ប្រធានាធិបតីទើបជាប់ឆ្នោតថ្មីសហរដ្ឋអាមេរិក លោក ដូណាល់ ត្រាំ បានប្រាប់នាយករដ្ឋមន្ដ្រី Nguyen Xuan Phuc ថា អាមេរិកនិងវៀតណាមត្រូវតែមានទំនាក់ទំនងទ្វេភាគីកាន់តែខ្លាំងជាងមុន។
តាមទីក្នាក់ងារសារព័ត៌មានReuters ប្រសាសន៍របស់លោក ដូណាល់ ត្រាំ បានធ្វើឡើងនៅក្នុងកិច្ចសន្ទនាតាមទូរស័ព្ទជាមួយនាយករដ្ឋមន្ដ្រីវៀតណាម កាលពីថ្ងៃពុធ ទី១៤ធ្នូ។
ក្នុងកិច្ចសន្ទនាជាមួយគ្នានេះ លោក ដូណាល់ ត្រាំ និងលោកNguyen Xuan Phuc បាននិយាយជាមួយគ្នាជាច្រើន អំពី ទំនាក់ទំនងនិងសហប្រតិបត្តិការទ្វេភាគី ដោយភាគីទាំងពីរសន្យារក្សាចំណងទំនាក់ទំនងជាមួយគ្នាឱ្យកាន់តែល្អប្រសើរជាងមុន។
តាមប្រភពដដែល លោកត្រាំ និងលោក Nguyen Xuan Phuc បានជជែកគ្នាទៀតជុំវិញភាពតានតឹងនៃសមុទ្រចិនខាងត្បូង។
វៀតណាម និងអាមេរិក បានបើកចាប់ផ្ដើមមានទំនាក់ទំនងជាផ្លូវការឡើងវិញជាមួយគ្នា គឺ នៅក្នុងទសវត្ស ១៩៩០ នៅពេលដែលសង្គ្រាមត្រជាក់ពិភពលោកត្រូវបានបញ្ចប់ ហើយអតីតគូរសត្រូវទាំងពីរនេះ បានងាកមកចាប់ដៃជាមួយនិងគ្នាឡើងវិញ។
យ៉ាងណាក៏ដោយ ភាពស្និទ្ធស្នាលរវាងក្រុងវ៉ាស៊ីនតោន និងក្រុងហាណូយ ត្រូវបានគេមើលឃើញកាន់តែប្រសើរឡើង គឺ នៅពេលដែលវៀតណាមពឹងពាក់អាមេរិកជួយពង្រឹងវិស័យការពារជាតិរបស់ខ្លួននៃជម្លោះដែនទឹកជាមួយនិងប្រទេសចិន៕ Channel News Asia