ភ្នំពេញ ៖ សមាគមប្រជាធិបតេយ្យ សេដ្ឋកិច្ចក្រៅប្រព័ន្ធនិង លោក សម រង្ស៊ី ដែលរដ្ឋាភិបាលឃាឃាំងមិនឱ្យចូលប្រទេស បង្ហាញពីព្រឹត្តិការណ៍ដ៏សោកសៅនៃការបាញ់ប្រហារកម្មករកាលពី ៣ឆ្នាំមុននៅផ្លូវវេងស្រេង ដែលគេថា អាជ្ញាធរបានបង្ក្រាប យ៉ាងឃោរឃៅ។
ព្រឹត្តិការណ៍នេះ បានកើតឡើងនៅលើកំណាត់ផ្លូវវេងស្រេង ម្ដុំរោងចក្រកាណាឌីយ៉ា គឺបន្ទាប់ពីកម្មករ ធ្វើបាតុកម្មទាមទារដំឡើងប្រាក់ខែ ១៦០ដុល្លារ។
នៅថ្ងៃទី ០៤ មករា ឆ្នាំ ២០១៤នេះ ជាព្រឹត្តិការណ៍មួយដែលគេដឹងថា មាន កម្មករ-កម្មាការិនី ៤នាក់ស្លាប់ និង ១នាក់បាត់ខ្លួន ជាង២០នាក់ រងរបួស ហើយកម្មករ ២០នាក់ទៀតត្រូវបានចាប់ខ្លួន។
ករណីកងទ័ពបង្ក្រាបកម្មករដោយសារការទាមទារដំឡើងប្រាក់ឈ្នួលកម្មករ បានទាញឱ្យមានការថ្កោលទោស យ៉ាងខ្លាំងពីសហគមន៍អន្តរជាតិ អង្កការសិទ្ធិមនុស្ស ដោយហៅព្រឹត្តិការណ៍នេះថាជា សកម្មភាព ប្រឆាំងមនុស្សជាតិមួយធ្ងន់ធ្ងរ៕