ភ្នំពេញ៖ គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានបើកសវនាការជំនុំជម្រះក្ដីករណី ជនជាតិបរទេស (ជនអន្តោប្រវេសន៍) មានឈ្មោះក្នុងបញ្ជីបោះឆ្នោតថ្មីឆ្នាំ២០១៦ ។
សវនាការនេះ ដឹកនាំដោយលោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត ដែលចាប់ផ្ដើមនៅម៉ោង ៩ព្រឹក ហើយ គ.ជ.ប នឹងប្រកាសលទ្ធផលនៅម៉ោង ៣រសៀល។ នេះបើតាមសេចក្ដីរាយការណ៍របស់អ្នកយកព័ត៌មានរបស់វិទ្យុស្ដ្រីដែលបានទៅស្ដាប់សវនាការនេះ។
សវនាការដែល គ.ជ.ប បើកនៅព្រឹកមិញមានបណ្ដឹងសរុបទាំងអស់ ៧ករណី ប្ដឹងជនបរទេសចំនួនជិត ២០០នាក់។ ក្នុងសវនាការនេះ គឺមានការចោទសួរដេញដោលពីប្រធាន គ.ជ.ប ទៅកាន់ចុងចោទយ៉ាងច្រើន ជុំវិញឯកសារដែលពួកគេមាននិងរយៈពេលដែលពួកគេមករស់នៅកម្ពុជា ដោយមានការតវ៉ាយ៉ាងច្រើន ពីដើមបណ្ដឹង។
សូមជម្រាបថា ករណីបណ្ដឹងជនជាតិបរទេសដែលមានឈ្មោះក្នុងបញ្ជីបោះឆ្នោតថ្មីនេះ ប្រសិនបើរកឃើញថា ជនទាំងនោះជាជនអន្ដោប្រវេសន៍ខុសច្បាប់ គ.ជ.ប នឹងលុបឈ្មោះរបស់ពួកគេចេញពីបញ្ជីឈ្មោះបោះឆ្នោតថ្មី។ គួរបញ្ជាក់ថា ពលរដ្ឋខ្មែរដែលបានចុះឈ្មោះបោះឆ្នោត លើប្រព័ន្ធទិន្នន័យកុំព្យូទ័រ សម្រាប់ការបោះឆ្នោតក្រុមប្រឹក្សាឃុំសង្កាត់ អាណត្ដិទី០៤ នៅថ្ងៃទី០៤ មិថុនា ឆ្នាំ ២០១៧ មានជិត ៨លាននាក់៕