ភ្នំពេញ៖ ជាថ្មីម្តងទៀត មេដឹកនាំវៀតណាម បានស្នើឱ្យនាយករដ្ឋមន្ត្រី ហ៊ុន សែន ពន្លឿនក្នុងផ្តល់ឯកសារស្របច្បាប់ឱ្យពលរដ្ឋវៀតណាម ដែលកំពុងរស់នៅក្នុងប្រទេសកម្ពុជា ដើម្បីធានាថា ពលរដ្ឋវៀតណាមទាំងនោះ មានសុវត្ថិភាពក្នុងការរស់នៅ និងរកស៊ីនៅកម្ពុជា។ តែយ៉ាងនេះក្ដី បក្សប្រឆាំង និងអ្នកឃ្លាំមើលបញ្ហាសង្គម លើកឡើងការផ្តល់ភាពស្របច្បាប់នេះ គួរតែធ្វើឡើងដោយផ្អែកទៅលើច្បាប់មួយដ៏ត្រឹមត្រូវ។ កញ្ញា ឆេង ណាតា រាយការណ៍៖
ការជំរុញរបស់មេដឹកនាំវៀតណាម ឱ្យនាយករដ្ឋមន្ត្រីកម្ពុជា ពន្លឿនក្នុងការផ្តល់ឯកសារស្របច្បាប់ទៅជនជាតិវៀតណាម ដែលកំពុងរស់នៅក្នុងប្រទេសកម្ពុជា ធ្វើឡើងខណៈដែលនាយករដ្ឋមន្ត្រីកម្ពុជា បានទៅធ្វើទស្សនៈកិច្ចផ្លូវការនៅប្រទេសវៀតណាម រយៈពេលពីរថ្ងៃ។
យោងតាម កាសែតវៀតណាមញ៉ូវ មេដឹកនាំវៀតណាម សង្ឃឹមថា នាយករដ្ឋមន្ត្រីកម្ពុជា សម្តេច ហ៊ុន សែន នឹងបន្តដឹកនាំពន្លឿនការងារទាក់ទិនឯកសារស្របច្បាប់ ដែលជនជាតិវៀតណាមបានតាំងទីលំនៅ ក្នុងប្រទេសកម្ពុជា។ ជាងនេះទៀតសមភាគីវៀតណាមស្នើឱ្យកម្ពុជាបង្កភាពងាយស្រួលសម្រាប់ជនជាតិវៀមណាម ស្របច្បាប់ ដើម្បីស្វែងរកជំរកដែលជាការរួមចំណែកដល់ទំនាក់ទំនងទ្វេភាគី។
ទាក់ទិនបញ្ហានេះ លោក យ៉ែម បុញ្ញឬទ្ធិ អ្នកនាំពាក្យគណបក្សសង្គ្រោះជាតិ មានប្រសាសន៍ថា ការផ្តល់ភាពស្របច្បាប់ទៅបានគឺត្រូវយោងទៅលើច្បាប់។ លោកថា ការអនុវត្តច្បាប់គឺជារឿងមួយដែលត្រឹមត្រូវ។ ជាមួយគ្នានេះ លោកគាំទ្ររដ្ឋាភិបាលកម្ពុជាដែលសព្វថ្ងៃនេះពិនិត្យទៅលើករណីជនអន្តោប្រវេសន៍។ សម្រាប់ អ្នកដែលអាចមានសញ្ជាតិខ្មែរបាន គឺត្រូវធ្វើតាមច្បាប់សញ្ជាតិ ហើយមុននឹងចូលសញ្ញាតិខ្មែរបាន ត្រូវមានទីលំនៅក្នុងប្រទេសកម្ពុជា រស់នៅស្រុកខ្មែរ ចេះប្រវត្តិសាស្ត្រ និងចេះនិយាយខ្មែរ ហើយមានព្រះរាជក្រិត្យពីព្រះមហាក្សត្រ។
«យើងគិតថា រដ្ឋាភិបាលយើងនឹងពិនិត្យទៅលើផ្លូវច្បាប់ ដូចច្នេះដូចខ្ញុំបញ្ជាក់ជូនអម្បិញមិញ ច្បាប់ ទាំងច្បាប់សញ្ជតិ ទាំងច្បាប់អន្តោប្រវេសន៍ ដូច្នេះលក្ខណៈស្របច្បាប់ ឬមិនស្របច្បាប់គឺរដ្ឋាភិបាលខ្មែរជាអ្នកកំណត់»។
ជុំវិញបញ្ហានេះដែរ លោក មាស នី អ្នកស្រាវជ្រាវពីការអភិវឌ្ឍសង្គម យល់ថា ការផ្តល់សុវត្ថិភាព ឬការរស់នៅសមរម្យ ឱ្យពលរដ្ឋរបស់គេ គឺជាបំណងធម្មតារបស់ប្រទេសនីមួយៗ។ ប៉ុន្តែសម្រាប់ កម្ពុជាមុននឹងគិតពីការផ្តល់ភាពស្របច្បាប់ឱ្យជនជាតិវៀតណាម ត្រូវពិនិត្យថាតើអ្នកនោះ មានភាពស្របច្បាប់ប៉ុណ្ណាដែលអាចរស់នៅក្នុងប្រទេសកម្ពុជាបាន។
លោក មាស នី ៖«ការផ្តល់កន្លែងរស់នៅត្រឹមត្រូវ យើងត្រូវពិនិត្យសិនថាតើអ្នកដែលមកហ្នឹងមានភាពស្របច្បាប់ប៉ុណ្ណា ហើយបើសិនជាយើងមិនមានការគ្រប់គ្រងក្នុងភាពស្របច្បាប់ទេ ហើយរដ្ឋាភិបាលយើងមានតួនាទី ក្នុងការថែទាំគេពេកអាហ្នឹងក៏វាមិនទាន់គ្រប់គ្រាន់ មិនទាន់ត្រឹមត្រូវដែរ អញ្ចឹងទី១ត្រូវពិនិត្យមើលភាពស្របច្បាប់ ហើយទី២ ប្រព័ន្ធគ្រប់គ្រង ហើយជនអន្តោប្រវេសន៍នៅស្រុកយើងនេះ យើងត្រូវពង្រឹងថែមទៀត»។
ចំណែកលោក គឹម សុខ អ្នកឃ្លាំងមើលការអភិវឌ្ឍន៍សង្គម បានបង្ហាញការព្រួយបារម្ភចំពោះបញ្ហានេះ។ លោកថា ប្រសិនបើនាយករដ្ឋមន្ត្រីផ្តល់ភាពស្របច្បាប់ឱ្យជនជាតិវៀតណាម ទាំងអស់នេះមែន កម្ពុជាអាចនឹងជៀសមិនផុត ពីការក្លាយជាជនជាតិភាគតិចរស់លើទឹកដីខ្លួនឯង។លោកយល់ថាការស្នើសុំរបស់មេដឹកនាំវៀតណាម គឺជាយុទ្ធសាស្ត្រឈ្លានពានកម្ពុជា បែបទំនើបរបស់ខ្លួន។
លោក គឹម សុខ ៖«បើមិនមានមូលដ្ឋានច្បាស់លាស់ក្នុងការផ្តល់ឯកសារ ស្របច្បាប់ទៅឱ្យជនជាតិវៀតណាមទាំងនោះទេ និយាយរួមមិនធ្វើតាមច្បាប់ត្រឹមត្រូវនៃការផ្តល់ឯកសាសញ្ជាតិ ទៅឱ្យជនជាតិវៀតទាំងអស់នោះទេ នោះមានន័យច្បាស់ណាស់ ការធ្វើបែបហ្នឹងវាគ្រាន់តែជាយុទ្ធសាស្ត្រក្នុងទិសដៅ គ្រប់គ្រងកម្ពុជាបានបែបសម័យទំនើបដែលគេមិនធ្វើសង្គ្រាមក្នុងការវាយយកទេ ក៏ប៉ុន្តែគេបញ្ជូនមនុស្សឱ្យវាយផ្ទាល់..»។
ឆ្លើយតប បញ្ហានេះ លោក ផៃ ស៊ីផាន អ្នកនាំពាក្យរដ្ឋាភិបាល បានប្រាប់វិទ្យុស្ត្រីថា កម្ពុជាស្វាគមន៍ចំពោះជនជាតិវៀតណាម ដែលស្របច្បាប់ ប៉ុន្តែជនអន្តោប្រវេសន៍រដ្ឋាភិបាលមិនអនុញ្ញាតឱ្យរស់នៅឡើយ។
សូមជម្រាបផងដែរថា ក្នុងដំណើរទស្សនកិច្ចទៅកាន់ប្រទេសវៀតណាម ក្នុងរយៈពេលពីរថ្ងៃ សម្តេចនាយករដ្ឋមន្ត្រី ហ៊ុន សែន និងមេដឹកនាំប្រទេសវៀតណាម បានជួបពិភាក្សាគ្នាលើបញ្ហាជាច្រើន ក្នុងនោះរួមមានបញ្ហាព្រំដែន សេដ្ឋកិច្ច កិច្ចសហប្រតិបត្តិការ និងបញ្ហាផ្សេងទៀត។ ឆ្លៀតឱកាសនោះ សម្ដេច ហ៊ុន សែន បានទៅ គោរពវិញ្ញាណក្ខន្ធវីរៈជន វៀតណាម លោក ហូជីមិញ៕
