ភ្នំពេញ៖ ស្ត្រីដែលទទួលរងគ្រោះដីធ្លីមកពីខេត្តកោះកុង ជាង១០០នាក់ តំណាងឱ្យ ៤៧ គ្រួសារ ដេកហាលមូស ហាលខ្យល់ នៅចិញ្ចើមថ្នល់មុខវត្តសាមគ្គីរង្សី ពេញ០១យប់ ព្រោះតែអធិការវត្តមិនហ៊ានអនុញ្ញតឱ្យពួកគាត់ចូលសម្រាកក្នុងវត្ត ដោយអះអាងថាគ្មានកិច្ចអន្តរាគមន៍ពីអាជ្ញាធរដែនដី។ នេះបើតាមការឱ្យដឹងពីក្រុមស្ត្រីរងគ្រោះដីធ្លី នៅព្រឹកថ្ងៃទី ២១ ខែធ្នូ ឆ្នាំ២០១៦នេះ។ តែព្រះចៅអធិការវត្តមានថេរដីកាថា ព្រះអង្គមានការអាណិតអាសូរខ្លាំងណាស់ដល់ពលរដ្ឋទាំងនោះ ។ លោក ជួន សារ៉េត រាយការណ៍៖
ប្រជាពលរដ្ឋ ក្មេង ចាស់ ប្រុស ស្រី ជាច្រើននាក់ អ្នកខ្លះស្រែកយំ ខ្លះទៀតស្រែកទាមទាររកកិច្ចអន្តរាគមន៍ពីរាជរដ្ឋាភិបាលរឿងជម្លោះដីធ្លី ហើយខ្លះទៀតស្រែកយំសុំស្នាក់នៅវត្តសាមគ្គីរង្សី បន្ទាប់ពីពួកគេសម្រាកខាងក្រៅវត្តសាមគ្គីរង្សីអស់ពេញមួយយប់។
អ្នកស្រី សូម ដើង មកពីខេត្តកោះកុង បានផ្តល់បទសម្ភាសន៌ឱ្យវិទ្យុស្ត្រីនៅថ្ងៃនេះថា មូលហេតុដែលពលរដ្ឋស្នាក់នៅក្រៅវត្តពេញមួយយប់នេះ ពីព្រោះចៅអធិការវត្តមិនអនុញ្ញាត្តិឱ្យពួកគេស្នាក់នៅខាងក្នុងវត្ត។ អ្នកស្រី បន្តថាអ្នកស្រីនឹងបន្តស្នាក់នៅភ្នំពេញរហូតទាល់រាជរដ្ឋាភិបាលរកដំណោះស្រាយជូនពួកគាត់បើមិនដូច្នោះទេពួកគាត់នឹងមិនត្រទ្បប់ទៅវិញនោះទេ។
អ្នកស្រី សូម ដើង៖«ចៅអធិការថាគាត់អត់ហ៊ានឱ្យយើងចូល អត់ឱ្យប្រជាពលរដ្ឋចូលព្រោះគេចោទប្រកាន់គាត់ពេក ហៅគាត់ទ្បើងតុលាការរហូត យល់ឃើញថាវាពិបាកដែរហ្នឹងណាពិបាកវេទនាអារឿងដីធ្លីគេយកអស់ហើយមកដេកលើដី លើថ្នល់ជាតិទៀត ខ្ញុំអត់ទៅណាទេទាល់តែដោះស្រាយចេញបានទៅ បើដោះស្រាយអត់ចេញអត់ទៅ»។
ចំណែកពលរដ្ឋម្នាក់ទៀត គឺអ្នកស្រី ជា មុំ បានលើកទ្បើងថា ដើមចមដែលពលរដ្ឋមកស្នាក់ខាងក្រៅវត្តសាមគ្គីរង្សី ព្រោះកាលរសៀលម្សិលមិញស្ត្រីរងគ្រោះដីធ្លីដែលមកពីខេត្តកោះកុងនេះ បានទៅរកកិច្ចអន្តរាគមន៍ពីរដ្ឋសភា និងក្រសួងបរិស្ថាន ពីរឿងជម្លោះដីធ្លី ហើយស្ថាប័នទាំង០២សន្យាថានឹងដោះស្រាយជូន បន្ទាប់មកពួកគាត់ត្រូវបានកងកម្លាំងសមត្ថកិច្ចខណ្ឌចំការមន ដឹកពួកគាត់យកទៅទុកខាងមុខវត្តសាមគ្គីរង្សី។ អ្នកស្រី ជា មុំ បន្តថាចៅធិការវត្តមិនអាចឱ្យពួកគាត់ស្នាក់នៅនោះទេព្រោះគ្មានការសុំអនុញ្ញត្តិពីថ្នាក់លើ ។
«លោកថាអត់មានការអនុញ្ញាតពីខាងលើ ក្រសួងអត់សុំចៅអធិការវត្តចឹងគាត់អត់ហ៊ានឱ្យចូលវត្តបានទេ បើអត់ចូលចឹងខ្ញុំករុណាសុំដេកតាមចិញ្ចើមថ្នល់តាមហ្នឹងហើយ យល់ឃើញថាវេទនាកំសត់ខ្លួនប៉ុណ្ណឹងសុំឱ្យតែរដ្ឋាភិបាលដោះស្រាយ ឱ្យតែប៉ុណ្ណឹងហើយបើគេមិនឱ្យចូលខ្ញុំមិនតូចចិត្តតូចថ្លើមអីទេ មិនចេះតែងាយបានទៅបានមកទេ ចេះតែនៅ តែដេក កំសត់ខ្លួនអញ្ចឹងទៅ ដាក់ឆ្នាំងបាយ អង្ករដាំហូបតាមហ្នឹងទៅ»។
ទាក់ទងនឹងករណីនេះដែរ អភិបាលខណ្ឌមានជ័យ លោក ពេជ្យ កែវមុន្នី បានមកជួយអន្តរាគមន៍សុំឱ្យចៅអធិការវត្តសាមគ្គីរង្សី អនុញ្ញាតឱ្យពួកគាត់ស្នាក់នៅក្នុងវត្តបណ្តោះអាសន្នសិន។
លោក ពេជ្យ កែវមុន្នី ពន្យល់ប្រាប់ពលរដ្ឋថាមូលហេតុដែលចៅអធិការវត្ត មិនអនុញ្ញាតឱ្យស្នាក់នៅវត្តនេះ ព្រោះខ្វះការទំនាក់ទំនងគ្នារវាងខណ្ឌចំការមន និងព្រះសង្ឃនៅវត្តនេះ។
លោក ពេជ្យ កែវមុន្នី៖«យើងខ្ញុំសុំអភ័យទោស និងអធ្យាស្រ័យផងដែរដោយសារតែខ្វះការទំនាក់ទំនងគ្នារវាងខណ្ឌចំការមន ជាមួយនិងបងប្អូនខ្វះការទំនាក់ទំនងគ្នាក៏ដូចជាជាមួយព្រះសង្ឃនៅក្នុងវត្តនេះអញ្ចឹងហើយបានជាងលោកសង្ឃមិនឱ្យបងប្អូនចូលក្នុងវត្តដោយសារតែខ្វះការទំនាក់ទំនងគ្នា »។
ឆ្លើយតបនឹងការលើកទ្បើងនេះដែរ ចៅអធិការវត្តសាមគ្គីរង្សី ព្រះតេជគុណ ថាច់ ហាសំអាង មានសង្ឃដីកាប្រាប់ក្រុមអ្នកសារព័ត៌មានថា មូលហេតុដែលមិនអនុញ្ញាតឱ្យស្ត្រីរងគ្រោះដីធ្លីចូលសម្រាកក្នុងវត្តនោះព្រោះកន្លងមក វត្តព្រះតេជគុណធ្លាប់ទទួលបានការចោទប្រកាន់ថាឱ្យអ្នកមានជម្លោះដីធ្លីស្នាក់នៅដោយខុសច្បាប់ ឬគ្មានការជូនដំណឹងឱ្យអាជ្ញាធរបានដឹងជាដើម។ ព្រះអង្គបន្តថាដោយសារបញ្ហានេះហើយទើបមានការរឹតបន្តឹងការសុំស្នាក់អាស្រ័យពីពលរដ្ឋដោយព្រះតេជគុណមានសង្ឃដីការថា ជាកំហុសរបស់អាជ្ញាធរខណ្ឌចំការមនដែលមិនមកអន្តរគមន៍ករណីនេះ។
ព្រះតេជគុណសង្ឃដីកាដូច្នេះថា «ពេលដែលយើងអនុញ្ញាត ឱ្យជនងរគ្រោះដីធ្លីនៅវត្តគឺយើងមិនបានសហការជាមួយអាជ្ញាធរដែនដីអាហ្នឹងជាកត្តាធំ អញ្ចឹងហើយនៅពេលនេះគឺដើម្បីឱ្យញាតញ៉ម ចូលនៅវត្តបានតាមពិតព្រះសង្ឃលោកបើកបេះដូងស្រាប់ហើយមិនចាំបាច់ឱ្យនៅក្រៅ ចាំអាជ្ញាធរដែនដីមកអញ្ចឹងទេតែដោយសារតែយើងចង់ឱ្យអាជ្ញាធរបានដឹងថាយើងធ្វើគឺសហការជាមួយអាជ្ញាធរដែនដី យើងសហការជាមួយគាត់ទៅជៀសវាងការចោទប្រកាន់ព្រះសង្ឃពេលថ្ងៃក្រោយទៀត»។
សូមជម្រាបថា ក្រុមស្ត្រីរងគ្រោះដីធ្លីខេត្តកោះកុង ដែលទ្បើងមករាជធានីភ្នំពេញនេះ គឺក្នុងគោលបំណងដើម្បីរកកិច្ចអន្តរាមន៍ ពីរាជរដ្ឋាភិបាលក្នុងសំណុំរឿងជម្លោះដីធ្លីរវាងក្រុមហ៊ុនឯកជនធ្វើស្ករអំពៅមួយរបស់លោក ឧកញ្ញ៉ា លី យ៉ុងផាត់ ដែលពួកគេថាក្រុមហ៊ុននេះបានរំលោភបំពានយកដីធ្លីរបស់ពួកគាត់។ គូរជម្រាបដែរថា ស្ថាប័នដែលពលរដ្ឋរងគ្រោះដីធ្លី រកកិច្ចអន្តរាគមន៍នោះមានដូចជា រដ្ឋសភាជាតិ ក្រសួងបរិស្ថាន ក្រសួងដែនដី នគរូបនីយកម្មណនិងសំណង់ និងក្រសួងពាក់ព័ន្ធមួយចំនួនទៀត៕
