ភ្នំពេញ៖ អ្នកភូមិបឹងកក់ នៅថ្ងៃចន្ទ ទី០៩ នេះគឺចាប់ផ្តើមយុទ្ធនាការថ្ងៃចន្ទពណ៌ខ្មៅឡើងវិញ បន្ទាប់ពីពួកគេ បានផ្អាកអស់រយៈពេល ២សប្តាហ៍កន្លងមក តែនៅពេលជាមួយគ្នានេះពួកគាត់បានទាមទារឱ្យបក្សនយោបាយធំ២ ដែលមានអាសនៈនៅរដ្ឋសភា ឆាប់ជួបប្រជុំគ្នាដើម្បី ដោះលែងសកម្មជនដីធ្លីនិងសិទ្ធិមនុស្ស ដែលពួកគាត់ថាជាប់គុកដោយអំពើយុត្តិធម៌។
អ្នកភូមិបឹងកក់ដែលមានគ្នាប្រមាណ៤០នាក់ បានផ្តើមធ្វើយុទ្ធនាការថ្ងៃចន្ទពណ៌ខ្មៅ ឬហៅថា “Black Monday” នៅក្នុងសហគមន៍បឹងកក់វេលាម៉ោង ៨ព្រឹកថ្ងៃនេះ ដោយមានការឃ្លាំមើលពី សំណាក់ កងសន្តិសុខ ខណ្ឌដូនពេញ។
តាមគម្រោងអ្នកភូមិបឹងកក់នឹងយកញត្ដិទៅដាក់តាមស្ថានទូតបរទេស និងក្រសួងមហាផ្ទៃនៅថ្ងៃអង្គាស្អែកនេះ ដើម្បីជម្រុញឲ្យមានការដោះលែងអ្នកស្រី ទេព វន្នី ដែលជាតំណាងសហគមន៍បឹងកក់ មន្ត្រីការពារសិទ្ធិមនុស្សអាដហុក មន្ត្រី គ.ជ.ប និងស្វែងរកយុត្តិធម៌ឲ្យលោកបណ្ឌិត កែម ឡី ដែលត្រូវបានឃាតករបាញ់សម្លាប់កាលពីថ្ងៃទី១០ ខែកក្កដា ឆ្នាំ ២០១៦។
តាមការអះអាងរបស់អ្នកស្រី សុង ស្រីលាប បញ្ជាក់ថា អ្នកភូមិបឹងកក់ធ្វើយុទ្ធនាការថ្ងៃចន្ទពណ៌ខ្មៅ ឡើងវិញនេះ គឺដោយសារពួកគាត់សង្កេតឃើញថា ការជួបចរចាគ្នារវាងគណបក្សនយោបាយដែលមានអាសនៈក្នុងរដ្ឋសភាទាំងពីរ នៅតែស្ថិតក្នុងភាពមិនច្បាស់លាស់ ទើបពួកគាត់ទទូចឱ្យមានការចរចាឆាប់បំផុត។ អ្នកស្រីបានបញ្ជាក់ទៀតថា នៅថ្ងៃស្អែកដាក់ញត្តិទៅក្រសួងមហាផ្ទៃ គឺដោះលែងអ្នកស្រី ទេព វន្នី។
អ្នកស្រី ទេព វន្នី ដែលជាស្ដ្រីតំណាងសហគមន៍បឹងកក់ ត្រូវបានតុលាការក្រុងភ្នំពេញ សម្រេចផ្ដន្ទាទោសដាក់ពន្ធនាគាររយៈពេល ៦ខែ និង ៦ថ្ងៃក្នុងរឿងក្ដីពីរ ដាច់ដោយឡែកពីគ្នា។
បទចោទទាំងនោះរួមមាន បទជេរប្រមាថ និងប្រឆាំងអ្នករាជការសាធារណៈ និងរឿងក្ដីមួយទៀត គឺការធ្វើយុទ្ធនាការថ្ងៃច័ន្ទពណ៌ខ្មៅ ដែលទាមទារឲ្យដោះលែងមន្ដ្រីការពារសិទ្ធិមនុស្សអាដហុក និងអគ្គលេខាធិការរង គ.ជ.ប ។
មន្ដ្រីការពារសិទ្ធិមនុស្សអាដហុកទាំង ៤ រូបនោះ រួមមានលោក នី សុខា លោក ណៃ វង់ដា លោក យី សុខសាន និងលោកស្រី លឹម មុនី្ន ចំណែកអគ្គលេខាធិការរងនៃគណៈកម្មាធិការជាតិរៀបចំការបោះឆ្នោតគឺលោក នី ចរិយា។ ពួកគាត់ជាប់ចោទ ពីបទសូកប៉ាន់ និង សមគំនិតក្នុងសំនុំរឿងនាង ខុមចាន់ តារាទី ហៅស្រីមុំ៕
