយោបាយ។
លោក គឹម សុខ៖«គេដោះលែងលោក ឌិន ពុទ្ធី គឺ មូលហេតុនយោបាយ ព្រោះគេចាប់គាត់ ក្នុងហេតុផលនយោបាយ មូលហេតុនយោបាយ ឥឡូវយើងឃើញច្បាស់ជាការលាលែងចេញពីគណបក្សសង្គ្រោះជាតិ នេះជាហេតុផលនយោបាយមួយហើយ»។
ប្រធានសមាគមពង្រឹងសេដ្ឋកិច្ចក្រៅប្រព័ន្ឋ ប្រចាំក្រុងប៉ោយប៉ែត លោក ឌីន ពុទ្ធី បានរងការចោទថា បានបើករថយន្តបុកលោកវរៈសេនីយ៍ត្រី ឈាន ពិសិដ្ឋ នាយរងប៉ុស្តិ៍នគរបាល អន្តោប្រវេសន៍ប្រចាំច្រកទ្វារអន្តរជាតិប៉ោយប៉ែត កាលពីព្រឹកថ្ងៃទី ២២ ធ្នូ២០១៦ ដែល រឿងនេះ គេថាលោកវរៈសេនីយ៍ត្រី ហើយទម្លាក់កំហុស លើ លោក ឌីន ពុទ្ធី ។លោក ឌីន ពុទ្ធី ត្រូវបានតុលាការដោះលែងឱ្យមានសេរីភាពវិញ នៅថ្ងៃសៅរ៍ទី១៤ មករា កន្លងមកដែលជារឿងគួរ ឱ្យភ្ញាក់ផ្អើល៕
